ავიხსნათ ირლანდიური ჯადო: კარგად ნაცნობი,უხერხული მეტოქე

ფიფას რეიტინგში: 33
სატრანსფერო ღირებულება: 91 მილიონი ევრო
მწვრთნელი: მიკ მაკარტი

ირლანდია VS საქართველო
09.03.03 საქართველო-ირლანდია 1:2
11.06.03 ირლანდია-საქართველო 2:0
06.09.08 საქართველო-ირლანდია 1:2
11.02.09 ირლანდია-საქართველო 2:1
02.06.13 ირლანდია-საქართველო 4:0*
07.09.14 საქართველო-ირლანდია 1:2
07.09.15 ირლანდია-საქართველო 1:0
06.10.16 ირლანდია-საქართველო 1:0
02.09.17 საქართველო-ირლანდია 1:1
* - ამხანაგური მატჩი

რამდენი რამ შეიძლება დაიწეროს საქართველოსა და ირლანდიის ნაკრებთა ურთიერთშეხვედრების თაობაზე, მაგრამ ამ შემთხვევაში, თქვენის ნებართვით, დეტალებს აღარ ჩავეძიებით.

"სამყურებთან" თამაშები ჩვენთვის კარგად გასახსენებელი ნამდვილად არ არის. ამას მერეც, უშუალო დაპირისპირების წინაც მოვასწრებთ, ახლა კი მხოლოდ ის ვთქვათ, რომ "სამყურებმა" თითქმის ყველგან მოგვიგეს, სადაც კი შეგვხვდნენ. გამონაკლისი მხოლოდ ბოლო დაპირისპირებაა, რომელიც თბილისში 1:1 დასრულდა.

ირლანდიის ნაკრები ვერ მოხვდა რუსულ მუნდიალზე. სექტემბერში გუნდი ჩაება ერთა ლიგის გათამაშებაში. ზეგამოცდილი მარტინ ო"ნილის (რომელიც 2013-18 წლებში წვრთნიდა ირლანდიის ნაკრებს ) შეგირდებს ძალიან ცუდი სტარტი გამოუვიდათ.

"სამყურებმა" საგარეო ასპარეზზე 1:4 წააგეს უელსთან. ამ შეხვედრაში კუნძულელების დაცვაში მართლაც რომ საშინელება ხდებოდა. ტომ ლოურენსმა, გარეთ ბეილმა, აარონ რემზიმ და კონორ რობერტსმა ოთხჯერ გაუტანეს ირლანდიას. პრესტიჟის გოლი შონ უილიამსმა შეაგდო.

ამის შემდეგ იყო უგოლო მატჩი დანიასთან. მართალია, სტუმრები დიდ სათამაშო უპირატესობას ფლობდნენ, მაგრამ გატანა ვერ მოახერხეს და მასპინძლებმა ქულა აშკარად იღბლის წყალობით მოიპოვეს.

ამას მოჰყვა დუბლინური მატჩი იმავე უელსთან, რომელიც ჰარი უილსონის ერთადერთი გოლის წყალობით კვლავ უელსმა მოიგო. ირლანდიამ ბევრი კი იბრძოლა, მაგრამ მეტოქეს პასუხი ვერ გასცა.

ბოლოს კი იყო კიდევ ერთი უგოლო ფრე იმავე დანიასთან. ირლანდიამ ჯგუფში ბოლო ადგილი დაიკავა და ერთა ლიგის ჩ დივიზიონში დაქვეითდა, სადაც მომავალ გათამაშებაში საქართველოს ნაკრების ერთ-ერთი პოტენციური მეტოქე გახლავთ.

მწვრთნელი

სულ რაღაც 10 დღეა (25 ნოემბრიდან) ირლანდიის ნაკრებს ო"ნილზე არანაკლებ გამოცდილი, 59 წლის მიკ მაკარტი ჩაუდგა სათავეში. მაკარტი თავის დროზე კარგი მცველი იყო. სხვადასხვა დროს იცავდა "ბარნსლის", "მანჩესტერ სიტის", "სელტიკის", "ლიონის" და "მილუოლის" ღირსებას. 1984-92 წლებში თამაშობდა ირლანდიის ნაკრებში და ამ გუნდის შემადგენლობაში 57 მატჩიც (2 გოლი) ჩაატარა.

