[ამხანაგური მატჩი] ახალი ტორპედოს პირველი გამარჯვება იტალიელი პრეზიდენტისა და მისი ოჯახის თვალწინ!..

ქუთაისის "ტორპედო" ახალი სეზონისთვის მზადებას აგრძელებს. მიხეილ აშვეთიას გუნდმა მორიგი სპარინგი რამაზ შენგელიას სახელობის სტადიონზე გამართა ეროვნულ ლიგაში დაწინაურებული თბილისის "მერანი" 1:0 დაამარცხა. ერთადერთი გოლი სინჯებზე მყოფმა ოთარ კვერნაძემ პენალტით გაიტანა.

"ტორპედოსთან" ერთად ვარჯიშობს უკრაინელი შემტევი ნახევარმცველი ივან ბობკოც, რომელმაც "მერანთან" მატჩი ძირითად შემადგენლობაში დაიწყო.

"ტორპედო": ბულისკერია, მირცხულავა, კასრაძე, გრიგალაშვილი, ნადარაია, მარკოვიჩი, ძარია, ჯანელიძე, ციცქიშვილი, ბობკო, ფანცულაია; შეცვლაზე შევიდნენ: ქაფიანიძე, ადამაძე, აბზიანიძე, აბულაძე, შარვაშიძე, იონანიძე, კვერნაძე, ბოჭორიშვილი.

ქუთაისელებს დღემდე არაერთი პრობლემა ჰქოდათ მოსაგვარებელი და ეს გასაკვირი არ არის. მაგალითად, ყველას გული სწყდებოდა, რომ ფეხბურთელები ვარჯიშზე სხვადასხვა გუნდების ეკიპირებით მიდიოდნენ. რა თქმა უნდა, ეს სასიამოვნო ფაქტი არ იყო. მაგრამ "ტორპედოს" პრესსამსახურის ცნობით, კლუბის ახალმა მეპატრონემ ამაზე იზრუნა და ქუთაისელები მალე ერთიანი ეკიპირებით შეიმოსებიან.

და კიდევ - 25 თებერვალს, 14 საათზე, რამაზ შენგელიას სახელობის სტადიონზე, ქუთაისის "ტორპედოს" პრეზიდენტი ფაბიო მანინო მედიის წარმომადგენლებს შეხვდება. სხვათა შორის, ის ოჯახის წევრებთან ერთად ესწრებოდა "მერანთან" ამხანაგურ მატჩს...

ტორპედო-მერანის მატჩს ოჯახთან ერთად ქუთაისელთა ახალი პრეზიდენტი ფაბიო მანინოც დაესწრო


კლუბის პრესსამსახურის მიერ გავრცელებული ანონსიდან კი ცნობილი ხდება, რომ "ტორპედოს" ახალი გენერალური სპონსორი ჰყავს, რომელსაც მედიასა და გულშემატკივრებს სწორედ სამშაბათის პრესკონფერენციაზე წარუდგენენ. გაიმართება 2020 წლის სეზონის ეკიპირების პრეზენტაცია და გაჟღერდება სხვა სხვა სიახლეებიც.

ქუთაისურმა კლუბის ცნობით, "ტორპედოს" ხელმძღვანელობის გადაწყვეტილებით, ახალი სეზონის პირველ ორ საშინაო მატჩზე (1 მარტს "დილასთან" და 11 მარტს "ჩიხურასთან") გულშემატკივრისთვის დასწრება თავისუფალი იქნება. ასე იყო "მერანთან" სპარინგის დროსაც. მაგრამ მესამე საშინაო მატჩიდან საშინაო თამაშებზე დასწრება ფასიანი გახდება და ბილეთები გაიყიდება. ბილეთების ფასთან დაკავშირებულ ინფორმაციას კლუბი გულშემატკივარს უახლოეს პერიოდში აცნობებს.

* * *

ქუთაისელებს კიდევ არაერთი პრობლემა აქვთ გადასაჭრელი. მაგალითად, ქუთაისის რამაზ შენგელიას სახელობის სტადიონის მოძველებული ინფრასტრუქტურა. ამის გამო, "ტორპედომ" 2018 წელს ჩემპიონთა ლიგის პირველ საკვალიფიკაციო ეტაპის მატჩს კი უმასპინძლა, მაგრამ ევროპალიგის მესამე საკვალიფიკაციო ეტაპზე მატჩები თბილისში, "მიხეილ მესხზე" ჩაატარა.

