ალეგრი 'ატლეტიკოს' შემდეგ მიდის? - 'იუვენტუსმა' გვარდიოლასთან მოლაპარაკებები გამართა

იტალიური გაზეთი “კორიერე დელო სპორტი” (Corriere dello Sport) წერს, რომ ტურინის “იუვენტუსის” მთავარი მწვრთნელი მასიმილიანო ალეგრი კლუბის პრეზიდენტ ანდრეა ანიელის შეხვდება “ატლეტიკოსთან” ჩემპიონთა ლიგის განმეორებითი მერვედფინალის შემდეგ. ეს ინფორმაცია “იუვენტუსის” სპორტულმა დირექტორმა ფაბიო პარატიჩიმ გაავრცელა.

“მწვრთნელის მომავალი დამოკიდებულია არა მხოლოდ ჩემპიონთა ლიგის შედეგებზე, არამედ, ასევე მთლიანად პროექტის განვითარებაზე. “ატლეტიკოსთან” მატჩის შემდეგ, მე და ანიელი ვიფიქრებთ, როგორ მოვიქცეთ”, - განაცხადა პარატიჩიმ.

ასევე Corriere dello Sport აღნიშნავს, რომ ალეგრი, შესაძლოა, არ დაელოდოს ხელმძღვანელობის გადაწყვეტილებას და თავისი ნებით გადადგეს.

ჩემპიონთა ლიგის მერვედფინალის პირველ მატჩში “იუვენტუსმა” სტუმრად 0:2 წააგო “ატლეტიკოსთან”. განმეორებითი მატჩი 12 მარტს, ტურინში გაიმართება.
ამასობაში, “იუვენტუსის” წარმომადგენლებმა ორი შეხვედრა გამართეს “მანჩესტერ სიტის” მთავარი მწვრთნელის ხოსეპ გვარდიოლას აგენტთან, - წერს ინტერნეტგამოცემა Sport.es.

“ბიანკონერი” აპირებს 48 წლის ესპანელი სპეციალისტის მიწვევას, მიუხედავად იმისა, რომ მას ინგლისურ კლუბთან 2021 წლის ზაფხულამდე აქვს კონტრაქტი, ხოლო ხელფასი წელიწადში 23 მილიონს შეადგენს.

პრესის ინფორმაციით, კიდევ ერთი კანდიდატია “რეალის” ყოფილი მთავარი მწვრთნელი ზინედინ ზიდანი.

ყოველდღიური სპორტული გაზეთი "ლელო"
691
მკითხველის კომენტარები / 0 /
მსგავსი ამბები
რუბრიკის სხვა სიახლეები
;