აი, ვინ არის ზაზა ფაჩულია: 8-მატჩიანი უქმობის მერე დაბრუნდა და 'დეტროიტს' მოაგებინა [VIDEO]

ზაზა ფაჩულიამ 2019 წელს პირველი მატჩი გამართა. იგი ფეხის ტრავმის გამო უქმობდა. 

ზაზას ფარეშე "დეტროიტ პისტონსმა" 8 შეხვედრიდან მხოლოდ ორი მოიგო. ქართველი ცენტრის დაბრუნებას კი მიჩიგანელთა გამარჯვება მოჰყვა. გგონიათ ეს შემთხვევითი დამთხვევაა?

ვინც თამაში პირდაპირ ეთერში იხილა, არ დასჭირდება ახსნა, რა როლი ითამაშა ფაჩულიამ "ორლანდოს" ძლევაში. ვისაც არ უნახავს, ერთ სტატისტიკურ მონაცემს შევთავაზებთ: მაშინ, როცა ფაჩულია მოედანზე იყო "დეტროიტი" 16 ქულით დაწინაურდა. ეს მაშინ, როცა შეხვედრა ოვერტაიმში "პისტონსმა" მხოლოდ 120:115 მოიგო.

პლუს-მინუსების გრაფაში თუ ზაზას +16 ეწერა, 30 ქულის ჩამგდებ ბლეიქ გრიფინს 0 ჰქონდა, ხოლო სასტარტო ცენტრ ანდრე დრამონდს -12. ზაზას შემდეგ, ვისი ყოფნისასაც ყველაზე მეტი სარგებელი მიიღო "დეტროიტმა", ბრაუნი იყო +11.

ფაჩულიამ მეორე და მესამე პერიოდებში სულ 15 წუთი ითამაშა. მესამე რაუნდის ბოლოს მისი დიდი მეცადინეობით "დეტროიტი" 90:84 დაწინაურდა, რის შემდეგაც ადგილი ანდრე დრამონდს დაუთმო... 90:84 - ეს ანგარიში, ალბათ გეცნობათ: სწორედ ასე გავიმარჯვეთ მონტენეგროში 2016 წელს. ის ხომ საქართველოს ნაკრების ერთ-ერთი საუკეთესო მატჩი იყო.

მეოთხე პერიოდში "ორლანდო" კვლავ დაეწია "პისტონსს" და ძირითადი დროის დასრულებამდე 32 წამით დრამონდს ორქულიანი რომ არ ჩაეგდო, მატჩს სტუმრები მოიგებდნენ. ანდრემ ანგარიში გაათანაბრა - 109:109, ხოლო ოვერტაიმში ბლეიქ გრიფინმა თავისი სიტყვა თქვა - 120:115.

ბლეიქის 30 ქულაზე უკვე მოგახსენეთ, დრამონდმა 14 ქულა და 22 მოხსნა მოაგროვა, ხოლო ფაჩულიას მონაგარი ასეთი იყო: 6 ქულა, 3 მოხსნა, 3 პასი. მან 3-დან 2 ორქულიანი, 2-დან 2 საჯარიმო ჩააგდო, ერთი სამქულიანი კი ააცილა.

მაინც რატომ ჰქონდა ჩვენიანს ყველაზე მეტი პლუსი? საქმე ის არის, რომ მის მოედანზე გამოჩენას დაცვაში სიტუაციის დალაგება მოსდევდა, ორლანდოელებს ქულების მოგროვება ისე აღარ უიოლდებოდათ, როგორც ზაზას არყოფნაში ყოფნისას...

საინტერესოა, რომ "ორმლანდოს" ბომბარდირი 24 ქულით ნიკოლა ვუჩევიჩი გახდა, სწორედ ის მონტენეგროელი, რომელიც 2016 წლის ზემოთნახსენებ მატჩში იღებდა მონაწილეობას.

"დეტროიტს" 19 მოგება, 24 წაგება აქვს და საპლეიოფო ზონის მიღმა, მე-9 ადგილზეა. მომდევნო მატჩს 19 იანვარს "მაიამი ჰიტთან" გამართავს.

2723
მკითხველის კომენტარები / 0 /
მსგავსი ამბები
რუბრიკის სხვა სიახლეები
;