[VIDEO] აი, რა გუნდია "გოლდენ სტეიტი" - "პორტლენდთან" წაგებული სასწაულებრივად მოიგო

"გოლდენ სტეიტმა" 15-ქულიანი ჩამორჩენის შემდეგ გამოსტაცა გამარჯვება "პორტლენდს" და დასავლეთი კონფერენციის ფინალში 2:0 დაწინაურდა.

პირველი ტაიმის შემდეგ, "პორტლენდის" უპირატესობა სოლიდური იყო - 65:50, მაგრამ, როგორც ხშირად ხდება, "გოლდენ სტეიტმა" მესამე მეოთხედი უმაღლეს დონეზე ჩაატარა და სტუმრების უპირატესობისგან აღარაფერი დარჩა. სტეფ კარიმ პირველი რვა ქულა აიღო ამ 12-წუთეულში, კლეი ტომპსონმა კი თავისი 24 ქულიდან 13 სწორედ მესამე მეოთხედში მოიპოვა.

მიუხედავად ამისა, მეოთხე მეოთხედში "პორტლენდი" მაინც ახლოს იყო მოგებასთან. მეოთხედის მეორე ნახევარში სტუმრებმა 7:0 გაქცევა მოაწყვეს და რვა ქულით დაწინაურდნენ. სტივ კერს ზედიზედ ორი წუთშესვენების აღება მოუწია იმისთვის, რომ დაელაგებინა თავისი გუნდის დაცვა. "გოლდენ სტეიტი" მალე დაეწია მეტოქეს, მაგრამ სირენამდე წუთით ადრე, სეტ კარიმ ურთულესი სამქულიანი ჩააგდო და "პორტლენდი" ისევ გავიდა წინ - 111:110.

მაგრამ ეს იყო ბოლო ქულები, რომელიც "პორტლენდმა" მატჩში აიღო, "უორიორზს" კი ორი კარგი შეტევა გამოუვიდა - დრეიმონდ გრინმა კევონ ლუნის ჩაატენინა, შემდეგ თავად ჩააგდო. ბოლო წამების გმირი კი ანდრე იგუოდალა გახდა, რომელმაც 114:111-ზე სამქულიანი არ ასროლინა დემიან ლილარდს.

სტეფ კარიმ 37 ქულა ჩააგდო. ეს მისი ზედიზედ მესამე 30-ქულიანი მატჩია. "გოლდენ სტეიტს" კი 35-დან 31 მატჩი აქვს მოგებული, როცა მისი ლიდერი მინიმუმ 30 ქულას აგდებს.

"გოლდენ სტეიტმა" ისევ კევინ დურანტის გარეშე ითამაშა. დიდი ალბათობით, ის არც მესამე და მეოთხე მატჩებში ითამაშებს, რომელიც პორტლენდში გაიმართება. მის დაბრუნებას ფინალური სერიისთვის ვარაუდობენ, თუ "უორიორზი" მოახერხებს იქ გასვლას.

დასავლეთი
გოლდენ სტეიტი-პორტლენდი 114:111
29:31, 21:34, 39:24, 25:22
გ-ს: სტეფ კარი (37+8 მოხსნა+8 პასი), ტომპსონი (24), გრინი (16+10 მოხსნა+7 პასი), იგუოდალა (4), ბოგუტი (0) - სასტარტო; ლუნი (14+7 მოხსნა), ბელი (11), ლივინგსტონი (3), მაკკინი (3), კუკი (2), ჟერებკო (0+7 მოხსნა), ჯონსი (0).
პ: ლილარდი (23+10 პასი), მაკოლუმი (22+ პასი), ჰარკლესი (12), ამინუ (9), კანტერი (4) - სასტარტო; სეტ კარი (16), ჰუდი (12), ლეონარდი (7+6 მოხსნა), ტერნერი (6), კოლინზი (0).
სერია: 2-0

2117
მკითხველის კომენტარები / 0 /
მსგავსი ამბები
რუბრიკის სხვა სიახლეები
;