ავსტრალიის ღია. ქალებში მედისონ კისი ყველაზე დამაჯერებელია

ავსტრალიის ღია პირველობაზე ყველა მეოთხედფინალისტია ცნობილი ქალთა ტურნირზეც. ამ ეტაპის ბოლო საგზური ჩეხმა კაროლინა პლიშკოვამ მოიპოვა, რომელსაც 2 საათი და 43 წუთი დასჭირდა თანამემამულე ბარბორა სტრიკოვას დასამარცხებლად.

პლიშკოვა უფრო აგრესიულად თამაშობდა (42 `ვინერსი" 29-ის წინააღმდეგ), ფლობდა ინიციატივას, მაგრამ ბრეიკ-პოინტების რეალიზაცია არ უვარგოდა - 18-დან მხოლოდ ექვსი შანსი გამოიყენა.

თუმცა, გადამწყვეტ მომენტში შეძლო მეტოქის მოწოდებაზე წარმატებით თამაში - მესამე სეტი სტრიკოვას ბრეიკით დაიწყო, მაგრამ შემდეგ პლიშკოვამ სამი ბრეიკი გააკეთა და მოიგო - 6:7(5), 6:3, 6:2.

ჩეხის მეტოქე მეოთხედფინალში პირველი ჩოგანი სიმონა ჰალეპი იქნება, რომელმაც, როგორც იქნა, შეძლო იოლად მოგება. წინა წრეში ამერიკელ ლორენ დევისთან მესამე სეტის 15:13 მოგების შემდეგ, იაპონელი ოსაკას წინააღმდეგ, რუმინელს ჯამში არ დასჭირვებია ამდენი გეიმის ჩატარება - 6:3, 6:2. მეტოქეებს ბრეიკ-პოინტების თანაბარი რაოდენობა ჰქონდათ - შვიდი-შვიდი, მაგრამ ჰალეპმა ხუთი შანსი გამოიყენა, ოსაკამ - ერთი.

კიდევ ერთი მეოთხედფინალური წყვილი დააკომპლექტეს მედისონ კისმა და ანჟელიკ კერბერმა. კისი ფანტასტიკურ ფორმას აჩვენებს - ამერიკელმა ოთხი მატჩი ისე ჩაატარა, რომ სეტი არ წაუგია, მოგებულ პარტიებში ერთხელაც არ დასჭირვებია ტაი-ბრეიკი და ჯამში ჩატარებულ 8 სეტში მხოლოდ 19 გეიმი დათმო. ამჯერად, კისმა ტურნირის მერვე ნომერი კაროლინ გარსია საათსა და 10 წუთში დაამარცხა - 6:3, 6:2.

რაც შეეხება კერბერს, რომელიც მანამდე ასევე იოლად უგებდა თავის მეტოქეებს, მას დიდი წინააღმდეგობა შეხვდა ტაივანელი სუ-ვეი ჰსიესგან. გარბინ მუგურუსას მძლეველმა მოუგო პირველი სეტი გერმანელს და დიდი ბრძოლა გაუმართა მეორეში, სადაც, რამდენჯერმე ძალიან ახლოს იყო საბოლოო მოგებასთან,

მაგრამ კერბერმა ხასიათის სიმტკიცე გამოავლინა და 2 საათი და 11 წუთი ბრძოლის შემდეგ მოიპოვა მეოთხედფინალის საგზური - 4:6, 7:5, 6:2. კერბერს წელს ფანტასტიკური სტატისტიკა აქვს - 12 მატჩში 12 მოგება!

ყოველდღიური სპორტული გაზეთი "ლელო"
1127
მკითხველის კომენტარები / 0 /
მსგავსი ამბები
რუბრიკის სხვა სიახლეები
;