[ანალიზი, VIDEO] დანია 5-1 საქართველო. ვაისის ქართული კარიერაც დაღმა მიექანება... შიშმა ვერ იხსნა სიკვდილი

დანია-საქართველო  5:1
10.06. კოპენჰაგენი. თელია პარკენი
1:0 დოლბერგი (13), 1:1 ლობჟანიძე (25), 2:1 ერიქსენი (30-პენ), 3:1 დოლბერგი (63), 4:1 პოულსენი (73), 5:1 ბრაიტვაიტი (90)
დანია (4-3-3): შმეიხელი - ანკერსენი, კიაერი (34. იორგენსენი), კრისტენსენი, სტრიგერ ლარსენი - ჰოიბერგი, ერიქსენი, დილეინი - სკოვი (62. ვასი), პოულსენი (75. ბრაიტვაიტი), დოლბერგი
სათადარიგოები: რენოვი, ნილსონი, დალსგაარდი, . იორგენსენი, ბრუნ ლარსენი, შიონე,   დურმისი, ჰანსენი, კრისტიანსენი
მწვრთნელი: აგე ჰარეიდე
საქართველო (4-3-3): ლორია - კაკაბაძე, კაშია, გრიგალავა, ნავალოვსკი (79. დვალი) - პარუნაშვილი (58. პაპუნაშვილი), კანკავა, კვეკვესკირი - ლობჟანიძე, კიტეიშვილი (74. ლობჯანიძე), გვილია
სათადარიგოები: კვასხვაძე, მაკარიძე, არველაძე, მერებაშვილი, ჯიღაური, კვარაცხელია, აბურჯანია, ხარაიშვილი, ხარაბაძე
გაფრთხილება: კანკავა (29), კვეკვესკირი (51), გვილია (55)
არბიტრი: . შიორგენჰოფერი (ავსტრია)

სტატისტიკა

55% ბურთის ფლობა 45%
26 კარში დარტყმა 7
9 ზუსტი დარტყმა 2
10 უზუსტო დარტყმა 2
7 დაბლოკილი დარტყმა 3
10 კუთხური 3
1 თამაშგარე 2
1 მეკარის სეივი 4
4 ჯარიმა 14

რა თქმა უნდა, დანიის ნაკრები მატჩის უპირობო ფავორიტი იყო. მასპინძელი გუნდის მთავარმა მწვრთნელმა აგე ჰარეიდემ თქვა კიდეც თამაშის წინ, ჩვენი მიზანი მხოლოდ მოგება იქნებაო...

უფორვარდო დასაწყისი

იმ განლაგებას, რომელიც საქართველოს ნაკრების სასტარტო შემადგენლობის ასახვისას გიჩვენეთ, მხოლოდ პირობითად თუ ექნება პრეტენზია სისუსტეზე. ვლადიმირ ვაისმა დანიასთან მატჩი ნომინალური ფორვარდის გარეშე დაიწყო. ასე უთამაშია ბევრს, მათ შორის, "ბარსელონასაც", მაგრამ სულო ცოდვილო, სლოვაკი მწვრთნელის გადაწყვეტილებაში ცოტა ზედმეტი სიფრთხილე ამოვიკითხეთ.

ისე კი, ვაისმა მაქსიმალურად დატვირთა მინდვრის ცენტრი. გარდა ამისა, მან მაქსიმალური ნდობა გამოუცხადა დანიაში მოთამაშე ფეხბურთელებს - საბა ლობჟანიძესა და ლაშა პარუნაშვილს.

"ცრუ ფორვარდის" ფუნქცია დაეკისრა ვაკო გვილიას, ვინც ალბათ პირველად ითამაშა მისთვის სრულიად უცხო ამ პოზიციაზე და მოვლენებს წინ გავუსწრებთ - ერთ-ერთი საუკეთესოც იყო საქართველოს ნაკრების შემადგენლობაში.

