[ანალიზი, VIDEO] ხორვატია 2-1 საქართველო. რით აჯობა დალიჩმა ვაისს?

ხორვატია-საქართველო  2:1
19.11. პულა. ალდო დროსინა
0:1 პაპუნაშვილი (18), 1:1 კაშია (25-საკ. კარში), 2:1 პერიშიჩი (54)
ხორვატია (4-5-1): ლ. კალინიჩი (46. სლუგა) - ბარტოლეკი (46. იურანოვიჩი), იედვაი (46. ჩალეტა-ცარი), შკორიჩი, მელნიაკი - რებიჩი, პაშალიჩი (76. პერიჩი), ბადელი, კოვაჩიჩი (65. ვლაშიჩი/80. ბარიშიჩი), პერიშიჩი - ორშიჩი (46. როგი).
სათადარიგოები: ლივაკოვიჩი, ბროზოვიჩი, პეტკოვიჩი
მწვრთნელი: ზლატკო დალიჩი
საქართველო (4-5-1): მაკარიძე - კაკაბაძე (39. შენგელია), კაშია, ხოჭოლავა (80. გრიგალავა), ნავალოვსკი - გვილია (83. ქვილითაია), აბურჯანია, ყაზაიშვილი (87. ხარაიშვილი), ჯიღაური, პაპუნაშვილი (64. კიტეიშვილი) - ე. ლობჯანიძე (51. არაბული).
სათადარიგოები: კუპატაძე, ლორია, კვეკვესკირი, დაუშვილი, რეხვიაშვილი
მწვრთნელი: ვლადიმირ ვაისი
არბიტრი: ა. სანტი (მალტა)


საქართველოს ეროვნულმა ნაკრებმა წლის ბოლო შეხვედრაც წააგო, ამჯერად, ამხანაგური მატჩი - ხორვატიასთან. მსოფლიოს ვიცე-ჩემპიონთან მარცხში ტრაგიკული არაფერია, მაგრამ ვთქვათ ისიც, რომ მეტოქემ პრაქტიკულად მთლიანად სათადარიგო შემადგენლობით ითამაშა...

რა მოგვცა ვაისის ექსპერიმენტებმა?

საქართველოს ნაკრების მთავარმა მწვრთნელმა ვლადიმირ ვაისმა ნაკრები ექსპერიმენტული შემადგენლობით ათამაშა. რა თქმა უნდა, ამ ექსპერიმენტებს ველოდით და წინათქმაში ვივარაუდეთ კიდეც, მაგრამ ამხელა მასშტაბებს ერთადერთი მიზეზის გამო ვერ წარმოვიდგენდით - წინ გველის უმნიშვნელოვანესი მატჩი ბელარუსთან.

ისე გამოდის, რომ ეს ამხანაგური იმ მატჩის გენერალური რეპეტიცია იყო, რადგან მარტამდე საერთაშორისო კალენდარში სანაკრებო "ფანჯრები" გათვალისწინებული არ არის. ძალიან ვეჭვობთ, ბელარუსთან თბილისურ შეხვედრაში თუნდაც ამის მიმსგავსებული შემადგენლობით ვითამაშოთ...

გასაკვირია, რატომ მისცა ასეთი მცირე სათამაშო დრო ვაისმა გიორგი ხარაიშვილს. არადა, ყველამ ერთად ვნახეთ, რომ მინდორზე მისი შესვლის შემდეგ ქართველთა თამაში გამწვავდა.

რა მოგვცა ვაისის ექსპერიმენტებმა? ჩემი აზრით, ყველაზე მისაღები ჯაბა ჯიღაურის მარჯვენა მცველობა იყო. მაგრამ ისიც ვიცით, რომ თუ ოთარ კაკაბაძე (კოჭის ტრავმა მიიღო და რამდენიმე კვირა გაუცდება) ჯანმრთელად იქნა, ამ პოზიციაზე სწორედ ის დადგება. ჯიღაური, ასე თუ ისე, თამაშობდა, დანარჩენები კი...

