აბსოლუტური ფალავნობა მოახლოვდა

15 დეკემბერს თბილისში საქართველოს 2018 წლის აბსოლუტური ფალავანი გამოვლინდება ქართულ ჭიდაობაში.

ფალავნობა ჩვენი ეროვნული საჭიდაო სახეობის ყოველწლიური შეჯიბრებაა, რომელშიც საუკეთესოთა შორის საუკეთესოს – აბსოლუტურ ფალავანს ავლენენ.

ფალავნობა პირველად იმართება მას შემდეგ რაც ცოტა ხნის წინ ქართული ჭიდაობა იუნესკომ არამატერიალური კულტურის ძეგლთა ნუსხაში შეიყვანა.

წლევანდელ ფალავნობას დიღომში, ამერიკის საელჩოს მიმდებარე ტერიტორიაზე არსებული "ახალი თბილისი 2015"-ს დარბაზი უმასპინძლებს, ორგანიზატორი კი უწინდელივით საქართველოს ქართული ჭიდაობის ეროვნული ფედერაცია იქნება.

მონაწილეთა რაოდენობა განსაზღვრულია. ამას ქართული ჭიდაობის ეროვნული ფედერაცია ადგენს და დებულების მიხედვით იმ რეგიონებს, სადაც ქართული ჭიდაობა სხვებზე უკეთაა განვითარებული მეტი მონაწილის ყოლის უფლებასაც ის ანიჭებს.

თითოეულ წონაში ამჯერადაც 4-4 სპორტსმენის გამოყვანის უფლება აქვს შიდა ქართლს და კახეთს, 2-2 სპორტსმენით იქნებიან წარმოდგენილნი იმერეთი და თბილისი, თითო მოჭიდავე ეყოლებათ ქვემო ქართლს, სამცხე-ჯავახეთს, გურიას, აჭარას, მცხეთა-მთიანეთს, აფხაზეთს, სამაჩაბლოს, სამეგრელო-ზემო სვანეთს, რაჭა ლეჩხუმი-ქვემო სვანეთს.

შეჯიბრებაზე მხოლოდ 18 წლის და უფროსი ასაკის მოჭიდავეები დაიშვებიან.

მონაწილენი თავდაპირველად იასპარეზებენ 4 წონით კატეგორიაში (80 კგ, 90, 100, +100 კგ). აღნიშნულ წონებში პირველ-მეორე და მესამე ადგილზე გასული სპორტსმენები უფლებას მიიღებენ ჩაერთონ აბსოლუტური ფალავნობისათვის პაექრობაში.

შეგახსენებთ, რომ საქართველოს აბსოლუტური ფალავნობა 1928 წლიდან იმართება. ფალავანის წოდება არაერთ ტიტულოვან სპორტსმენს, ოლიმპიური თამაშების, მსოფლიოს და ევროპის ჩემპიონს მოუპოვებია. ტიტულოვანი ქართველი სპორტსმენები მუდამ პრესტიჟულად მიიჩნევდნენ ჩვენს ეროვნულ ჭიდაობაში საქართველოს აბსოლუტური ფალავანის წოდების მოპოვებას.

ყველაზე მეტჯერ აბსოლუტური ფალავანი ალექსი დავითაშვილი გახდა, რომელმაც 8-ჯერ შეძლო ამის გაკეთება.
ბოლოს, ანუ შარშან აბსოლუტური ფალავანი გურამ თუშიშვილი გახდა, რომელმაც მას შემდეგ (წლეულს შემოდგომით) მსოფლიოს ჩემპიონის ტიტულიც მოიპოვა.

ფალავნობა 15 დეკემბერს "ახალი თბილისის" ტერიტორიაზე 9 საათიდან აიღებს სტარტს.

479
მკითხველის კომენტარები / 0 /
მსგავსი ამბები
რუბრიკის სხვა სიახლეები