ავსტრალიის ღია. ავსტრალიის ღიას მეოთხედფინალში გავიდა ჩოგბურთელი, რომელსაც ტენისი ჰქვია და ტენესიდანაა წარმოშობით

ავსტრალიის ღია პირველობაზე დასრულდა მერვედფინალური ეტაპი. მამაკაცთა ტურნირზე ამ სტადიის ბოლო მატჩში მორიგი სენსაცია მოხდა.

ტურნირის ექვსგზის ჩემპიონი, მსოფლიოს ყოფილი პირველი ჩოგანი ნოვაკ ჯოკოვიჩი სამ სეტში დამარცხდა კორეელ ჰიეონ ჩუნგთან - 6:7(4), 5:7, 6:7(3).

ორი წლის წინ, ეს ჩოგბურთელები ავსტრალიის ღიას პირველ წრეში შეხვდნენ ერთმანეთს და მაშინ სამ სეტში ჯოკოვიჩმა მოიგო. მას შემდეგ ბევრი რამ შეიცვალა. ჯოკოვიჩს რთული დროება უდგას,

მისი მეტოქე კი პროფესიული ტურის მთავარ ამომავალ ვარსკვლავად ჩამოყალიბდა და შარშან, ATP-ის ახალგაზრდა ვარსკვლავების შემაჯამებელი ტურნირი მოიგო.

მელბურნში კი მეოთხე ნომრად განთესილ ალექსანდრ ზვერევის დამარცხება მოასწრო. გუშინ კი მოუგო ჩოგბურთელს, რომელსაც ბავშვობაში ყველაფერში ბაძავდა.

თავიდანვე გამოჩნდა, რომ სერბს ამ მატჩში სერიოზული პრობლემები ელოდა. კორეელმა ზედიზედ ორი ბრეიკი შეასრულა და 4:0 დაწინაურდა. ჯოკოვიჩმა ამას თავისი ორი ბრეიკით უპასუხა და წინ გასვლაც კი მოახერხა - 6:5. საბოლოოდ, პირველი სეტის ბედი ტაი-ბრეიკმა გადაწყვიტა, სადაც 3:3-ზე ჩონგმა ზედიზედ სამი ქულა აიღო, სამმაგი სეტბოლი მოიპოვა და მეორე ცდაზე აიღო პარტია.

მეორე სეტის სტარტზე კორეელმა ისევ წაიყვანა ანგარიში ბრეიკით და ჯოკოვიჩმა ისევ გააკეთა უკუბრეიკი. აქაც ყველაფერი ტაი-ბრეიკისკენ მიდიოდა, როცა ჩუნგმა მე-12 გეიმში მორიგი ბრეიკით სეტი მოიგო და 2:0 დაწინაურდა.

მესამე სეტის პირველ ხუთ გეიმში ოთხი ბრეიკი ვიხილეთ - ჯერ ჯოკოვიჩი გავიდა წინ, შემდეგ ჩუნგი, რასაც ნოვაკის მხრიდან ანგარიშის გათანაბრება მოჰყვა. ამის შემდეგ, ჩოგბურთელები ინარჩუნებდნენ საკუთარ მოწოდებას და მატჩში მეორე ტაი-ბრეიკი დაინიშნა.

ჩუნგმა ორი მინი-ბრეიკით წაიყვანა ანგარიში - 3:0, ჯოკოვიჩმა გაათანაბრა - 3:3, რასაც სერბის სერიოზული ჩავარდნა მოჰყვა - მან ზედიზედ ოთხი ქულა წააგო და 3 საათი და 24 წუთი ბრძოლის შემდეგ, ჩუნგმა მეოთხედფინალში თამაშის უფლება მოიპოვა.

ჯოკოვიჩს ამ შეხვედრაში, პირველ რიგში, მოწოდების მხრივ ჰქონდა პრობლემა - მხოლოდ 2 ეისი ჩააწოდა და 9 ორმაგი შეცდომა დაუშვა, მეორე მოწოდებით კი ქულების 39 პროცენტი აიღო. კიდევ ერთი პრობლემა ბრეიკ-პოინტების რეალიზაცია იყო - 19-დან 5 (ჩუნგს - 10-დან 6).

ჩუნგმა ახალი ისტორია დაწერა, რადგან პირველი კორეელია (კაცებშიც და ქალებშიც), ვინც "დიდი სლემის" ტურნირების მეოთხედფინალში გავიდა. აქ მისი მეტოქე იქნება კიდევ ერთი სენსაციის ავტორი, ტენესის შტატში მცხოვრები ტენის სანდგრენი.

მეორე წრეში სტენ ვავრინკას განადგურების შემდეგ, სანდგრენმა ოთხსაათიანი ბრძოლის შემდეგ, ტურნირის მეხუთე ნომერი, ავსტრიელი დომინიკ ტიმი დაამარცხა - 6:2, 4:6, 7:6(4), 6:7(7), 6:3. სანდგრენი ტურნირის ნამდვილი სენსაციაა - ავსტრალიამდე მას AთP-ის ტურში მხოლოდ ორი მატჩი ჰქონდა მოგებული და მხოლოდ შარშანდელი სეზონის ბოლოს შეაღწია TOP100-ში.

იოლად მოიგეს თავიანთი შეხვედრები როჯერ ფედერერმა და ტომაშ ბერდიხმა. შვეიცარიელმა ორ საათში ისე დაამარცხა უნგრელი მარტონ ფუჩოვიჩი, რომ ერთი ბრეიკ-პოინტის შანსიც არ მისცა მას - 6:4, 7:6(3), 6:2. ბერდიხმა კი 6:1, 6:4, 6:4 გაანადგურა იტალიელი ფაბიო ფონინი.

ყოველდღიური სპორტული გაზეთი "ლელო"
1129
მკითხველის კომენტარები / 0 /
მსგავსი ამბები
რუბრიკის სხვა სიახლეები
;