აბუ დაბის გრან პრი: ვინ შეკაზმავს არაბულ ტაიჭს?

დღეს, 26 ოქტომბერს, აბუ დაბიში გრან პრის სეზონის მორიგი ტურნირი იწყება, რომელშიც საქართველოდან მხოლოდ ვაჟთა ნაკრები გამოვა. ისიც არასრული, მაგრამ საკმაოდ ძლიერი შემადგენლობით იასპარეზებს.

თუმცა, სამწუხაროდ, არის დანაკლისიც. არაბულ საამიროებში მძიმეწონოსნები რომ ვერ წავიდოდნენ, ეს ადრევე იყო გაცხადებული, რადგან ზუსტად ორ კვირაში მათ მაროკოულ მარაკეშში მსოფლიოს აბსოლუტური ჩემპიონატი ელოდებათ და იმისთვის ემზადებიან. ევროპისა და ოლიმპიურ ჩემპიონ ლაშა შავდათუაშვილის (73) წასვლაც გამოირიცხა, რადგან გადაწყვიტა, საბოლოოდ მოირჩინოს ადრე ნატკენი ფეხი, ბოლო დღეებში კი გასაფრენად გამზადებულ დელეგაციას ფილტვების ანთების გამო მსოფლიოს მესამე პრიზიორი უშანგი მარგიანი (90) გამოაკლდა. მაღალი სიცხის გამო ვერც ლუხუმ ჩხვიმიანი (60) წავიდა. მათი ჩანაცვლებაც ვერ მოხერხდა, რადგან ვიზების გამზადება აღარ ესწრებოდა.

ნაკრების პირველი ჯგუფი - მჩატეწონოსნები, რომლებიც დღეს ჩაებმებიან შეჯიბრებაში, საამიროებში სამშაბათს გაფრინდა. მათ შორის - ევროპის ჩემპიონი, მსოფლიოს ბრინჯაოს მედალოსანი ამირან პაპინაშვილიც (60), ვინც აეროპორტში დახვდა უმცროს ძმას, ზაგრებიდან მსოფლიოს ახალგაზრდული ჩემპიონის ტიტულით მომავალ ჯაბა პაპინაშვილს, მიულოცა წარმატება და ეგრევე დაწყებულ რეგისტრაციაზე მისასწრებად აეროპორტის სათანადო ზონაში გადაინაცვლა.

მასთან ერთად მწვრთნელმა მინდია ბოდაველმა საამიროებში ევროპის ჩემპიონი და მსოფლიოს პრიზიორი ვაჟა მარგველაშვილი და ლაშა გიუნაშვილი (ორივე - 66) წაიყვანა ანუ იმ წონების წარმომადგენლები, რომლებიც დღეს იასპარეზებენ. დანარჩენები გია გუგავას ხელმძღვანელობით წუხელ გაფრინდებოდნენ: ევროპის მედალოსნები, ზებედა რეხვიაშვილი (81), ბექა ღვინიაშვილი (90) და ევროპის სამგზის ჩემპიონი, მსოფლიოს ორგზის და ოლიმპიადის ფინალისტი ვალერი ლიპარტელიანი (100).

დღეს აბუ დაბიში ვაჟებში 60 და 66 კილოგრამების ფალავნები იჭიდავებენ.

მსოფლიოს რეიტინგის ლიდერი პაპინაშვილი პირველ წრეში ისვენებს, მეორეში კი ებრაელ დანიელ ბენ დავიდს შეხვდება. ზემოაღნიშნულ წყვილში გამარჯვებული მეოთხედფინალში გადის, სადაც ასევე არ უნდა ჰყავდეს ძლიერი კონკურენტი.

პაპინაშვილის მსგავსად, საკმაოდ ხელსაყრელი ბადე ერგო მარგველაშვილსაც, რასაც ვერ ვიტყვით გიუნაშვილზე. მარგველაშვილი პირველივე წრეში სერბ სტრაჰინია ბუნჩიჩს ხვდება, ამ წყვილში საუკეთესოს მეტოქე კი ირლანდიელი ნათონ ბურნსისა და ყაზახი გუმარ ყირგიზბაევის პაექრობაში გაირკვევა. ამავე ჯგუფშია აზერბაიჯანელთა მსოფლიოს ორგზის მესამე პრიზიორი ნიჯატ შიხალიზადეც, ვისაც ჩვენი ლიდერი მეოთხედფინალამდე არ ხვდება.

გიუნაშვილი პირველ წრეში ყაზახთა აზიის წლევანდელ ვიცე-ჩემპიონ იელდოშ ჟუმაკანოვის ჩამოშორებას ეცდება, ხოლო თუ ამას შეძლებს, დიდი ალბათობით, ებრაელ ბარუხ შმაილოვს შეხვდება, ვისაც, წესით, მანამ არ უნდა გაუჭირდეს უზბეკი კოჯიაკბარ ოლიმოვის დამარცხება.

ხვალ, 27 ოქტომბერს, ჩვენგან მხოლოდ რეხვიაშვილი იასპარეზებს, ვინც ჯგუფში სერბთა მსოფლიოს ფინალისტ სრდან მრვალჯევიჩთან, პორტუგალიელთა ქართველ ანრი ეგუტიძესა და ირანელთა მსოფლიოს წლევანდელ ბრინჯაოს პრიზიორ საეიდ მოლაესთან მოხვდა, ოღონდ მათ მეოთხედფინალამდე არ შეხვდება. ჩვენებური პირველ წრეში მოლდოველი დორინ კოტონოაგას წასაქცევად გავა არაბულ ტატამზე, ხოლო მიზნის მიღწევის შემთხვევაში მეოთხედფინალში გასასვლელად ფრანგ ჟონათან ალადონსა და უზბეკ შაროფიდდინ ბოლტაბოევს შორის უძლიერესი ეყოლება დასამარცხებელი.

ზეგ, 28 ოქტომბერს, ორი მოჭიდავე გვეყოლება. ღვინიაშვილი პირველ წრეში ისვენებს, მერვედფინალში კი ბრაზილიელი ედუარდო ბეტონის "ჩაბეტონებას" ეცდება. მესამე წრეში მისი სავარაუდო მეტოქეები აზიის წლევანდელი ჩემპიონი, ტაჯიკი კომრონშოკ უსტოპირიონი, უზბეკი იაკიო იმამოვი და შვეიცარიელი კირილ გროსკლაუსი არიან. ვფიქრობთ, ჩვენებური საკმაოდ ხელსაყრელ ჯგუფშია. ერთი ეგაა, რომ, შესაძლოა, ღვინიაშვილის საამიროებში ჭიდაობამ ჩერნოგორიაში, მსოფლიოს 23-წლამდელთა მსოფლიოს ჩემპიონატზე მისი წასვლა შეაფერხოს, თუმცა ვიმედოვნებთ, ყველაფერი დადებითად გადაწყდება.

საკმაოდ ხელსაყრელ ბადეშია ლიპარტელიანი, ვინც პირველ წრეში ისვენებს, მასთან შესახვედრად კი ერთმანეთში გერმანელი იოაჰენს ფრაი და აქა-იქ სიურპრიზების შემომთავაზებელი იტალიელი ჯულიანო ლოპორჩიო იჭიდავებენ. ამ ჯგუფში ებრაელი პეტერ პალჩიკიც აღსანიშნავია, თუმცა "ძნელი ლუკმა" არც ერთი არ ჩანს.

ყოველდღიური სპორტული გაზეთი "ლელო"
1629
მკითხველის კომენტარები / 0 /
მსგავსი ამბები
რუბრიკის სხვა სიახლეები