'ამას ვერ მოერევი'... ზურაბ პეტრიაშვილი ისევ ქართული ფეხბურთის სამსახურშია!

ქართული ფეხბურთის გამოყოფის იდეის ერთ-ერთი მთავარი სულის ჩამდგმელი ზურაბ პეტრიაშვილი ახალგაზრდობაში საკმაოდ კარგი ფეხბურთელი იყო და სსრკ-ის ახალგაზრდული ნაკრების ფორმაც არაერთხელ მოურგია.

მასზე საბჭოეთში დიდ იმედებს ამყარებდნენ, მაგრამ... ტრავმამ ფეხბურთის თამაში აუკრძალა, ფეხბურთის სიყვარულს კი ვერ მოერია: აგერ, 68 წლისა მოიყარა და ისევ ავარჯიშებს ბავშვებს!..

ბატონი ზურაბი ლილოს დასახლებაში 50-დე პატარა ფეხბურთელს სრულიად უსასყიდლოდ უზიარებს გამოცდილებას და შედეგებიც აქვს: ელიტლიგაში მეორე ადგილზე გავიდა 2001-წლიანებში - “ავაზას”, თბილისის “დინამოსა” და “საბურათლოსთან” ჭიდილში! თბილისის ლიგაშიც 2007-08-იანებში სამეულში არიან!
მისი აღზრდილი სამი ფეხბურთელი - ვალერი ქელდიშვილი, ლუკა წიფიანი და გიორგი ხაბალაევი მეორე ლიგის “ცხინვალმა” აიყვანა!

ბატონმა ზურაბმა თავად გაარემონტა სტადიონი, შესაღები შეღება, მოსაკრეჭი მოკრიჭა, მაგრამ მინდვრის საფარი ვერავითარ კრიტიკას ვერ უძლებს და სამგორის გამგეობა აპირებს დახმარებას.

ეგ კი არა, თბილისის საკრებულოს თავმჯდომარე გიორგი ტყემალაძემ თავად დაურეკა და სტადიონის საფარის კეთილმოწყობას დაჰპირდა!

ყოველდღიური სპორტული გაზეთი "ლელო"
1183
მკითხველის კომენტარები / 0 /
რუბრიკის სხვა სიახლეები
;