ალანების პრიზი - პეტრიაშვილს

ვლადიკავკაზში ამ უქმეებზე ჩატარებული საერთაშორისო ტურნირი "ალანები" გუშინ ქართული ტრიუმფით დასრულდა: მძიმე წონაში გორელმა გენო პეტრიაშვილმა გაიმარჯვა, ვისაც გადაეცა მთავარი პრიზი, ხოლო ჩვენი ნაკრების მთავარი მწვრთნელი გიორგი იანტბელიძე საგანგებო პრიზით დაჯილდოვდა.

პეტრიაშვილმა მთავარი პრიზი კი წაართვა მასპინძლებს, მაგრამ მას ფინალში ოსებმა ჩინებული დახვედრა მოუწყვეს და "მრავალჟამიერის" ფონზე გამოიყვანეს საჭიდაოდ, ხოლო ახლო წარსულის ოსთა სახელოვანმა ვეტერანმა, ოლიმპიურმა, მსოფლიოსა და ევროპის მრავალგზის ჩემპიონმა ჰაჯიმურატ გაცალოვმა რეპორტაჟისას თბილად და რაც მთავარია, ობიექტურად ისაუბრა მასზე, როგორც ძლიერ ფალავანზე. სამაგიეროდ, მისმა თანაწამყვანმა ჩვეულებას არ უღალატა და ჩვენი რამდენიმე ცნობილი მოჭიდავე ოს ფალავნებად მოიხსენია!

ვლადიკავკაზში გამოსვლა ჩვენმა ნაკრებმა 3 მედლით დაასრულა: 1 ოქრო და 2 ვერცხლი. ვერცხლის მედლებს ქუთაისელი ბექა ლომთაძე (61) და ამბროლაურელი ავთანდილ კენჭაძე (74) დასჯერდნენ. თუმცა თამამად შეიძლება ითქვას, რომ კენჭაძე მსაჯებმა დააჯერეს. ბრინჯაოსთვის იჭიდავა თბილისელმა ირაკლი მწითურმაც (92), თუმცა საბოლოოდ უმედლოდ დარჩა, მეხუთეზე გავიდა.

მსოფლიოს ორგზის ჩემპიონმა პეტრიაშვილმა თავიდან რუსებს მოუგო, თუმცა პირველ შეხვედრაში ოსტაპ პასენოკთან თუ 5:0 მოიგო, მასპინძელ ვიტალი გაგლოევს 12:4 სძლია. ნახევარფინალში პირველივე პერიოდში წმინდად, 10:0 დაამარცხა ამერიკელი რობერტ ნელსონი.

პეტრიაშვილს ფინალშიც სულ ცოტა დააკლდა წმინდა მოგებამდე ირანელ ჯაბერ ტაგი სადეგზადესთან, ვისაც ისევ ფეხში შესვლებით და წრიდან გაყვანა-დაბლა ჩაყვანებით 10:1 აჯობა.

ლომთაძემ ფინალამდე რუსებს მოუგო: ნურგუნ ალექსანდროვს 4:0 აჯობა, მაგომედრასულ იდრისოვს 6:4 მოუგო, ნახევარფინალში ალექსანდრ ბოგომაევი 7:7-ზე დაამარცხა, ფინალში კი რუსთა დაღესტნელ რამაზან ფერზალიევთან წააგო.

ამ პაექრობებიდან აღსანიშნავია ბოგომაევთან გამარჯვება, ვისაც რევანში აუღო ევროპული თამაშების ფინალში მარცხისთვის. საგულისხმოა, რომ ჩვენებურს ორჯერ ჩაურთეს პასიურობისთვის 30-წამიანი, მაგრამ ორივეჯერ მედგრად შეუტია და აუღო ქულები.

ჩვენებურმა ფინალშიც იბრძოლა ფერზალიევთან, თუმცა თავდაპირველად დაკარგული ქულები ძვირად დაუჯდა და ბოლოს გააქტიურებამ ვეღარ უშველა. ზოგადად, მისთვის პრობლემად კვლავ რჩება ძალების სწორად განაწილება და ტაქტიკურად გამართული ჭიდაობა: ალბათ, ბოლოს გააქტიურებას აჯობებს, თავიდანვე შეუტიოს, თუმცა მერე მისი გამოცდილების კაცმა ანგარიშის შენარჩუნებაც უფრო წარმატებით უნდა შეძლოს.

