აბულაძეთა ტრიუმფი ოქროს დასაწყისი, მედლების კვარტეტი და ოთხი შანსი

რევაზ ლაშხის დამოძღვრილი ახალგაზრდა ბერძენ-რომაელთა გუნდი აგრძელებს წარმატებით გამოსვლას ესპანურ პონტევედრაში, ევროპის ახალგაზრდულ ჩემპიონატში:

გუშინ პირველი ფინალური დღე 4 მედლით ჩაამთავრა; მათ შორის - ერთი ოქროთი, პარალელურად კი გუშინვე ჩატარებული წინასწარი პაექრობების შემდეგ 5 წონიდან ოთხი ფალავანი მედლისთვის აგრძელებს ბრძოლას: 2 ოქროს და 2 - ბრინჯაოსთვის. 

ჩვენი ნაკრების წევრებმა გუშინ თითო ოქრო-ვერცხლი და 2 ბრინჯაო მოიპოვეს. ევროპის ჩემპიონი აჭარის ნაკრების წევრი ფრიდონ აბულაძე (55) გახდა, მისი მოგვარე და ასევე ხულოს წარმომადგენელი ლერი აბულაძე (63) ფინალში დამარცხდა, ხოლო მესამეზე თბილისელი ნიკა შერბაკოვი (77) და გარდაბნელი გიორგი ქაცანაშვილი (87) გავიდნენ. 

საინტერესოა, რომ როგორც გუშინ, ასევე დღესაც, საღამოს ფინალურ ბლოკში ორი იჭიდავებს ფინალში: ერთი ისევ აჭარის წარმომადგენელი დიეგო ჩხიკვაძეა (60), ხოლო მეორე - ლანჩხუთელი გიორგი შოთაძე (67). აჭარის ნაკრების კიდევ ერთი წევრი - ოთარ აბულაძე (72) და თბილისელი კოკა ღარიბაძე (97) კი დამამშვიდებელ წრეში აგრძელებენ ბრძოლას ბრინჯაოს მედლისთვის, ოღონდ აბულაძე სანუგეშოში ორ პაექრობას გამართავს, ღარიბაძე კი დამამშვიდებლის ფინალშია და დღეს საღამოს პირდაპირ ბრინჯაოსთვის იჭიდავებს. 

აბულაძეთა ტრიუმფი

ბერძენ-რომაელთა ასაკობრივ ნაკრებებში აბულაძეების „კლანი“ არ გვიკვირს - ძმები ლერი და ოთარ აბულაძეები მისი უკვე სტაჟიანი წევრები არიან, ახლა კი ამ დუეტს მათი მოგვარე ფრიდონ აბულაძეც შეემატა. ევროპირველობაზეც ყველაზე დიდ წარმატებას ამ ახალბედამ მიაღწია. 

არადა, მან მართლაც გამორჩეული ფინალი ჩაატარა და დამსახურებულად გაიმარჯვა რუს ანვარ ალახიაროვთან: 7:6. შეხვედრის დაძაბულობაზე ანგარიშიც მიუთითებს, თუმცა ეს კიდევ არაა ყველაფერი, რადგან 0:6 ჩამორჩენა ამოქაჩა.

პირველი პერიოდი რუსმა 6:3 მოიგო იმის მიუხედავად, რომ აბულაძე აქტიურიც იყო და მედგრადაც უტევდა. თუმცა ინიციატივის მოპოვება მაინც გაუჭირდა და თან სწორედ ამ სისწრაფეს ემსხვერპლა ორჯერ. ჯერ იყო და, პირველი წუთის მიწურულს ხაზთან მიმწყვდეულ მეტოქეს მთელი ძალით აწვებოდა წრიდან გასაყვანად, მაგრამ რუსმა მოძრაობაზე დაიჭირა, ჩოქბჯენში ჩაყვანაც დაუფიქსირა და იქვე დაატრიალა კიდეც, რითაც 4:0 დაწინაურდა.

ალახიაროვმა პირველი პერიოდის მიწურულსაც დაიჭირა კონტრშეტევაზე და ისევ ჩაიყვანა ჩოქბჯენში - 6:0 მის სასარგებლოდ, თუმცა დატრიალება ვერ მოახერხა. ამ კომბინაციურ ეპიზოდში ჩვენებური ორჯერ დაუსხლტა მის შეტევას და თავად სცადა კონტრშეტევა. პირველად ეს არ გამოუვიდა, მეორედ კი დგომიდან გდებისას კარგად დაუხურა ფანდი და რუსი იქით დააგდო ლეიბზე: 2:6. რუსებმა ეს ეპიზოდი გააპროტესტეს, რაც მსაჯებმა არ დააკმაყოფილეს და ჩვენებურს ერთი ქულა დაუმატეს. 

მეორე პერიოდი აბულაძემ კიდევ უფრო დიდი აღმავლობით ჩაატარა, ინიციატივას უკვე სრულად ფლობდა და დაახლოებით პერიოდის შუაწელში ვარდნაში ზურგსუკან 4-ქულიანზე გადააგდო, რითაც 7:6 დაწინაურდა, ეს ანგარიში კი ბოლომდე წარმატებით შეინარჩუნა. 

სამწუხაროდ, ლერი აბულაძე ფინალში ვერაფერს გახდა თურქ აბდულა ტოპრაკთან და 2:8 დამარცხდა. ჩვენებურმა მხოლოდ ერთხელ მოახერხა მისი ჩოქბჯენში ჩაყვანა, სხვა მხრივ კი უპირატესობას თურქი ფლობდა. თან აბულაძე დაიღალა კიდეც და ბოლო წამებზე აღარც ჭიდაობდა, დასრულებამდე გაუწოდა ხელი მეტოქეს მისალოცად და უილაჯობისგან გაუცინა კიდეც. აქაოდა, ალალია შენზე ეს მოგებაო. ამან თურქსაც რაინდობისკენ უბიძგა - ბოლოს თვითონაც მივიდა და გადაეხვია აბულაძეს. 

