აბა, ამათ ჰყოლიათ, აი! - ფიბა და ევროლიგა გაჯიუტდნენ...

რამდენიმე წლის წინ, ევროკალათბურთის მამებმა B დივიზიონის წესი შემოიღეს და აღარ მეგონა, მათგან თუ კიდევ რამე გამაოცებდა. თურმე ჯერ სად ხარ! ადგნენ და ფიბა-ს ჯიბრში ჩაუდგნენ, ევროლიგის მატჩების კალენდარი არ შეცვალეს და მასში მონაწილე კლუბებს უფლება მისცეს, რომ მოთამაშეები მსოფლიოს ჩემპიონატის შესარჩევისთვის ნაკრებ გუნდებში არ გაეშვათ.

ამით თვითონაც შეილახეს პრესტიჟი, შესარჩევ ეტაპსაც დაუკარგეს ლაზათი და გუნდებიც არათანაბარ მდგომარეობაში ჩააყენეს. მაგალითად, ევროლიგაზე მონაწილე ქვეყნების კლუბები თუ პატრიოტიზმს მიაწვებიან, მოთამაშეებს ნაკრებში გაუშვებენ. ჩვენისთანა ქვეყნები კი დაიჩაგრებიან. მოკლედ, როგორც ყარაჩოღელი გიჟუა იტყოდა, აბა ამათ ჰყოლიათ აი!

23 თებერვალს, საქართველოს კალათბურთელთა ნაკრები ავსტრიაში ჩავა და სამკვდრო-სასიცოცხლოდ შეერკინება მასპინძლებს, რათა ჯგუფიდან გასვლის შანსი დაიტოვოს, ორი დღის შემდეგ კი თბილისში გერმანიას დაუხვდება.

მსოფლიო ჩემპიონატის შესარჩევი ეტაპის წილისყრის შემდეგ, ავსტრიას სათვალავში თითქმის არც ვაგდებდით და მთავარ კონკურენტებად გერმანია-სერბეთს მივიჩნევდით, მაგრამ ახლა სულ სხვა რეალობის წინაშე ვდგავართ.

სამწუხაროდ, ევროპული და მსოფლიო კალათბურთის ფედერაციების შეფებმა ისე აგვირიეს დავთრები, რომ ავსტრიელებთან მატჩსაც კი გულის ფანცქალით ველოდებით. გიორგი შერმადინს და თორნიკე შენგელიას ევროლიგური კლუბები არ უშვებენ, ბექა ბურჯანაძე და დუდა სანაძე ტრავმირებულები არიან, ახლახან კი გაჭირვებული კაცისა და აღმართში დაწეული ქვის არ იყოს, გუნდის კაპიტანი მანუჩარ მარკოიშვილიც გამოგვაკლო მუხლის ტკივილმა. ეს კვინტეტი რამხელა ძალაა ჩვენი გუნდისთვის, ამაზე ლაპარაკიც აღარ ღირს - გამთამაშებელი აკლია და ფაქტობრივად, ოპტიმალური სასტარტო ხუთეულია!

მართალია, ითამაშებენ მაიკლ დიქსონი და გოგა ბითაძე, დაგვიბრუნდება გიორგი ცინცაძე, დაგვეხმარება ნიკა ცქიტიშვილი, საქართველოს ჩემპიონატშიც მოიძებნებიან ნიჭიერი კალათბურთელები, მაგრამ დანაკლისი მაინც ძალიან სერიოზულია.

შერმადინი და შენგელია მაინც რომ ჩამოსულიყვნენ, უკვე რადიკალურად განსხვავებული ამბიციები გაგვიჩნდებოდა. ახლახან, კალათბურთის ფედერაციის პრეზიდენტი პაატა გურასპაული ესპანეთში იყო და მისი თქმით, არსებობს მცირე შანსი, რომ შერმადინი საგერმანიოდ მაინც ჩამოვიდეს. ღმერთმა ქნას!

ავსტრიელებს რა ენაღვლებათ, მათი ნაკრების ძირითადი ბირთვი ევროლიგაზე არ ასპარეზობს და შეკრულ-შეთამაშებული შემადგენლობით დაგვიხვდებიან. ჩვენმა მწვრთნელმა ილიას ზუროსმა იკითხოს, ერთ წელიწადში ლამის მესამედ რომ უხდება შემადგენლობის გადახალისება!
ისე, ავსტრია სხვა კონკურენტებთან შედარებითაა სუსტი, თორემ საზაფხულო მოსამზადებელ ეტაპებზე რამდენჯერმე შევხვდით და ურიგოდ სულაც არ გამოიყურებოდნენ. რამდენიმე ამხანაგური მატჩი მოგვიგეს კიდეც. იმედია, ოფიციალურ შეხვედრებში იმ წაგებებს ცხვირში ძმრად ამოვადენთ...

კარგია, რომ ტურნირის ფორმატი მაინცაა ჩვენკენ, ანუ მომდევნო ეტაპზე ოთხიდან სამი გუნდი გადის. ანუ, შეიძლება ისე მოხდეს, რომ ჯგუფში მხოლოდ ერთი თამაში მოიგო და მაინც გაძვრე. ეს კი იმას ნიშნავს, რომ ავსტრიაში მცირე სხვაობით მარცხიც კი დაგვიტოვებს ჯგუფიდან გასვლის შანსს, რაკიღა სათანადო რევანშის შანსი საზაფხულოდ თბილისში გვექნება.

თუმცა, თუ მხოლოდ ავსტრიას ვაჯობებთ და დანარჩენ შეხვედრებს წავაგებთ, მომდევნო ეტაპზე 0 ქულით გადავალთ, რადგან ბოლოადგილოსანთან გამარჯვებები სათვალავში არ მიიღება. სწორედ ამიტომ გვჭირდება გერმანიისა და სერბეთის თბილისში დამარცხება მაინც, რომ მომდევნო ეტაპზე 2 გამარჯვებით გასვლა უფრო შეგვიმოკლებდა საოცნებო მსოფლიო ჩემპიონატისკენ მიმავალ ბილიკს.

სამწუხაროდ, ევროპული და მსოფლიო კალათბურთის მამების ვირებივით გაჯიუტებამ ეს გზა გვარიანი ეკალ-ბარდებით აგვივსო. სხვა რა გზა გვაქვს, უნდა მოვიმარჯვოთ ნაჯახები და როგორმე გზა გავწმინდოთ.

მომდევნო შესარჩევი ეტაპისთვის რამდენიმე წამყვანი კალათბურთელი ასაკის გამო ალბათ სანაკრებო კარიერას დაასრულებს, კიდევ ერთხელ მოგვიხდება გუნდის გადახალისება და ვინ იცის, კიდევ როდის ვიქნებით ასე ახლოს მსოფლიო ჩემპიონატთან...

2062
მკითხველის კომენტარები / 0 /
მსგავსი ამბები
რუბრიკის სხვა სიახლეები