აკადემიკი-დინამო 73:70 - 12 წამში სამიდან ერთი სამქულიანი რომ ჩაგვეგდო [VIDEO]

თბილისის "დინამომ" ფიბას თასის ჯგუფურ ეტაპზე პირველი მატჩი გამართა და ბულგარეთში "აკადემიკთან" 70:73 დამარცხდა.

ირაკლი ხოშტარიას გაწვრთნილი გუნდის მეტოქე ბულგარეთის ნაკრების წევრებით გაჯერებული და ამერიკელი კალათბურთელებით გაძლიერებული "აკადემიკი" იყო, რომელიც ფავორიტადაც ითვლებოდა. თუმცა, პირველ რიგში, დაცვაში მყარი თამაშით დინამოელებმა მეტოქეს დიდი სხვაობით დაწინაურების შანსი არ მისცეს, მეოთხე პერიოდში კი 13-ქულიანი ჩამორჩენა აღმოფხვრეს და გამარჯვებასთანაც ძალიან ახლოს იყვნენ...

თავად განსაჯეთ: საფინალო სირენამდე 12 წამით ადრე, როდესაც "აკადემიკი" 73:70-ს იგებდა, ბურთი გვერდითი ხაზიდან დინამოელებმა შემოიტანეს, ჯერ ბოიდმა ვერ გამოიყენა სამქულიანი, შემდეგ - გოგოძემ, ბოლოს - ფაცაციამ. ერთს მაინც რომ ჩაეგდო, მატჩი ოვერტაიმში გადავიდოდა, მაგრამ, როგორც მოგახსენეთ, ასე არ მოხდა და პირველ ტურში "აკადემიკმა" სამქულიანი სხვაობით გაიმარჯვა.

* * *

ეს იყო მატჩი, რომელსაც რამდენიმე შეკითხვაზე უნდა გაეცა პასუხი: რამდენად შორს ვართ ევროპასთან? რა არის საჭირო, რომ თუნდაც ფიბას თასზე ღირსეულად გამოვიდეთ? რისი იმედი უნდა გვქონდეს სამომავლოდ?

ირაკლი ხოშტარიასა და მამუკა ტურაშვილის გუნდმა ყველა შეკითხვას დადებითი პასუხი გასცა. შეიძლება ვინმემ გაიკვირვოს - გუნდმა წააგო, რა დადებითზეა ლაპარაკიო? წაგებას ხომ გააჩნია? - როდესაც ევროტურნირებში გამოცდილ მეტოქეს სტუმრად ტოლ-სწორად ეთამაშები და მატჩის ბედს ერთი სამქულიანი წყვეტს, როგორ შეიძლება გუნდის თამაშის უარყოფითად შეფასება?!

რა თქმა უნდა, მწვრთნელს არ ექნება კმაყოფილების საფუძველი, ასეც უნდა იყოს - მან, პირველ რიგში, უარყოფითი მხარეები უნდა ეძებოს, რომ სამომავლოდ პლუსებად აქციოს.

* * *

პირველი შეკითხვა: რამდენად შორს ვართ ევროპასთან?

აკადემიკი
73
დინამო
70


21:16, 13:12, 23:18, 16:24
18 ოქტომბერი, სოფია
აკადემიკი: რაფა (7ქ, 4პ), სტოიანოვი, ავრამოვი (12ქ, 5პ), ველიკოვი (5პ), ნიკოლოვი (7ქ), პეპერი (14ქ), ივანოვი (6ქ), კნოქსი (15ქ), კლენტონი (8ქ, 12მ, 3პ), დიმიტროვი (4ქ).
დინამო: შარაბიძე (2ქ), ცრნიჩი (3ქ), ბოიდი (21ქ, 3პ), გრძელიძე, ლონდარიძე (2ქ), ტურპინი (7ქ, 9მ, 3პ), ფაცაცია (20ქ, 3პ), გაჩეშა (8ქ, 8მ), გოგოძე (7ქ).
მსაჯები: ხ. კარაკაცუნისი (საბერძნეთი), ა. პერჩიავალე (იტალია).