ცვლილებები შეეხო დანიის ნაკრებსაც. ცუდ შედეგად ჩაითვალა საშინაო ფრე ირლანდიასთან და მასპინძელთა დამრიგებელმა მაქსიმალურად გამოიყენა მის ხელთ არსებული შეტევითი რესურსი. მინდორზე პირველი წუთიდანვე გამოჩდნენ რობერტ სკოვი და კასპერ დოლბერგი. ძირითადში ვიხილეთ ასევე ირლანდიელთა კარში ერთადერთი გოლის ავტორი - პიერ-ემილ ჰოიბერგი.

ქართული სანგრები დანიაში

ვაისმა თამაშის წინ თქვა - დანიასთან ჭკვიანურად  უნდა ვითამაშოთო. ჭკვიანური თამაში ერთია და შიშით თამაში - მეორე. საქართველოს ნაკრებმა, როგორც იტყვიან, სანგრები გათხარა საკუთარ კართან და ძალიან იშვიათად გადადიოდა მეტოქის ნახევარზე.

შედეგად, დანიამ შექმნა ხუთზე მეტი აშკარა საგოლე მომენტი და სკანდინავიელ შემტევებს მეტი სიზუსტე რომ გამოეჩინათ, თამაში პირველივე ტაიმში დაკარგავდა ყველანაირ აზრს. ნამდვილად არ გვინდა, ასეთი გუნდი მომავალშიც ვნახოთ. გასაგებია, საქართველოს ნაკრებს არაერთი ლიდერი აკლდა, მაგრამ ასე არ უნდა ითამაშოს არცერთი ფორმაციის საქართველოს ნაკრებმა!

და თუ ჩვენი მაქსიმუმი მხოლოდ ლატვიისა და ყაზახეთის ძლევაა, მაშინ გვითხარით ესეც და გვეცოდინება მაინც. რა თქმა უნდა, დანიასთან აუცილებელ მოგებას არავინ ითხოვს, მაგრამ ის, რაც პირველ ტაიმში ვნახეთ, ნამდვილი კატასტროფა იყო. ასე თამაშობენ სან მარინო, ანდორა და ლიხტენშტაინი. აქ მთავარი ხარისხია, თორემ არაერთხელ დაგვიწერია - ეს ციკლი ერთა ლიგის ნახევარფინალებს რომ შევწიროთ, ბევრი არც არაფერი დაშავდება.

...დანიამ სწრაფ გოლზე გააკეთა აქცენტი და გაიტანა კიდეც. ნაკუთხურალ ბურთზე საჰაერო ბრძოლა სიმონ კიაერმა მოიგო, დოლბერგს დაუგდო და "აიაქსის" ფორვარდს ისღა დარჩენოდა, ქართველთა კარის ბადე შეერხია.

საქართველოს ნაკრებმა ტაიმის განმავლობაში ერთ ხეირიან კონტრშეტევას მოაბა თავი და ისიც გოლით დაასრულა - ოთარ კიტეიშვილმა ორთაბრძოლა მოიგო, ვაკო გვილიამ კონტრშეტევა შესანიშნავად განავითარა და კარგი პასი მისცა საბა ლობჟანიძეს, ვინც ანგარიში გაათანაბრა.

დანიამ შეტევა გააგრძელა და ძალიან საეჭვო 11-მეტრიანით დაწინაურდა. ვფიქრობთ, ავსტრიელ არბიტრს თამამად შეეძლო, წესების დარღვევა არ დაენახა ჯაბა კანკავასა და კიაერის ბრძოლაში, მაგრამ...

პენალტი კრისტიან ერიქსენმა დაგვირტყა. გიორგი ლორიამ "ტოტენჰემის" ლიდერის დარტყმულს ხელი კი წაატანა, მაგრამ ბურთი ძელს მოხვდა და ბადეში გაეხვია. ტაიმის ბოლომდე დანიას კიდევ ჰქონდა არაერთი მომენტი, მაგრამ მათი გამოყენება ვერ შეძლო.

კოშმარი: დავი(ხუთ)ეთ!