წინასწარ შეხვედრებში მსოფლიოს ვიცე-ჩემპიონმა კენჭაძემაც რუსებს მოუგო, ოღონდ მან ოთხი მეტოქე დაამარცხა: აჰმედ შოკუმოვთან 4:0 იმარჯვა, კახაბერ ხუბეჟტის წმინდად, 11:0, მაგომედ დიბიგრაჯიევს - 4:2, ხოლო ნახევარფინალში მაგომედხაბიბ კადიმაგომედოვს - 7:3 სძლია. ამ პაექრობებიდან უთუოდ აღსანიშნავია ხუბეჟტისთან გამარჯვება - საქართველოდან წასული ოსი არაა ტიტულებით დახუნძლული, მაგრამ მაინც ერთ-ერთ ლიდერად მიიჩნეოდა ამ წონაში, მასთან წმინდა გამარჯვება კი კენჭაძის მაღალ კლასზე მიანიშნებს. ასევე გამორჩეული გახდა კადიმაგომედოვთან შეხვედრაც, ოღონდ უფრო მეტოქის არასპორტული საქციელის გამო - შეხვედრის ბოლოს ხელის ჩამორთმევა არ უნდოდა, ვიდრე მსაჯმა არ მისცა შენიშვნა.

ფინალში კენჭაძე მასპინძელთა ფალავანს - ტიმურ ბიჟოევს შეხვდა, ვისაც ნოემბერში 23-წლიანთა მსოფლიოს ჩემპიონატის ნახევარფინალში დამაჯერებლად მოუგო. ვერ ვიტყვით, რომ ოსმა იმ წაგებიდან უფრო მეტი ისწავლა; ფაქტია ისიც, რომ ჩვენებური ცოტა გადაიღალა კიდეც იქ გამარჯვების შემდეგ - ოქტომბერში ხომ უფროსებში იჭიდავა მსოფლიოს ფინალი, 23-იანებში გამარჯვებას კი გაუთავებელი მიღება-სერობები მოჰყვა და იანტბელიძე ახლა მის დასვენებასაც კი აპირებდა. თუმცა ამ შეხვედრაზე მსაჯებმაც მოახდინეს გვარიანი გავლენა და საბოლოოდ ბიჟოევს 2:1 მოაგებინეს. ზოგადად, "ალანებზე" ცუდი მსაჯობა - ეს ტრადიციაა.

მწითურმა ბრინჯაოსთვის პაექრობა დაღესტნელ ალიხან ჯაბრაილოვთან 0:6 დათმო, მანამ კი მეოთხედფინალიც წააგო ისევ დაღესტნელ მაგომედ ყურბანოვთან: 1:5. ჩვენებურმა იქამდე ამერიკელ ჰაიდენ ცილმერს 21 აჯობა, ხოლო დამამშვიდებელში ყაბარდო-ბალყარეთის წარმომადგენელ აზამატ ზაკუევს 7:4 სძლია. ამავე წონაში ევროპის ორგზის ჩემპიონი, მსოფლიოსა და ოლიმპიური პრიზიორი დავით მარსაგიშვილიც გამოდიოდა, მაგრამ პირველივე პაექრობა დათმო აზერბაიჯანელ შარიფ შარიდოვთან: 3:7.

"ალანებს" ტრავმის გამო გამოეთიშა ოლიმპიური და მსოფლიოს ჩემპიონი, ევროპის სამგზის გამარჯვებული ვლადიმერ ხინჩეგაშვილი (65). მან 1/16-ფინალში ტუვინ საიინ კაზირიკს 6:1 მოუგო, მაგრამ მერე მეორე ტუვინთან - ნაჩინ კუულართან დაშავდა და პაექრობა ვეღარ ჩაამთავრა, თუმცა მაშინ 6:12 აგებდა.

ყოველდღიური სპორტული გაზეთი "ლელო"
1039
მკითხველის კომენტარები / 0 /
მსგავსი ამბები
რუბრიკის სხვა სიახლეები
;