აგერ, ვაისი და აგერ, არჩევანი!..

შემოდგომიდან საქართველოს ეროვნული ნაკრები ერთა ლიგის გათამაშებაში ჩაებმება.

ადრეც დაგვიწერია და, სანამ მთავარზე ვიტყოდეთ, ერთხელაც უნდა ვთქვათ - რაც მეტი კარგ ფორმაში მყოფი ფეხბურთელი იქნება საქართველოს ნაკრების მთავარი მწვრთნელის განკარგულებაში, მით უკეთესი ჩვენი გუნდისა და ვლადიმირ ვაისისთვის.

უკეთესი, რადგან თანამედროვე ფეხბურთში ძალიან იშვიათად აღწევს წარმატებას ის გუნდი თუ ნაკრები, რომელსაც ორი თანაბარი ძალის შემადგენლობა არ ჰყავს.

ბოლო მატჩებში ჩვენ ვნახეთ, რომ საქართველოს ნაკრები აქეთკენ მიდის. არადა, მანამდე ასე არ იყო და ვერც იქნებოდა საკადრო დეფიციტის გამო, მაგრამ დასასრული ყველაფერს აქვს და, ვფიქრობთ, ის პერიოდიც ჩავლილია, როცა სანაკრებოდ გამოსადეგი ფეხბურთელები სანთლით გვყავდა საძებარი.

თქმა რად უნდა, რომ საქართველოს ნაკრების ძირითადი ბირთვი ჩამოყალიბებულია და ეროვნულ გუნდში ბევრ ახალ სახეს არ უნდა ველოდოთ, მაგრამ ფაქტია ისიც, რომ ნაკრები ცოცხალი ორგანიზმია და ვინც უმატებს, მისთვის ეროვნული გუნდის კარი არავითარ შემთხვევაში არ უნდა იყოს დახურული.

ამ დროისთვის პრეტენდენტი ორია - პოლონური "არკას" შემტევი ლუკა ზარანდია და დანიური "რანდერსის" მოიერიშე - საბა ლობჟანიძე. ბოლო დროს ორივე ჩამოყალიბდა თავისი გუნდის ლიდერად, ორივეს აქვს სისტემატური სათამაში პრაქტიკა და ორივე დაეჩვია მნიშვნელოვანი გოლების გატანას. ლობჟანიძე სულაც საუკეთესო იყო დანიის ჩემპიონატის ბოლო ტურში.

სასიხარულოა, რომ საქართველოს ნაკრებში რეზერვი გამოჩნდა, დანარჩენი კი ვაისის საქმეა - აგერ ის და აგერ, მისი არჩევანიც...

ყოველდღიური სპორტული გაზეთი "ლელო"
894
მკითხველის კომენტარები / 0 /
რუბრიკის სხვა სიახლეები
;