აბუ დაბის ტურნირი: სლემი ვერცხლით და ბრინჯაოთი [VIDEO]

* აბუ დაბის გრან სლემი ქართველმა ძიუდოისტებმა ორი მედლით დაასრულეს.
* ბექა ღვინიაშვილმა (90 კგ) ვერცხლის მედალი მოიპოვა.
* ვაჟა მარგველაშვილმა (66) - ბრინჯაო.
* მსაჯებმა არასწორი ჩავლებისთვის მოხსნეს ვალერი ლიპარტელიანი.

ჩვენმა ნაკრებმა ორი მედლით დაასრულა გამოსვლა აბუ დაბის გრანდ სლემზე. შეჯიბრების პირველივე დღეს ევროპის ჩემპიონისა და მსოფლიოს პრიზიორ ვაჟა მარგველაშვილის (66) მიერ მოპოვებულ ბრინჯაოს მომდევნო ორ დღეში ჩვენებმა მხოლოდ ერთი ვერცხლი მიამატეს - 90 კილოგრამში ფინალური პაექრობა ბექა ღვინიაშვილმა დათმო ესპანეთის სახელით მოჭიდავე თანამემამულე ნიკოლოზ შერაზადიშვილთან.

ჩვენს ნაკრებს კიდევ ერთი მედლის - ბრინჯაოს მოპოვებაც შეეძლო, მაგრამ ზებედა რეხვიაშვილი (81) დამამშვიდებლის ფინალში დამარცხდა. შეგახსენებთ, რომ ტურნირის სტარტზე ასევე მეხუთეზე გავიდა ამირან პაპინაშვილიც (60). ამ სტატისტიკით საქართველოს ნაკრები გუნდურ ჩათვლაში მე-13 ადგილზეა.

მოლოდინისამებრ, ღვინიაშვილმა პირველ შეხვედრაში იპონით იოლად "დააბეტონა" ბრაზილიელი ედუარდო ბეტონი. მეოთხედფინალში ტაჯიკ კომრონშოკ უსტოპირიონს ჯერ ვარდნაში გამოჰკრა ცერი - ვაზარი, მერე კი ჩოქელა კისრულით წმინდად გადმოიღო. ტაჯიკი ძალიან მოუხერხებელი სტილის მოჭიდავეა, თუმცა ღვინიაშვილმა მაინც იოლად "მოარგო გასაღები".

მისთვის ნახევარფინალი ყველაზე ხანგრძლივი შეხვედრა გამოდგა ამ ტურნირზე, რადგან დამატებითი დრო დასჭირდა ახალწამოჩიტულ რუს ალექსანდრ როსლიაკოვთან. ღვინიაშვილმა კარგად შეურჩია დრო და დაიჭირა მოძრაობაზე, რამაც ვაზარი მოუტანა, აი, ფინალში კი თითქოს მონდომება, შემართება დააკლდა.

როგორც გითხარით, გადამწყვეტ შეხვედრაში მისი მეტოქე შერაზადიშვილი იყო, ვისაც კარგად იცნობს. ისინი თანაგუნდელები ჯერ კიდევ ახალგაზრდულ ნაკრებში იყვნენ, თუმცა მაშინ "მამლუქი 81"-ში გამოდიოდა, მერე კი, როცა 90-ში აინაცვლა, მალევე წავიდა ესპანეთში საცხოვრებლად. თუმცა ამის შემდეგ უკვე ხშირი კონკურენცია ჰქონდათ ერთმანეთში - ახალგაზრდებშიც და უფროსებშიც, ვინაიდან "მამლუქი" წონაში თანდათან იქცა სერიოზულ ძალად. ამ პაექრობებში გამარჯვებული ლამის მუდმივად ღვინიაშვილი რჩებოდა.

საინტერესოა, რომ შერაზადიშვილი ორჯერ გავიდა მსოფლიოს ახალგაზრდული ჩემპიონატის ფინალში, მაგრამ ორჯერვე დამარცხდა. აქედან ერთი ფინალი სწორედ ღვინიაშვილთან წააგო 2015 წელს.

