ალექსანდრ შტელინი: გამოსავალზე ლაპარაკი მიჭირს

29 ოქტომბერს ფოთის "კოლხეთი" თბილისში "ლოკომოტივს" ესტუმრება. ზღვისპირელებისთვის ეს ეროვნულ ლიგაში დარჩენის ერთ-ერთ ბოლო მცდელობა იქნება.

სეზონის დასრულებამდე 5 ტურით ადრე, "კოლხეთს" მხოლოდ 20 ქულა აქვს და ერთ დროს "შუქურასთან" 14-ქულიანი უპირატესობაც შაგრენის ტყავივით 4 ქულამდე შეუმცირდა. ეს კი 23 ოქტომბერს, წინა ტურში მომხდარის შედეგია, როცა სტადიონის მოუმზადებლობის გამო ფოთის "კოლხეთსა" და ქობულეთის "შუქურას" შორის დანიშნული მატჩი ჩაიშალა. შედეგად, ფეხბურთის ფედერაციის სადისციპლინო და საფეხბურთო დავების განმხილველი კომიტეტის საგანგებო სხდომაზე "კოლხეთს" წაგება (0:3) ჩაეთვალა და 2500 ლარით დაჯარიმდა.

გუნდის მთავარი მწვრთნელი ალექსანდრ შტელინი არ მალავს, რომ თბილისურ შეხვედრამდე "კოლხეთი" უმძიმეს მდგომარეობაშია. ის "ლელოს" ჩაშლილ მატჩზეც ელაპარაკა:

"ქობულეთელებთან მატჩისთვის სერიოზულად ვემზადებოდით. მეტოქე შევისწავლეთ და კონკრეტული სათამაშო სტრატეგია შევიმუშავეთ, "შუქურას" სისუსტეები რომ გამოგვეყენებინა. მაგრამ მოედანზე მოსათელად გასულებს გვითხრეს, რომ თამაში ბალახის საფარის მოუმზადებლობის გამო არ გაიმართებოდა.

მერე შევიტყვეთ სადისციპლინო კომიტეტის გადაწყვეტილება, რომელიც ჩვენთვის დიდი დარტყმა იყო...

მაგრამ მე მწვრთნელი ვარ და ამ საკითხების განხილვა და შეფასება ჩემი საქმე არ არის. ახლა "ლოკომოტივთან" მატჩისთვის ვემზადებით, რადგან ეს ერთ-ერთი ბოლო შანსია, სატურნირო მდგომარეობა რომ გამოვასწოროთ. იმის თქმა, რომ ვითარება რთულია, ნიშნავს, საერთოდ არაფერი ვთქვა. სამწუხაროდ, "კოლხეთს" ძალიან უჭირს და გამოსავალიც არ ვიცი, სად არის", - ამბობს შტელინი.

ფოთელთა მთავარი მწვრთნელის თქმით, გუნდს ბევრი ტრავმირებული ჰყავს:

"ახლა თამაშისთვის მხოლოდ 14 მოთამაშე და 2 მეკარე ემზადება, რადგანს სერიოზული საკადრო პრობლემები გვაქვს. შოთა კერძევაძეს კუნთი დაეჭიმა და არ ვიცით, როდის დაგვიბრუნდება. არ ვიცი ისიც, დაგვეხმარება თუ არა ერიკ უმა ოტიენო. მათ გარდა, ტრავმირებულები არიან კოკაია და რამდენიმე ახალგაზრდა. ამის მიზეზი ის იყო, რომ სასურველი დატვირთვები არ ჰქონდათ".

შტელინი გველაპარაკა კენიელ მცველზეც, რომელიც, თურმე, სანაკრებო მატჩების შემდეგ საქართველოში არ დაბრუნებულა:

"ერიკ უმა ოტიენო კენიის ნაკრებში 5 და 8 ოქტომბერს გასამართი ამხანაგური მატჩებისთვის მიიწვიეს. ჩვენი მარცხენა მცველის ნაკრებში გამოძახება "კოლხეთისთვის" კარგი ფაქტი იყო, მაგრამ, მეორე მხრივ, მას პრობლემა ჰქონდა. ოტიენომ ტრავმა მიიღო და ნორმალურად მორჩენილი არ ჰქონდა, ისე ითამაშა და გაუმიზეზდა.

10 დღის განმავლობაში დიაგნოზი ვერ დაუსვეს. მერე ქუთაისში ჩავიდა და იქაც გაურკვეველი პასუხი მიიღო - კუნთი გაუწყდა ან დაეჭიმა. წავიდა კენიაში და იქ იმკურნალა. მას პარასკევისთვის ველოდებით, მაგრამ არ ვიცით, შეძლებს თუ არა ვარჯიშს და დაგვეხმარება თუ არა "ლოკომოტივთან" უმნიშვნელოვანეს შეხვედრაში".

შტელინს ორი კვირის წინანდელზეც ვკითხეთ, როცა "კოლხეთიდან" წასვლა სურდა, მაგრამ დაბრუნება სთხოვეს. უკრაინელმა სპეციალისტმა კონკრეტულ მიზეზებზე ლაპარაკი არ ისურვა:

"დასამალი არაფერი მაქვს. ამ ნაბიჯის გადადგმა არსებული პრობლემების გამო მსურდა. მაგრამ კვირას მნიშვნელოვანი თამაშის გველის და ახლა ამაზე ლაპარაკის დრო არ არის".

ყოველდღიური სპორტული გაზეთი "ლელო"
1214
მკითხველის კომენტარები / 0 /
მსგავსი ამბები
რუბრიკის სხვა სიახლეები
;