მეორე ტაიმში მოგვივიდა ის, რაც მოსდით ხოლმე ისეთ გუნდებს, რომლებიც საქართველოს ნაკრების დარად თამაშობენ. თანამედროვე ფეხბურთში ასეა - საკუთარ საჯარიმოში გამოკეტილი, შიშით მოთამაშე გუნდი განწირულია განადგურებისთვის.

გასაგებია, რომ არბიტრი ძალიან მიეხმარა მასპინძლებს. მეორე ტაიმში, დანიელთა პირველი გოლისას, გამოჩნდა, რომ ლორია აშკარად დაბლოკეს მეკარის საჯარიმოში, მაგრამ არ იქნებოდა ის გოლი, იქნებოდა სხვა.

ის კი არა, საქართველოს ნაკრების კართან შექმნილი მომენტების უმეტესობა რომ გამოეყენებინათ დანიელებს, ანგარიში ორნიშნაც შეიძლებოდა, ყოფილიყო. გასაგებია, მოვა დრო და ნაკრები სხვა გუნდი იქნება, მაგრამ...

ამ ოხერ შიშს რა ვუყოთ? ჯერ ერთი, ოთხი საყრდენით ვითამაშეთ და ცენტრი აშკარად წავაგეთ. მეორეც, სანამ მინდორზე ელგუჯა ლობჯანიძე არ შევიდა, სანთლით იყო საძებარი ცენტრფორვარდი.

ვერავინ დამარწმუნებს, რომ ირლანდიის ნაკრები საქართველოსას კლასით ბევრად სჯობია. არადა, ირლანდიამ ქულა აიღო დანიაში. როგორ? არ შეეშინდა, იბრძოლა, ორთაბრძოლები მოიგო, ჩვენ კი... როგორ დავიჯერო, ჩვენი ფეხბურთელები უფრო დაღალა სეზონმა და უფრო უნდათ შვებულებაში გასვლა, ვიდრე - პრემიერლიგასა და ჩემპიონშიფში ნარბენ ირლანდიელებს?!.

საქმე სხვა რამეშია. იმათ არ ეშინიათ და აქვთ ხასიათი. ჩვენ არ გვაქვს ეს ხასიათი და ვაისის ქართული კარიერაც, ისე ჩანს, დაღმა მიექანება...

ვეჭვობთ, ჩვენი სიტყვები ბევრს ეწყინება, მაგრამ თავის დროზე, სანამ ისინი მაღალ თანამდებობებს დაიჭერდნენ, ამაზე უკეთესი თამაშებისთვის უფრო მძაფრად აკრიტიკებდნენ ნაკრებს, ვიდრე ჩვენ გავაკრიტიკეთ...

ისეთი შთაბეჭდილება შეგვექმნა, საქართველოს ნაკრებს მენტალურად წინასწარ წაგებული ჰქონდა ეს თამაში, თორემ დანია რომ ჩვენზე უკეთესია, ამას რა ბევრი ფიცი-მტკიცი სჭირდება.

მეტოქეები

ტრადიციულად, ირლანდიურად... 

ირლანდია-გიბრალტარი 2:0
გოლები: 1:0 ჟ. ჩიპოლინა (29-საკ. კარში), 2:0 ბრეიდი (90)
ირლანდია (4-3-3): რენდოლფი - კოულმენი, დაფი, კეო, სტივენსი - რობინსონი (73. ბრეიდი), ჰენდრიკი, ჰურაჰანი, მაკლინი - მაკგოლდრიკი, ჰოგანი (66. მაგუაირი)

ირლანდიამ ისევ იწვალა (პირველი მატჩი 1:0 მოუგო) გიბრალტართან და მხოლოდ ორი გოლი აკმარა მეტოქეს. ამის მიუხედავად, კუნძულელები სათავეში უდგანან D ჯგუფს. პირველი გოლი გიბრალტარელებმა საკუთარ კარში გაიტანეს. სულ ბოლოს კი შეცვლაზე შესულმა ბრეიდიმ შეაგდო და საბოლოო ანფარიში დააფიქსირა.

