[აკრობატიკა] მედლამდე 0.6 ქულა დააკლდათ

ისრაელის ქალაქ ჰოლონში დამთავრდა აკრობატთა ევროპის ჩემპიონატი როგორც უფროსებში, ისე ახალგაზრდებსა და მოზარდებს შორის. შეჯიბრებაში 28 ქვეყნის უძლიერესი სპორტსმენები მონაწილეობდნენ. საპრიზო ადგილებისთვის მებრძოლთა შორის ქართველებიც იყვნენ, რომლებიც საკვალიფიკაციო პაექრობების შემდეგ ოთხ დისციპლინაში ფინალისტთა შორის მოხვდნენ. 

  დიდი ხნის პაუზის შემდეგ უფროსთა ევროპის ჩემპიონატზე პირველად მონაწილეობდა საბა ზაზაძისა და თამარ ქუთათელაძის შერეული წყვილი (მწვრთნელები - ნინო ბერიანიძე, ვიქტორია ლებედევა), რომელმაც დასკვნით ეტაპზე გამოსვლის უფლება მოიპოვა და მრავალჭიდში მე-8 შედეგი (74.040 ქულა) აჩვენა, ხოლო დინამიურ ვარჯიშში კი მე-7 ადგილზე (26.350) გავიდა.

ევროპის ჩემპიონატზე 18-წლამდელთა ასაკობრივ ჯგუფში  წარმატებით იასპარეზა გიორგი ოქროპირიძის, გიორგი ჩანადირის, გიორგი ხმალაძის და საბა მარიდაშვილის ვაჟთა ოთხეულმა (მწვრთნელები - სვეტა ფეიქრიშვილი, ვიქტორია ლებედევა, თენგიზ ცხვარიაშვილი), რომელსაც საპრიზო ადგილზე გასვლის რეალური შანსი ჰქონდა,  მაგრამ არაობიექტურმა მსაჯობამ ქართველებს საბოლოოდ 25.150 ქულით მე-4 ამყოფინა. ჩვენები ბრინჯაოს პრიზიორ გერმანელებს 0.6 ქულით ჩამორჩნენ. 

16-წლამდელებში წარმატებას მიაღწია ლაშა ღიბრაძისა და ლანა წურწუმიას შერეულმა დუეტმა (დალი ფეიქრიშვილი, რამაზ ბუზიაშვილი, გია მარმარაშვილი), რომელმაც ფინალურ ეტაპზე იასპარეზა და საბოოლოდ 26.600 ქულით მე-5ადგილი  დაიკავა.

16-წლამდელ ვაჟთა წყვილებში ფინალისტთა შორის იყვნენ ბექა დიდბერიძე და გიორგი ჭიღლაძე  (მწვრთნელები - ბუზიაშვილი, დალი ფეიქრიშვილი), რომლებიც საბოლოოდ 25.900 ქულით მე-6 ადგილს დასჯერდნენ. 

ამავე ასაკში საკუთარი შესაძლებლობები კარგად წარმოაჩინეს ნაკრების დებიუტანტებმა -  ქრისტინე სულაკაძემ და აკაკი მუნჯიშვილმა. შერეულ წყვილში (მწვრთნელი მარიამ გიგოლაშვილი) ეს მათთვის პირველი სერიოზული ტურნირი იყო და 51.800 საკვალიფიკაციო ქულით საბოლოოდ მე-10 შედეგი აჩვენეს.

ჰოლონის ევროპის ჩემპიონატზე ძალები მოსინჯეს, ასევე, გოგონათა სამეულებმა (მარიამ ფერაძე. სალომე მაისურაძე, მარიამ გორდაძე, მე-19 ადგილი; თინა მანაგაძე,   ინა კუხიანიძე, ანანო ლაღაძე, 29-ე ადგილი), შერეულმა   წყვილმა (ნიკოლოზ კოდალაშვილი, მარიამ წიკლაური, მე-18 ადგილი); ახალგაზრდებში გოგონათა სამეულმა (მარიამ მღებრიშვილი, ნინო ბაიდაური, ლიზი ომიაძე, მე-15 ადგილი).

- ევროპის წლევანდელი ჩემპიონატის შედეგებით კმაყოფილი ვარ, - გვითხრა საქართველოს ტანვარჯიშის სახეობათა ეროვნული ფედერაციის ვიცე პრეზიდენტმა ინგა გიორგობიანმა. - 2017 წელს მსგავს შეჯიბრებაში უფროსთა შორის მონაწილე არც გვყოლია, წლეულს კი ჩვენმა დუეტმა ფინალში იასპარეზა. რომ არა არბიტრთა მიკერძოებული მსაჯობა, ჩვენს  თვრამეტწლამდელთა ოთხეულს ბრინჯაოს მედლის მოპოვება შეეძლო. თანაც ფინალურ ეტაპზე ოთხ დისციპლინაში ვიასპარეზეთ. როგორც ხედავთ, წინსვლა არის. მეტი თანადგომა თუ იქნება, წარმატებებს ვამრავლებთ, რადგან ნიჭიერი თაობა გვეზრდება, ოღონდ მათ საერთაშორისო ტურნირებში გამოსვლის გამოცდილება სჭირდებათ. გაისად მაისში შვეიცარია მსოფლიოს ჩემპიონატს უმასპინძლებს. ვეცდებით, შედეგები იქაც გავაუმჯობესოთ.

84
მკითხველის კომენტარები / 0 /
მსგავსი ამბები
რუბრიკის სხვა სიახლეები
;