"სამყურების" მწვრთნელად ის უკვე მუშაობდა 1996-2002 წლებში (68 მატჩი, 29 მოგება, 20 ფრე, 19 წაგება). ის ზუსტად იმ შესარჩევის წინ გაათავისუფლეს, როცა ირლანდია საქართველოსთან ერთად მოხვდა ევრო 2004-ის საკვალიფიკაციო ეტაპზე - შვეიცარიასთან, რუსეთსა და ალბანეთთან ერთად. ამას გარდა, მან იმუშავა "მილუოლში", "სანდერლენდში", "ვულვზსა" და "იფსვიჩში".

ლიდერები და თაობათა ცვლა

ირლანდიის ნაკრებში ახლა თაობათა ცვლის პროცესი მიდის. ფაქტია, გუნდი ვეღარ არის ისეთი ძლიერი, როგორიც იყო ადრე. აღარ არის რობი კინი და კიდევ რამდენიმე გამოცდილი ფეხბურთელი.

ასეა, ადრე თუ გვიან ყველა გუნდი რჩება ლიდერის გარეშე, მაგრამ მოდიან ახალი ლიდერები. იცვლება ბირთვი... ეს ჩვეულებრივი პროცესია. ირლანდიის ნაკრები მაინც სავსეა ინგლისურ პრემიერლიგასა და ჩემპიონშიფში გამობრძმედილი ფეხბურთელებით.

გუნდის ლიდერად ახლა "ევერტონის" ფლანგელი მცველი სიმუს კოულმენი ითვლება. მისი სატრანსფერო ღირებულება 12 მილიონი ევროა.
10 მილიონი ღირს "ბარნლის" ნახევარმცველი რობი ბრეიდი, ისევე, როგორც იმავე "ბარნლის" კიდევ ერთი შუახაზელი ჯეფ ჰენდრიკი. ირლანდიის ნაკრები

თამაშობს ტრადიციულ ბრიტანულ ფეხბურთს და აქვს შემოქმედებითი კრიზისი.

დანიასთან ერთა ლიგის ბოლო მატჩისთვის გუნდში გამოძახებულები იყვნენ:
მეკარეები - დარენ რენდოლფი (მიდლსბრო, ინგლისი), კოლინ დოილი (ჰართსი, შოტლანდია), კაომინ კელეჰერი (ლივერპული, ინგლისი);
მცველები - სიმუს კოულმენი (მიდლსბრო, ინგლისი), შეინ დაფი (ბრაიტონი, ინგლისი), სუირუს კრისტი (ფულემი, ინგლისი), რიჩარდ კეო (დერბი, ინგლისი), კევინ ლონგი (ბარნლი, ინგლისი), მეტ დოჰერტი (ვულვზი, ინგლისი), ენდა სტივენსი (შეფილდ იუნაიტედი, ინგლისი), ჯონ ეგანი (შეფილდ იუნაიტედი, ინგლისი), დარა ლენიჰანი (ბლექბერნი, ინგლისი), ჯიმი დანი (ჰართსი, შოტლანდია), ლი ო"კონორი (მანჩესტერ იუნაიტედი, ინგლისი);
ნახევარმცველები - ჯეიმს მაკლინი (სტოკი, ინგლისი), ჯეფ ჰენდრიკი (ბარნლი, ინგლისი), რობი ბრეიდი (ბარნლი, ინგლისი), დევიდ მეილერი (რედინგი, ინგლისი), ჰარი არტერი (კარდიფი, უელსი), კალუმ ოდოვა (ბრისტოლი, ინგლისი), კონორ ჰურაჰანი (ასტონ ვილა, ინგლისი), შონ უილიამსი (მილუოლი, ინგლისი), ალან ბრაუნი (პრესტონი, ინგლისი);
თავდამსხმელები - კალუმ რობინსონი (პრესტონი, ინგლისი), ალდენ ო"ბრაიენი (მილუოლი, ინგლისი), შონ მაგუაირი (პრესტონი, ინგლისი), სკოტ ჰოგანი (ასტონ ვილა, ინგლისი), რონან კერტისი (პორტსმუთი, ინგლისი), მაიკლ ობაფემი (საუთჰემპტონი, ინგლისი).

ყოველდღიური სპორტული გაზეთი "ლელო"
422
მკითხველის კომენტარები / 0 /
მსგავსი ამბები
რუბრიკის სხვა სიახლეები