 "აკადემიკი", შესაძლოა, ევროლიგის დონის გუნდი არ არის, მაგრამ ბულგარეთის ჩემპიონია და რეგულარულად მონაწილეობს ევროპის საკლუბო ტურნირებში. შესაბამისად, ადგილობრივი კალათბურთელებიც მაღალი ხარისხისა ჰყავს და ამერიკელებიც. გასულ სეზონში ფიბას თასზე აკადემიკოსებმა ჯგუფური ეტაპის ბარიერი გადალახეს და პლეი ოფში ითამაშეს.

"დინამოს" ამ გუნდთან სტუმრად გამარჯვების შანსი ბოლო წამებამდე ჰქონდა. მეტსაც გეტყვით - ეს "დინამოს" პირველი მატჩი რომ არ ყოფილიყო ჯგუფურ ეტაპზე, თავიდანვე გაცილებით თავდაჯერებულად გამოვიდოდა და მხოლოდ ბოლო წუთებში არ გაიაზრებდა, რომ "აკადემიკის" მისსავე მოედანზე დამარცხება შეუსრულებელი ამოცანა არ იყო.

ასე რომ, ზემოთ დასმულ შეკითხვას ასე უნდა ვუპასუხოთ: ევროპისგან შორს ნამდვილად არ ვართ, მთავარია გუნდის შემადგენლობის სწორად შერჩევა და გააზრებული ტაქტიკა.

* * *

შეკითხვა მეორე: რა არის საჭირო, თუნდაც ფიბას თასზე ღირსეულად გამოსასვლელად?

თამაშს ვინც უყურა, პასუხი მზად ექნება: შეთამაშება, სწორი ტაქტიკა და კარგი დაცვა. "დინამომ" გასული სეზონის შემდეგ ძირითადი ბირთვი შეინარჩუნა, მხოლოდ ოთხი უცხოელი დაიმატა, რომლებმაც მეტ-ნაკლებად კარგად აუღეს ალღო ირაკლი ხოშტარიას ტაქტიკას.

"დინამოს" საქართველოს ჩემპიონატში შეტევაში ბევრი რამ კარგად გამოსდის, მრავალსვლიან კომბინაციებს შედეგი მოაქვს, ბულგარეთში კი საქართველოს ჩემპიონის შეტევას ნამდვილად ვერ ვუწოდებთ კარგს. სამაგიეროდ, დაცვა იყო იმდენად ხარისხიანი, "აკადემიკზე" უკეთეს გუნდსაც გაუჭირდებოდა ფარამდე მიღწევა.

სწორედ კარგმა დაცვამ მისცა "დინამოს" გამარჯვების შანსი, რომელიც შეტევამ სათანადოდ ვერ გამოიყენა...

* * *

შეკითხვა მესამე: რისი იმედი უნდა გვქონდეს სამომავლოდ?

ზუსტი პასუხის გაცემა ნოსტრადამუსის პრეროგატივაა, თუმცა ჯგუფური ეტაპის პირველი მატჩის მიხედვით ჩვენც შეგვიძლია გარკვეული პროგნოზის გაკეთება: მომდევნო შეხვედრებს "დინამო" გაცილებით თამამად ჩაატარებს, კიდევ უფრო დახვეწს დაცვას და ნამდვილად შეიძლება ჯგუფიდან გასვლაზე ფიქრი.

ყოველ შემთხვევაში, თბილისში, "დინამოს" საქომაგოდ მისული მაყურებელი დარბაზიდან იმედგაცრუებული არ გაბრუნდება, რაც მთავარია - ბრძოლას იხილავს.

* * *

ამავე ჯგუფის მეორე მატჩში რუმინეთის "კლუჟმა" თურქეთის "ისტანბულს" 90:69 სძლია. 25 ოქტომბერს "დინამო" "კლუჟს" უმასპინძლებს.

ყოველდღიური სპორტული გაზეთი "ლელო"

1844
მკითხველის კომენტარები / 0 /
მსგავსი ამბები
რუბრიკის სხვა სიახლეები
;