ერთხელაც გამოჩნდა, რომ საქართველოს ნაკრებში ჯერაც არ არის ჯაბა კანკავას არათუ სრულფასოვნად, არამედ, ნაწილობრივად შემცვლელი მაინც. ისევე, როგორც გიორგი ქვილითაიას არ ჰყავს ალტერნატივა ცენტრფორვარდის პოზიციაზე.

როცა საბა არ არის...

ვლადიმირ ვაისმა სანაკრებო სია რომ გამოაქვეყნა, მას ეგრევე დავუწუნეთ საბა კვირკველიას იგნორირება. კი ბატონო, კვირკველია უთამაშებელია და ამ დროისთვის ვერაფრით იქნება ოპტიმალურ ფორმაში, მაგრამ რას და რამდენს ნიშნავს ის საქართველოს ნაკრებისთვის, ეს, მგონი, ყველამ კიდევ ერთხელ თვალნათლივ დავინახეთ.

საქართველოს ნაკრებმა დაცვაში, მეტადრე მის ცენტრალურ ზონაში, უამრავი შეცდომა დაუშვა და, ვფიქრობთ, ამ შეცდომების მეტი წილი არ იქნებოდა, მინდორზე კვირკველია რომ ყოფილიყო. იოლი აღსაქმელია: გურამ კაშია სწორედ მასთან წყვილში გრძნობს თავს ყველაზე კომფორტულად.

მეორე მხრივ, ეს არ ამართლებს თავად კაშიას ძალიან სუსტ თამაშს. ავტოგოლს რომ თავი დავანებოთ, მეორე გოლისას მას აშკარად უკეთ მართებდა თამაში.

საერთოდ, ივან პერიშიჩი ქართველთა დაცვაში აკეთებდა იმას, რაც სურდა. ადვილი წარმოსადგენია, რა დღე დაგვადგებოდა, ხორვატიას მთელი თავისი "მეზარბაზნეებით" რომ შეეტია ჩვენი კარისთვის...

გასატანი უნდა გავიტანოთ!

საქართველოს ნაკრებს ისევ სჭირს საგოლე მომენტების გამოუყენებლობის მძიმე სენი. ასე რომ არ ყოფილიყო, თავისუფლად შეიძლებოდა ამ შეხვედრის ფრედ დასრულებაც კი. თუნდაც ბოლო მომენტი გავიხსენოთ, როცა ბურთი ლამის კარში ჩამდგარ მცველს მოხვდა - იმ პოზიციიდან უნდა გაიტანო!

გავიხსენოთ ისიც, რომ ჩვენი ერთადერთი გოლი ხორვატთა მეკარე ლოვრე კალინიჩის შეცდომას მოჰყვა. რომ არა წვიმა და მეკარის ეს შეცდომა, ალბათ საერთოდ ვერ გავიტანდით. ძალიან, ძალიან ძვირად დაგვიჯდება ბელარუსთან ამდენი მომენტის განიავება.

რით აჯობა დალიჩმა ვაისს?

პირველმა ტაიმმა თანაბარ ბრძოლაში ჩაიარა, მეორე ნახევარში კი ხორვატიამ აშკარად გვაჯობა, თუ, რა თქმა უნდა, ბოლო 10 წუთს არ ჩავთვლით. ამბობენ, მეორე ტაიმს მწვრთნელი იგებსო და ზლატკო დალიჩის შეცვლებმა უფრო უწია მიზანს, თუნდაც მეორე ტაიმის სტარტზე განხორციელებული 4 ცვლილება რომ გავიხსენოთ.

საქართველოს ნაკრებმა კი ვაისის ხელში კიდევ ერთხელაც ჩაატარა ორი არათანაბარი ტაიმი. პირველი გაცილებით უკეთესი იყო, ვიდრე მეორე. ყველაზე საინტერესო კი არის ერთი კითხვა, რომელსაც გვერდს ვერ ავუვლით...

...რა მოგვცა ხორვატიასთან მატჩმა?

რა თქმა უნდა, დიდი პატივია მსოფლიოს ვიცე-ჩემპიონთან თამაში, მაგრამ მე ასე ვიცი - ამხანაგური მატჩები არის იმისთვის, რომ კარგად მოემზადო ოფიციალური მატჩებისთვის. ეს ოფიციალური მატჩი კი გველის მარტში ბელარუსთან და ღმერთმა ნუ ქნას, მათთან თბილისში "პირველი ნომრები" არ ვიყოთ!..