პრობლემები ახლაც მოუგვარებელია. "რამაზ შენგელიაზე" მდგომარეობის გამოსასწორებლად ზრუნვა შარშან დაიწყეს. შპს "რამაზ შენგელიას სახელობის სტადიონის" მეპატრონე ქუთაისის მერიაა, რომელმაც პროექტის შედგენაზე ტენდერი გასული წლის გაზაფხულზე გამოაცხადა. ტენდერში გამარჯვებულიც შპს  "კოლოსი" გახდა. მასთან მერიამ ხელშეკრულება 2019 წლის 4 აპრილს გააფორმა და "კოლოსს" ინფრასტრუქტურა უნდა მოეწესრიგებინა, ხოლო სამუშაოები 2019 წლის 3 ივნისს უნდა დაესრულებინა.

თუმცა, "ქუთაისი პოსტის" ცნობით, რეკონსტრუქცია ათი თვის შემდეგაც არ არ დასრულებულა. ეს იმის მიუხედავად, რომ შპს "კოლოსს" ქუთაისის მერიამ სამუშაოების ვადა შვიდჯერ გაუხანგრძლივა, პირობის შეუსრულებლობისთვის არც ხელშეკრულება გაწყვეტილა და არც ჯარიმა  დაუკისრებიათ.

ხელშეკრულებაში შეტანილი მეშვიდე ცვლილების მიხედვით,  13 აპრილი ბოლო ვადაა და  შპს "კოლოსმა" "ტორპედოს"  ადმინისტრაციული შენობის რეკონსტრუქციის პროექტი უნდა მოამზადოს. საქმე ისაა, რომ პროექტი ფეხბურთის ფედერაციასთან და უეფასთანაა შესათანხმებელი, რათა სტანდარტებში ჩაჯდეს და ზუგდიდის სტადიონის პრეცედენტი თავიდან იქნას აცილებული.

პროექტში ფეხბურთის ფედერაციის მითითებით რამდენიმე შესწორება უკვე შევიდა, მაგრამ პროცესი რომ გაჭიანურდა, ეს არგუმენტად მაინც ვერ გამოდგენა, რადგან ფეხბურთის ფედერაციის ლიცენზირებისა და მონიტორინგის სამსახური პროცესში მხოლოდ კონსულტაციით შემოიფარგლება.

პროექტი სტადიონის ტევადობას ოდნავ შეამცირებს და ტრიბუნები 11 800 მაყურებელზე იქნება გათვლილი. სრულად უნდა გარემონტდეს გასახდელები, მსაჯთა და ექიმის კაბინეტები, სველი წერტილები, გადაიხუროს მოედანზე გამოსასვლელი დერეფანი, რეაბილიტაცია ჩაუტარდეს სარბენ ბილიკს, ელექტროტაბლოს, ტრიბუნებზე ასასვლელ კიბეებს, დამონტაჟდეს განათების თანამედროვე სისტემა, მოეწყოს VIP და პრესლოჟები, საკომენტატორო და პრესკონფერენციის ოთახები, ტერიტორია სათვალთვალო კამერებით აღიჭურვოს, ხოლო სტადიონის ტერიტორიაზე 150 ავტომანქანაზე გათვლილი პარკინგი უნდა იყოს. ცოტა გაუგებარია ერთ-ერთი მოთხოვნა, რომ "ინდივიდუალური სკამები უნდა გადაიღებოს ან შეიცვალოს - ინდივიდუალური სკამების შეღებვა სად გაგონილა?!

ფეხბურთის ფედერაციამ სტადიონზე საკუთარი სახსრებით უკვე შეცვალა მინდვრის საფარი, მოედნის საფარი და სარწყავი სისტემა შეიცვალა და გუნდში დარწმუნებულები არიან, რომ რამაზ შენგელიას სახელობის სტადიონზე ბალახის საფარი დღეს საქართველოში საუკეთესოა.

2618
მკითხველის კომენტარები / 0 /
მსგავსი ამბები
რუბრიკის სხვა სიახლეები
;