1. ირლანდია 4 3 1 0 5:1 10
2. დანია 3 1 2 0 9:5 5
3. შვეიცარია 2 1 1 0 5:3 4
4. საქართველო 4 1 0 3 4:8 3
5. გიბრალტარი 3 0 0 3 0:6 0


მომდევნო მატჩები

5 სექტემბერი
ირლანდია-შვეიცარია
გიბრალტარი-დანია 

8 სექტემბერი
საქართველო-დანია

ყოველდღიური სპორტული გაზეთი "ლელო"
4284
მკითხველის კომენტარები / 4 /
კახა ქ.
1
ის გოლი რომ აიჩემეთ და რამდენი არ გავიდა ,იმას რატო არ თვლით.მთელი თამაშის განმავლობაში ერთ საგოლე მომენტს რომ ვერ შექმნი ამას გუნდი ქვია?და ბოლოს-ხარი ხართან დააბიო.....უკვე ფეხბურთელებმაც დაიწყეს წაგებაში სხვების დადანაშაულება მათი მწვრთნელის არ იყოს.მთავარია ჩვენ რა დავაშავეთ ,გულშემატკივრებმა.როდემდე უნდა უყუროთ ამ უცოდინარ მწვრთნელს,მის სისულელეებს?დავიღალეთ,არც არავინ არ ჩანს მომკითხველი ეგაა უბედურება
va-le
1
არაფერი მწვრთნელი არარის ეს, ჩვენზე ერთი თავით მაგლა მდგომ ნაკრებს ერთი თამაში ვერ მოუგეთ ამ ვაი პროფესიონალი მწვრთნელის ხელმძღვანელობთ, ან რა პროგრესზე ლაპარაკობთ ჩვენზე დაბალ დონის გუნდებშ რომ მოუგეთ ეგ არის პროგრესი რომ აიყვანეს ცაში და ეხლაც ღრუბლებში დაფრინავს ზოგიერთი, პროგრესი მაშინ იქნება როცა შოტლანდიას, ირლანდიას ბულგარეთს და ასე შემდეგ ესეტი დონის ნაკრებებს მოუგებ და არა ანდორა, კაზახეთს ლიტვას ესეთ დაბალი დონის ნაკრებთან მოგება პროგრესი არ არის, როდის გვეშველება ? არასდროს თუ ესე გაგრძელდა , ანუ არაპროფესიონალი მწვრთნელი ყრუ დაცვით თამაში უსამარტლოდ გამოძახებული ფეხბურთელები, რომლებისაც ტრანვა 3/4 დგის მორჩენილი აქვს ან არ აქვს მორჩენილი დისკომფორტს განიცდიან არ უნდა გამოიძახო ნაკრებში უნდა გამოიძახო სხვა ტუნდაც გამოუცდელი ფეხბურთელები ახალგაზრდა პერსპექტიული შიდა ჩემპიონატიდან, შეცვლების დაგვიანება, პრესკომფერეციაზე წინასცარ დაანონსებული შიშით გამოსვლა მოედანზე ფსიქოლოგიურად წაგებული აქვთ ტამაში, თავიდანვე განწყობა არის ფსიქოლოგიურად შიში დანერგილი, თუნდაც ტაქტიკა ავიგოთ 4/6/0 აედან 4 ჩამშლელი ძალიან დიდი და ბევრი პრობლემა არის ესეთი მიდგომით და თამაშით, ბელარუს ვერ გავცდებით, თუ გავცდებით სავარაუდოდ კოსოვოს შევხვდებით ფინალში რომელსაც კარგი ნაკრები ყავს საკმაოდ, ვინმეს თუ გაქვთ ნანახი კოსოვოს ტამაში ნამდვილად არ არის სუსტი გუნდი
მსგავსი ამბები
რუბრიკის სხვა სიახლეები
;