ბრინჯაოსთვის შეხვედრაში შერბაკოვმა 3:1 დაამარცხა ლიეტუველი არმინას ლიგნუგარისი, თუმცა ანგარიში სულაც არ ასახავს შეხვედრის მიმდინარებას. ამ ციფრებიდან გამომდინარე, შეიძლება, კაცს ეგონოს, რომ შერბაკოვს გაუჭირდა მოგება. არადა, შეხვედრაში დიდ უპირატესობას ფლობდა, ინიციატივაც მის ხელთ იყო და ძალიან იოლად დაჯაბნა მეტოქე. ქაცანაშვილმაც ასევე იოლად, 8:4 აჯობა ბრინჯაოსთვის პაექრობაში პოლონელ მიჰალ ანდრეი დიბკას. 
გუშინ დამამშვიდებელ წრეში ოზურგეთელი რობინზონ ესაძეც (130) გამოდიოდა, თუმცა პოლონელ ტომაშ იაცეკ ვავრზინჩუკთან 3:4 დამარცხდა და უმედლოდ დარჩა.

ისევ ორი ფინალი და ოთხი შანსი

როგორც გითხარით, ლაშხის გუნდმა გუშინ დარჩენილ ხუთ წონაშიც წარმატებით ჩაატარა წინასწარი ეტაპის პაექრობები და ხუთი ფალავანიდან ოთხი კვლავაც გრძელებს მედლისთვის ბრძოლას, ფინალში კი ისევ ორი მონაწილე გვეყოლება. აქვე იმასაც გეტყვით, რომ ჯერჯერობით ჩვენები გუნდურ ჩათვლაში 83 ქულით მეორეზე არიან და 17-ით ჩამორჩებიან რუსებს, თავად კი ამდენივეთი უსწრებენ უკრაინელებს. 

დაბოლოს ერთი უცნაურობაც: როგორც ვხედავთ, ჩვენი ნაკრები უფრო მეტი წარმატებით მჩატე წონებში გამოვიდა: ოთხივე ფონალისტი საწყის ოთხ წონაზე მოდის. არ ვიცით, თავის დროზე თავადაც მჩატეწონოსან ლაშხს მსუბუქებთან უფრო გამოდის მუშაობა თუ სხვა რამ მიზეზია, მაგრამ ფაქტია! 
ჩხიკვაძემ ესპანეთში გამოსვლა წმინდა მოგებებით დაიწყო - ლიეტუველ ლივიუს სავიცკასს 9:1, ხოლო უკრაინელ მიროსლავ სოლოვიანს 9:0 მოუგო, ნახევარფინალში კი სომეხი საჰაკ ჰოვანისიანი 4:1 დაამარცხა. ჩხიკვაძე ფინალში აზერბაიჯანელ ასგარ ალიზადას შეხვდება. 

პირველი შეხვედრა შოთაძემაც სუფთად მოიგო - ესპანელ უგო ფერნანდეს მონტოუტოს 8:0 მოუგო. ბელარუს ელდარ ჰასანაუს 7:2 აჯობა, მერე კი ისევ ორჯერ იმარჯვა წმინდად: მეოთხედფინალში მოლდოველ ვალენტინ პეტიჩს - 9:0, ხოლო ნახევარფინალში ნორვეგიელ ჰაავარდ იორგენსენს 10:2 აჯობა. ფინალში მისი მეტოქე სომეხი ჰაიკ მელიქიანი იქნება, ვინც ნახევარფინალში რუსი აბდულვახაბ ასაინოვი სუფთად დაამარცხა: 10:1. 

ოთარ აბულაძე მეოთხედფინალში სომეხ მალკას ამოიანთან დამარცხდა - 4:8. მანამდე საკვალიფიკაციოში წმინდად, 9:0-ზე ბეჭებზე დააწვინა ნორვეგიელი სამეტ ბაირამ ჯეტინი, ვისაც ამავე ანგარიშით, ოღონდ ბეჭებზე დადების გარეშე ზედ მიაყოლა კიდევ ერთი სკანდინავიელი, შვედი ოლე კრისტიან სპეტი. სანუგეშოში ის პირველ შეხვედრას იტალიელ ლუიჯი რინალდისა და თურქ ისმაილ გუმს შორის მოგებულთან ჩაატარებს, ხოლო ამ პაექრობას თუ მოიგებს, ბრინჯაოსთვის რუს სერგეი სტეპანოვს შეხვდება. 

კოკა ღარიბაძემაც წმინდად იმარჯვა საკვალიფიკაციოში - იტალიელ ანტონიო გიფრიდას 9:0 სძლია და მეოთხედფინალში გავიდა, სადაც გერმანელ პატრიკ ნეუმაიერთან 0:3 წააგო. ის ბრინჯაოსთვის პაექრობას ულადისლაუ პუსტაჩილაუსთან გამართავს.

გუშინ ჩვენგან მხოლოდ ბექა გურული (82) გავარდა - საკვალიფიკაციოში ჰოლანდიელ ტირონე სტერკენბურგთან 1:3 დამარცხდა. ჰოლანდიელიც იქვე დამარცხდა და გურული სანუგეშოში ვერ გადავიდა. 

ყოველდღიური სპორტული გაზეთი "ლელო"
2742
მკითხველის კომენტარები / 0 /
მსგავსი ამბები
რუბრიკის სხვა სიახლეები
;