ამ გამარჯებას საქართველოსაც ვუძღვნი!.. შოთა მახარაძის გუნდმა იუნიორების ჩემპიონთა ლიგაში საჭირო თამაში მოიგო

მართალია, ჩვენ ჩემპიონთა ლიგას მხოლოდ ტელევიზორში ვუყურებთ, მაგრამ ამ პრესტიჟულ ტურნირზე საქართველო ირიბად მაინც მონაწილეობს.

ოთხშაბათს იუნიორების (U19) ჩემპიონთა ლიგაში მეორე რაუნდის მატჩები გაიმართა, სადაც ჩვენთვის საინტერესო ამბავი ტირასპოლში მოხდა: ეგრეთ წოდებულ "ჩემპიონთა გზის" მეორე რაუნდის პირველ შეხვედრაში "შერიფმა" ნორვეგიული "სოგნდალი" შინ 2:0 დაამარცხა.

საინტერესო ის არის, რომ მატჩის დელეგატად უეფამ ქართველი დავით დათუნაშვილი მიავლინა, ხოლო გამარჯვებული გუნდის მთავარი მწვრთნელი ასევე ქართველი - შოთა მახარაძე გახლავთ, რომელმაც გამარჯვება საქართველოს მიუძღვნა.

"გახარებული ვარ და ვიტყვი იმას, რაც, შესაძლოა, ემოციების შედეგია - მაჩისწინა დარიგებაზე ფეხბურთელებს ვუთხარი და ვთხოვე - დღეს ამ თამაშს არა მხოლოდ ტირასპოლში, საქართველოშიც ყურადღებას აქცევენ და მინდა, რომ ამ გამარჯვებით ყველამ გავიხაროთ-მეთქი... ძალიან მძიმე თამაში იყო, ნორვეგიული გუნდი კარგად  ორგანიზებული იყო, მაგრამ გულშემტკივრებს საუკეთესო საფეხბურთო საღამო ვაჩუქეთ და იმედი მაქვს, საპასუხო შეხვედრასაც წარმატებით ჩავატარებთ.

ისიც მახარებს, რომ ჯერ ტურნირზე წაუგებლად მოვდივართ. საერთოდ, ამ წარმატებით მე პასუხი გავეცი მათ, ვინც A-ლიცენზიის მიღებაში მინიმუმ ხელს არ მიწყობდა... თუმცა, გულწრფელად ვამბობ - მე ამ გამარჯებას საქართველოსაც ვუძღვნი", - ამბობს მახარაძე.

"შერიფისა" და "სონდალის" საპასუხო შეხვედრა ნორვეგიაში 27 ნოემბერს გაიმართება. ქართველი სპეციალისტის გუნდი წაუგებელ სერიას აგრძელებს: საკვალიფიკაციო ეტაპის პირველი რაუნდიდან მახარაძის "შერიფმა" ალბანური "შკენდია" გააგდო (2:1, 1:0).

აღსანიშნავია, რომ ტირასპოლის 19-წლამდელთა გუნდი ტურნირზე მესამედ ასპარეზობს და პირველი ეტაპი მხოლოდ ქართველის ხელმძღვანელობით გადალახა. ნორვეგიული ბარიერის დაძლევის შემთხვევაში, "შერიფი" იუნიორების ჩემპიონთა ლიგის პლეი ოფში მოხვდება.

850
მკითხველის კომენტარები / 0 /
მსგავსი ამბები
რუბრიკის სხვა სიახლეები
;