ალექსანდრე ბითაძე: საინტერესო სეზონი გველის

ამას წინათ მინსკში დამთავრდა 19-წლამდელ წყალბურთელ ვაჟთა ევროპის ჩემპიონატი.

ტურნირზე დელეგატად იყო მიწვეული საქართველოს საწყლოსნო სახეობათა ეროვნული ფედერაციის ვიცე პრეზიდენტი, ევროპის საწყლოსნო ფედერაციის წყალბურთის ტექნიკური კომიტეტის წევრი ალექსანდრე ბითაძე.

საქართველოს და საბჭოთა კავშირის წყალბურთელთა ნაკრები გუნდების ყოფილ მოთამაშეს მინსკში გამართულ ბატალიებზე შთაბეჭდილებების გაზიარება ვთხოვეთ.

- ევროპის ჩემპიონატის ფინალურ ეტაპზე შესანიშნავად მომზადებულმა გუნდებმა იასპარეზეს, - გვითხრა მან. - განსაკუთრებით ეს შეეხება პირველ რვა ადგილზე გასულთ. განსაკუთრებული მოწონება საბერძნეთის ნაკრებმა დაიმსახურა. ეს არ არის შემთხვევითი: ელინელები წყალბურთის განვითარებას დიდ ყურადღებას აქცევენ. დასტურად ისიც გამოდგება, რომ წლეულს ქვეყნის ჩემპიონმა "ოლიმპიაკოსმა" ჩემპიონთა ლიგა მოიგო - ფინალში იტალიის "პრო რეკო" დაამარცხა 9:7.

- ახალგაზრდა ბერძენი წყალბურთელებისგან ჩემპიონობას თუ ელოდნენ?

- საბერძნეთის გუნდს ყველა ფავორიტად მიიჩნევდა. საქმე ის არის, რომ ეს ნაკრები წლეულს 20-წლამდელთა შორის მსოფლიოს ჩემპიონიც გახდა. ევროპისთვის მხოლოდ რამდენიმე მოთამაშე შეცვალეს. ელინელებმა ნახევარფინალში ხორვატებს 8:0 სძლიეს, ფინალში კი მონტენეგრო 14:12 დაამარცხეს.

- საქართველოს ნაკრების თამაშზე რას იტყვით?

- მოგეხსენებათ, ჩვენებმა ჩემპიონატზე მხოლოდ ერთი მატჩი მოიგეს სლოვენებთან და საბოლოოდ მე-14 ადგილზე გავიდნენ. მართალი გითხრათ, მეტს მოველოდი, მით უმეტეს, რომ ბოლო ორ ჩემპიონატში ჰოლანდიასა და მალტაზე საქართველოს 19-წლამდელებმა მეათე ადგილები დაიკავეს. ამჯერადაც შეიძლებოდა უკეთ თამაში და ჯგუფში საფრანგეთის დამარცხება, მაგრამ იმ მატჩში, როგორც დაცვაში, ისე თავდასხმაში უამრავი შეცდომა დაუშვეს. ალბათ, ბოლო პაექრობა ბელარუსთანაც არ უნდა წაგვეგო, მაგრამ საკუთარი კედლების ფაქტორმა დიდი როლი ითამაშა.

- სამწლიანი შესვენების შემდეგ ქართველი წყალბურთელები ათიოდ დღეში ევროპის საკლუბო ტურნირში ჩაებმებიან...

- დიახ, დედაქალაქის "თბილისი", რევაზ ჩომახიძის ხელმძღვანელობით, 13 სექტემბრიდან ჩემპიონთა ლიგის პირველ საკვალიფიკაციო რაუნდში მოსინჯავს ძალებს. ჯგუფური ტურნირი რუმინულ ბრაშოვში გაიმართება, სადაც უპირობო ფავორიტია იტალიის "სპორტმენეჯმენტი".

"თბილისი" მას 13 სექტემბერს დაუპირისპირდება. დანარჩენი ხუთი გუნდი თანაბარი ძალისაა, ამიტომ კონკურენტებთან ტოლ-სწორად თამაში შეიძლება. მეორე ეტაპზე ოთხი გუნდი გადის. 14 სექტემბერს ქართველ წყალბურთელებს ორი მატჩი ელით - დილით ლვოვის "დინამოსთან", საღამოს კი თურქეთის "ენკა-სთან", 15-ში ბრაშოვის "კორონასა" და 16-ში საფრანგეთის გუნდთან. ამ ორთაბრძოლებისთვის "თბილისი" ინტენსიურად ემზადება.

- ევროპის თასის გათამაშებაზე საქართველოს მეტოქეთა ვინაობა როდის გაირკვევა?

- ვერ გეტყვით, შესაძლოა, ათ-თხუთმეტ დღეში. ჯერ კიდევ შეჯიბრების ჩატარების ფორმატი არ არის ბოლომდე შეჯერებული. კარგია, რომ "თბილისი" საკლუბო ჩემპიონატში ებმება, რადგან მის შემადგენლობაში, უმთავრესად, საქართველოს ნაკრების წყალბურთელები გამოდიან და ევროპის თასისთვის კარგ სათამაშო პრაქტიკას მიიღებენ. საინტერესო სეზონი გველის.

- თქვენს ვაჟზეც მინდა გკითხოთ - ანდრია ბითაძემ რომის "ვის ნოვა" დატოვა და ახალ სეზონში სერბულ "ცრვენა ზვეზდაში" ითამაშებს. არჩევანს უწონებთ?

- სწორი გადაწყვეტილება მიიღო: "ცრვენა ზვეზდა" ევროპაში ერთ-ერთი ტიტულოვანი გუნდია, რომელსაც სათავეში უდგას 2017 წლის მსოფლიოს საუკეთესო მწვრთნელი დეიან პავიჩი. მისი თავკაცობით სერბეთის ნაკრებმა თითოჯერ ოლიმპიური თამაშები და მსოფლიოს ჩემპიონატი, ხოლო ორჯერ ევროპის ჩემპიონატი მოიგო.

დარწმუნებული ვარ, რომ დეიანის ხელმძღვანელობით ანდრო ბევრს ისწავლის და საგრძნობლად გაიზრდება, როგორც მოთამაშე, მით უმეტეს, რომ წლეულს ბელგრადელები ერთდროულად სამ ტურნირში მიიღებენ მონაწილეობას - ჩემპიონთა ლიგაში, ადრიატიკის ჩემპიონატსა და სერბეთის სუპერლიგაში. იქ მიღებული გამოცდილება ანდროს ეროვნულ ნაკრებში გამოადგება.

ყოველდღიური სპორტული გაზეთი "ლელო"
728
მკითხველის კომენტარები / 1 /
მიტროფანე
0
? ? ? ......?
მსგავსი ამბები
რუბრიკის სხვა სიახლეები
;