'ავდექი და წამოვედი...სადაც არა სჯობს, გაცლა სჯობსო, ნათქვამია' - რატომ დაატოვებინეს ონიანს გურია?

გიორგი ონიანი ლანჩხუთის "გურიას" მთავარი მწვრთნელის პოსტზე აღარ მუშაობს. ასეთი გადაწყვეტილება მიიღო კლუბის ახალმა ხელმძღვანელობამ.

ონიანს ქართველი გულშემატკივრის წინაშე წარდგენა არ სჭირდება. ის სხვადასხვა დროს არაერთი ქართული კლუბის ("ლოკომოტივი", ბათუმის "დინამო", "მეტალურგი", "სიონი", "ზესტაფონი", "დილა", "ტორპედო") ღირსებას იცავდა. ასევე თამაშობდა უცხოეთში, კერძოდ, იენის "კარლ ცაისსა" და ნალჩიკის "სპარტაკში".

შეგახსენებთ, რომ 5 წლის წინ მიღებული მძიმე ტრავმის გამო, ონიანმა საფეხბურთო კარიერა ნაადრევად დაასრულა და მწვრთნელობას მიჰყო ხელი...
გუშინ "ლელო" გიორგი ონიანს დაუკავშირდა და გუნდიდან წასვლის მიზეზებზე ჰკითხა:

"უკვე წამოვედი. ეს საკითხი გადაწყვეტილია. ყველა საბუთზე მოვაწერე ხელი. ახლა გეტყვით, რა და როგორ მოხდა - ლანჩხუთში რომ ჩავედი სამუშაოდ, კლუბის სათავეში იდგა დავით ყენია. იმ დროისთვის გუნდი ლიგა 3-ში მე-6 ადგილზე იყო.

კლუბის ხელმძღვანელობას მაშინვე პირდაპირ ვუთხარი, რომ ყველანაირად კი ვეცდებოდი გუნდის გადაყვანას რანგით მაღალ ლიგაში, მაგრამ ეს ძალიან რთული იქნებოდა. პირობაც კი დავდე, რომ შემდეგ სეზონში "გურია" აუცილებლად აინაცვლებდა ერთი რანგით მაღალ ლიგაში. შუა სეზონი იყო და მეტს ვერ მივაღწევდით.

გარდა ამისა, არ ვიცნობდი გუნდს, ფეხბურთელების 99 პროცენტთან პირველად მიწევდა მუშაობა... ახლა ჩვენი შედეგი გაცილებით უკეთესია - მეოთხე ადგილზე ვართ. მაგალითად, მე რომ მოვედი გუნდში, ხობის "კოლხეთი" 8 ქულით გვისწრებდა, ახლა კი ჩვენ ვართ წინ 2 ქულით, ჩვენ წინ კი "საბურთალოს" მეორე გუნდია. ასე რომ, პრაქტიკულად, საპლეიოფო ზონაში ვართ... ბოლოსაც შევხვდი კლუბის ახალ ხელმძღვანელობას. მათ პირდაპირ მითხრეს, რომ სურთ, ის ხალხი იხილონ სამწვრთნელო შტაბში, ვისთან ერთადაც მათთვის უფრო მისაღებია მუშაობა.

ფეხბურთში ასეა - ფულს ვინც იხდის, პირობებსაც ის კარნახობს... ამ ამბავში ჩემთვის ყველაზე მოულოდნელი ის იყო, რომ სეზონი არ ჩამამთავრებინეს. მეტი არაფერი. არანაირი კონფლიქტი არ ყოფილა ახალ ხელმძღვანელობასთან. ავდექი და წამოვედი. სადაც არა სჯობს, გაცლა სჯობსო, ნათქვამია.

შედეგის უქონლობაზე აქცენტი არ გაკეთებულა და არც ჩემი კომპეტენცია დაუყენებია ვინმეს ეჭვქვეშ. საქართველოს თასის გათამაშებიდან "სამტრედია" გამოვთიშეთ და ჩვენს ლიგაში რა შედეგიც გვქონდა, უკვე გითხარით. მინდა, "გურიას" წარმატება ვუსურვო. ლანჩხუთში ძალიან უყვართ ფეხბურთი და ეს ქალაქი იმსახურებს გუნდს უმაღლეს ლიგაში", - გვითხრა ონიანმა.

...ჩვენი ინფორმაციით, ამ დროისთვის "გურიას" თენგიზ პატარაია და გიორგი ჩხაიძე ავარჯიშებენ.

ყოველდღიური სპორტული გაზეთი "ლელო"
526
მკითხველის კომენტარები / 0 /
მსგავსი ამბები
რუბრიკის სხვა სიახლეები