[განახლებული] სასაცილო პენალტი შახტარის კარში! რაჰიმ სტერლინგს უნდა რცხვენოდეს... [VIDEO]

"მანჩესტერ სიტი"-"შახტარის" მატჩში (6:0) გამოცდილმა უნგრელმა არბიტრმა შანდორ კასაიმ არარსებული პენალტი დანიშნა უკრაინული გუნდის კარში. 23-ე წუთზე რაჰიმ სტერლინგმა პატარა საცირკო ნომერი ჩაატარა და ისე მოწყვეტით დაეცა გაზონზე, შორიდან მაცქერალს ეგებ შეებრალა კიდეც.

სინამდვილეში, სიტუაცია ახლოსაც არ ყოფილა პენალტთან და "სიტის" შემტევმა ეს ყველაფერი გააფორმა, კასაიც არიფულად წამოეგო ანკესზე და საცოდავ "შახტარსაც" თითქოს ესღა აკლდა. ისე კი, იმ დროისთვის ანგარიში ჯერ კიდევ 1:0 იყო...

მატჩის შემდეგ სტერლინგმა ბოდიში მოიხადა "სპორტული აფერისტობისთვის", პეპ გვარდიოლასაც არ გასჭირვებია იმის აღიარება, რომ იმ სიტუაციაში პენალტის დანიშვნა არ შეიძლებოდა, ხოლო "შახტარის" მწვრთნელმა პაულო ფონსეკამ ეპიზოდს "სასაცილო" უწოდა.

ჩვენ კი დავძენთ, რომ ამ ეპიზოდმა კიდევ ერთხელ დაგვარწმუნა ვიდეორეფერის აუცილებლობაში. ტექნოლოგია, რომელიც თვით მსოფლიოს ჩემპიონატზეც გამოიყენეს, ძალიან სჭირდება ჩემპიონთა ლიგასაც. ლაპარაკია იმაზე, რომ VAR მომავალი სეზონიდან დაინერგება, ოღონდ, პლეი ოფის ეტაპიდან. თუმცა სიტუაცია გვიჩვენებს, რომ არ არის გამორიცხული საბედისწერო შეცდომები ჯგუფურ ეტაპზეც, რამაც ესა თუ ის გუნდი, შეიძლება, გვარიანად დააზარალოს.

306
მკითხველის კომენტარები / 0 /
მსგავსი ამბები
რუბრიკის სხვა სიახლეები