ღმერთმა ნუ ჰქნას, ეს სტატისტიკა სამომავლოდ ჩვენებურის საზიანოდ შეიცვალოს, მაგრამ ამჯერად არაბულ საემიროებში შერაზადიშვილმა იოლად იმარჯვა. არადა, ღვინიაშვილმა შეხვედრა აქტიურად დაიწყო და თავიდან სრულ ინიციატივას ფლობდა: კისრულზეც გადმოიღო და ბრუნზეც გაისროლა, თუმცა ილეთით ვერც ერთი ვერ დასრულდა. სამაგიეროდ, შეხვედრის მეორე ნახევარში სადავეებს ნელ-ნელა მოწინააღმდეგე დაეუფლა. შედეგად, ჩვენებური ჯერ ამოსმულით გადმოიღო საკმაოდ ეფექტურ ვაზარზე, ბოლოსკენ კი შეკვრაზე უკან გადააგდო: იპონი.

აბუ დაბიში ღვინიაშვილის ჭიდაობა უფრო "დაღვინებული" იყო - ადრინდელივით გააფთრებით არ დაეტაკებოდა ხოლმე მეტოქეს, როცა მისვლისთანავე ცდილობდა იპონზე დაგდებას. ვნახოთ, მართლაც შეიცვალა საჭიდაო სტილი თუ საამიროებში ეს სხვა რამის გამო ხდებოდა, მაგრამ, ვფიქრობთ, დაცვაში მეტი მოეთხოვება - ორჯერვე ძალიან იოლად ააღებინა ჩავლება. მომეჩვენა, რომ "მაინც ვერაფერს მიზამს" მიდგომიდან გამომდინარე, თავის დაცვაზე არც უფიქრია.

რეხვიაშვილმა ჯგუფური ეტაპი მოიგო და შემდეგ ფინიშზე მოუკლო. თუმცა ამ დიდი ტექნიკური არსენალის მქონე ბიჭს ილეთების გაკეთება უჭირდა და პირველ შეხვედრაში მოლდოველი დორინ კოტონოაგა რომ გადმოიღო ვაზარიზე, მას შემდეგ გდება აღარ გაუკეთებია: მომდევნო ორ პაექრობაში ფრანგი ჯონათან ალარდონიც და ირანელთა მსოფლიოს წლევანდელი მესამე პრიზიორი საიდ მოლაეც გაფრთხილებებით ჩამოიშორა. სამაგიეროდ, ნახევარფინალში თვითონ გაუშვა გდება აყლაყუდა ჰოლანდიელ ფრანკ დე ვიტთან, ვისთანაც მსოფლიოს ჩემპიონატზეც დამარცხდა ამ ზაფხულს, და სანუგეშოში გადაერთო.

სამწუხაროდ, ვერც იქ გახდა ვერაფერს რუს ალან ხუბეცოვთან და აგერ უკვე, მესამედ წააგო მასთან. ჩვენებურმა ორი გდება გაუშვა: პირველად, როცა თვითონ აპირებდა ილეთზე შესვლას, მაგრამ რუსმა კონტრშეტევაზე გადააგდო, მეორედ კი ჩავარდა და მეტოქემ ვაზარზე ჩაატრიალა.

აბუ დაბის ტურნირის ყველაზე დიდი იმედგაცრუება და გაწბილება ჩვენი ლიდერის, ევროპის სამგზის ჩემპიონის, მსოფლიოს ორგზის და ოლიმპიადის ფინალისტ ვალერი ლიპარტელიანის (100) წაგება და უმედლოდ დარჩენაა. იგი პირველივე შეხვედრაში ფრიად საეჭვო ვითარებაში ფეხში ხელით შესვლისთვის მოხსნეს იტალიელ ჯულიანო ლოპორჩიოსთან.

ვეჭვობთ, შარშანდელის მსგავსად, ეს შეხვედრაც საერთაშორისო ფედერაციის მსაჯთა სემინარზე განსახილველად მოხვდება არბიტრთა შეცდომის საილუსტრაციოდ. თუმცა ლიპარტელიანმა საერთაშორისო რეიტინგში გალიდერების მშვენიერი შანსი კი დაკარგა, რასაც ჩემპიონობა მოუტანდა, ეს კი სეზონის ბოლოს გვარიან პრემიასაც ნიშნავდა, რასაც მსოფლიოს რეიტინგის პირველი ნომრები იღებენ საერთაშორისო ფედერაციისგან.

ყოველდღიური სპორტული გაზეთი "ლელო"
1058
მკითხველის კომენტარები / 0 /
მსგავსი ამბები
რუბრიკის სხვა სიახლეები
;