ავსტრალიის ღია. სასწაული, სახელად კაროლინა

ავსტრალიის ღია პირველობის ქალთა ტურნირზე მესამე ნახევარფინალისტი გახდა აშშ-ის ღიას მოქმედი ჩემპიონი, იაპონელი ნაომი ოსაკა.

აზიელი უკრაინელ ელინა სვიტოლინას ხვდებოდა. პირველი სეტი ძალიან საინტერესოდ წარიმართა. პირველ ხუთ გეიმში მეტოქეები საკუთარ გეიმებს ინარჩუნებდნენ, მომდევნო ხუთ გეიმში კი ბრეიკები ფიქსირდებოდა- ოსაკამ სამჯერ აიღო მეტოქის მოწოდება, სვიტოლინამ - ორჯერ და იაპონელმა სეტი 6:4 მოიგო.

მეორე სეტი ოსაკამ ზედიზედ სამი გეიმის აღებით დაიწყო, რის შემდეგაც, სვიტოლინამ სამედიცინო ტაიმ-აუტი მოითხოვა, თუმცა ამან უკრაინელს ვერ უშველა. იაპონელმა კიდევ ორი გეიმი აიღო და 5:0 გახადა ანგარიში. მხოლოდ ამის შემდეგ აიღო სვიტოლინამ სეტში ერთადერთი გეიმი.

6:4, 6:1 - ოსაკამ საათსა და 10 წუთში მოიგო. მის ანგარიშზე რვა ეისი, 31 „ვინერსი“ და ხუთი ბრეიკი იყო. სვიტოლინა მეოთხედ თამაშობდა „დიდი სლემის“ მეოთხედფინალში და ისევ ვერ გავიდა ნახევარფინალურ ეტაპზე.

ქალთა ტურნირზე ბოლო მეოთხედფინალში ტურნირის საუკეთესო მატჩი ჩაატარეს ჩეხმა კაროლინა პლიშკოვამ და ამერიკელმა სერენა უილიამსმა.
პირველ სეტში ევროპელი ჩოგბურთელი სრულ უპირატესობას ფლობდა - მან უნაკლოდ ითამაშა საკუთარ მოწოდებაზე და ერთი ბრეიკ-პოინტიც კი არ დაანება მეტოქეს, თავად კი ოთხი ასეთი შანსი მიიღო და ერთი ბრეიკი შეასრულა.

მეორე სეტის პირველი ნახევარიც პლიშკოვას უპირატესობით მიმდინარეობდა. მან კიდევ სამი ბრეიკ-პოინტი მოიპოვა, ბრეიკით წინ გასვლა შეძლო და ძალიან მიუახლოვდა ნახევარფინალს.

ამერიკელმა მოახლოებული საფრთხე იგრძნო და მალე მოახერხა უკუბრეიკის შესრულება, სეტის ბოლოს კი კიდევ ერთი ბრეიკი აიღო და პარტიებში ანგარიში გაათანაბრა.

სერენამ ფსიქოლოგიური უპირატესობა მოიპოვა და მისი შეჩერება შეუძლებელი ჩანდა. მსოფლიოს ყოფილი პირველი ჩოგანი 5:1 დაწინაურდა და მეშვიდე გეიმში პირველი მატჩბოლი მიიღო. სწორედ ამ მომენტში მეორედ მოხდა მატჩში გარდატეხა, ამჯერად, პლიშკოვას სასარგებლოდ. ჩეხმა მოიგერია ეს მატჩბოლი, ზედიზედ ოთხი გეიმი მოიგო და ანგარიში გაათანაბრა - 5:4.

მე-11 გეიმი მატჩის კულმინაცია გახდა. სერენამ სამი მატჩბოლის მოპოვება შეძლო. პლიშკოვა სამჯერვე გადარჩა და ზედიზედ მეხუთე გეიმის მოგებით 6:5 დაწინაურება მოახერხა. უილიამსი ამან ფსიქოლოგიურად გატეხა და მე-12 გეიმში საკუთარი მოწოდება წააგო, რითაც ნახევარფინალის საგზური აჩუქა პლიშკოვას - 4:6, 6:4, 5:7.

ყოველდღიური სპორტული გაზეთი "ლელო"
1307
მკითხველის კომენტარები / 0 /
მსგავსი ამბები
რუბრიკის სხვა სიახლეები
;