ხორვატიასთან თამაშამდეც იოლი სავარაუდო იყო, რომ რა შემადგენლობითაც არ უნდა ეთამაშა მეტოქეს, ვერაფრით ვიქნებოდით "პირველი ნომერი". თუმცა ბოლოს ვიყავით. ხორვატიამ მოულოდნელად დაიწია უკან, მაგრამ მხოლოდ 10 წუთი.

მატჩის შემდეგ

ვლადიმირ ვაისი: "საინტერესო ამხანაგური მატჩი გამოდგა. მეტოქედ მაღალი დონის გუნდი გვყავდა. ხორვატიას ბევრი ინდივიდუალურად ძლიერი მოთამაშე ჰყავს, რომლებიც უმაღლესი ხარისხის ფეხბურთს თამაშობენ. თამაში კარგად დავიწყეთ, გოლიც გავიტანეთ, თამაშსაც ვაკონტროლებდით, მაგრამ ორი გოლი გავუშვით და დავმარცხდით.

პირველ ნახევარში ჯიღაურს ჰქონდა გოლის გატანის 100-პროცენტიანი შანსი, 2-3 მომენტი მეორე ტაიმშიც შევქმენით, მაგრამ ვერ გავიტანეთ. ვფიქრობ, შეტევაში ცოტა გამოცდილება და ხარისხი დაგვაკლდა. ამიტომაც დავმარცხდით".

4822
მკითხველის კომენტარები / 3 /
თეიმურაზ რეხვიაშვილი
2
ვაისი ფეხბურთის გაგებაში არ არის და თუ არ შეცვალეთ ბელორუსები მოგვიგებენ,მას არც ერთხელ არ დაუყენებია უძლიერესი შემადგენლობა,ჯერ გრიგალავას უკეთებდა იგნორირებას,მერე ტაბიძეს,ეხლა კვერკველია,ხარაიშვილი და ზარანდია,ხოლო რეხვიაშილი მესამედ მოიწვია და საერთოდ არ შეუშვა მინდორზე,ნათელია რომ ის ცუდი ადამიანიც არის.პრეტენზია მაქვს კომენტატორთან რომელიც მას წამდაუწუმ სპეციალისტს უწოდებს და საქვეყნოთ განაცხადა რომ მარჯვენა მცველი კაკაბაძის გარდა არაგვყავსო რაც ტყუილია– გიორგი მჭედლიშვილი უკეთესი თუ არა მასზე არანაკლებია,უბედურება კი ის არის რომ ვაისი და მისი მომყვანებიც ასე ფიქრობენ,კითხეთ ვაისს,რატომ რატომ ათამაშა ყაზაიშვილი რატომ არ ათამაშა ხარაიშვილი არაბული და ლორია,ნუთუ ამდენი არ ესმის რომ სწორედ ამხანაგურ თამაშებში უნდა ვნახოთ ვინ რას წარმოადგენს,მე მიკვირს რატომ არ ერევა ამ მწვრთნელის არასწორ გადაწყვეტილებებში,ასე იყო წინა პრეზიდენტისას,მაგრამ ის კაცი კეთილსინდისიერად ამბობდა,რომ არ იყო ფეხბურთის სპეციალისტი,მაშინ კობიაშვილმა ყაველაშვილმა და იაშვილმაც იგივე გააკეთონ,არ იციან რომ დრონი მეფობენ და არა მეფეები?
თამაზო რომა
2
ნეტავ ბევრი ფიქრობს, რომ დალიჩმა აჯობა ვაისს და იმიტომ წავაგეთ? აბა ყოლოდა ვაისს ხორვატებზე მაღალი კლასის ფეხბურთელები იგივე ტაქტიკაში და ვნახავდით ვინ მოიგებდა. ასე რომ კლასი ბიძიკო კლასი, არ უნდა ამას ბევრი ფილოსოფია! ისე კი, გაუმარჯოს ჩვენს ბიჭებს, რომლებიც მართლა გულიანად თამაშობენ და რაც შეუძლიათ აკეთებენ!
მსგავსი ამბები
რუბრიკის სხვა სიახლეები
;