[ანალიზი, VIDEO] მხოლოდ იღბალი?! რატომ წავაგეთ ირლანდიაში?

ირლანდია-საქართველო      1:0
26.03. დუბლინი. ავივა
1:0 ჰურიჰანი (36)
ირლანდია (4-3-3): რენდოლფი - კოულმენი, დაფი, კეო, სტივენსი - ჰურიჰანი, ჰენდრიკი, უელანი - ბრეიდი (82. 'ბრაიენი), მაკლინი, მაკგოლდრიკი (82. დოჰერტი)
სათადარიგოები: არტერი, ბირნი, კოლინზი, კულენი, იგანი, ჯაჯი, . ლონგი, მაგუაირი, ტრავერსი, ვესტვუდი
მწვრთნელი: მიკ მაკარტი
საქართველო (4-3-2-1): ლორია - კაკაბაძე (85. ოქრიაშვილი), კვირკველია, კაშია, ხოჭოლავა (65. ხარაბაძე) - კანკავა, კვეკვესკირი, გვილია - კიტეიშვილი, არველაძე (73. ყაზაიშვილი) - ქვილითაია
სათადარიგოები: ჭანტურიშვილი, ჯიღაური, კაჭარავა, კვასხვაძე, ლობჟანიძე, მაკარიძე, მერებაშვილი, ნავალოვსკი, პარუნაშვილი
მწვრთნელი: ვლადიმირ ვაისი
გაფრთხილება: კანკავა (15), კაშია (33)
არბიტრი: . გიოზუბუიუქი (ჰოლანდია)

საქართველოს ნაკრები მეათედ ეთამაშა ირლანდიას და მეცხრედ წააგო! ვლადიმირ ვაისის გაწვრთნილმა გუნდმა დაასრულა ოცნება ევროშესარჩევი ციკლის ჯგუფური ბარიერის დაძლევაზე. ნაკრებმა ისევ ორი, ძალიან განსხვავებული ტაიმი ითამაშა, ირლანდიამ კი დამსახურებულად მოიგო. ერთი ჩაუთვლელი გოლი მიკ მაკარტის გუნდს ვერ დააღონებს...

[PHOTO რეპორტაჟი+VIDEO] ირლანდია-საქართველო. ბურთი დავიჭირეთ, მოგება გაგვექცა

რა მოიფიქრა ვაისმა?

მართალია, შვეიცარიასთან შეხვედრის შემდეგ ველოდით, რომ ექსპერიმენტები იქნებოდა, მაგრამ ნამდვილად ვერ წარმოვიდგენდით, თუ ვლადიმირ ვაისი პირდაპირ მიჰყვებოდა ქართული მედიის ყველა ვარაუდსა თუ შენიშვნას.

ძირითად შემადგენლობაში ვიხილეთ ოთარ კიტეიშვილი და ვატო არველაძე. ოთარმა ჯანო ანანიძე შეცვალა, ვინც ნაკრებს დუბლინში ტრავმის გამო ვერ გაჰყვა. არველაძეს კი უკან დაწეული ფორვარდის ფუნქციების შესრულება დაევალა. ცოტა მოულოდნელი იყო ვაკო ყაზაიშვილის დარჩენა სათადარიგოთა სკამზე. როგორც ჩანს, ვაისმა გაითვალისწინა ის, რაც შვეიცარიასთან დაინახა...

ცვლილებები შეეხო დაცვის ხაზსაც. ძირითად შემადგენლობას დაუბრუნდა საბა კვირკველია და ეს სავსებით ლოგიკური იყო. ვაისმა არ გარისკა და მარცხენა მცველის პოზიციაზე უფრო გამოცდილი დავით ხოჭოლავა გაამწესა.

რაც შეეხება სტატისტიკას: აქამდე, ირლანდიასთან მხოლოდ ერთხელ ვეთამაშეთ ფრედ. ვაისი კი მეოთხედ დაუპირისპირდა ირლანდიას (ორჯერ სლოვაკეთის და ორჯერაც საქართველოს ნაკრების თავკაცის რანგში) და ეგრეც ვერ იზეიმა გამარჯვება...

მაკარტის მაქსიმალიზმი

გიბრალტართან ჩატარებული "საშინელი" (თავად ირლანდიელების შეფასებაა) საგარეო მატჩის შემდეგ, ირლანდიელთა დამრიგებელმა მიკ მაკარტიმ სათამაშო სქემა შეცვალა. მან საქართველოს ნაკრების კარზე ერთბაშად სამი ფორვარდი მიუშვა. სასტარტო შემადგენლობიდანაც კი კარგად ჩანდა, რომ ირლანდია დამაჯერებელ გამარჯვებას ესწრაფვოდა...

ამასვე ითხოვდნენ გიბრალტართან შეხვედრაში თამაშის ხარისხით გაწბილებული გულშემატკივრები. მოკლედ, დასამტკიცებელი ორივე მხარეს საკმარისად ჰქონდა. თამაშში "მაღალი ტემპერატურა" და დაძაბულობა კი იმთავითვე გარანტირებული იყო...

ირლანდიის ტაიმი და გვილიას შანსი

ნამდვილად ვერ წარმოვიდგენდით იმ კოლოსალურ უპირატესობას, რომელიც ირლანდიის ნაკრებს პირველ ნახევარში ჰქონდა. თუ ტაიმის ბოლო მონაკვეთს არ ჩავთვლით, საქართველოს ნაკრები უბურთოდ იყო დარჩენილი და დამაგვირგვინებელ ფაზაში მასპინძლებს მეტი სიზუსტე რომ გამოეჩინათ, მეორე ტაიმი საერთოდ აზრს დაკარგავდა...

ირლანდიამ აქცენტი სწრაფ გოლზე გააკეთა და საქართველოს ნაკრების კარს იმთავითვე დაატეხა შეტევების ქარიშხალი. კონორ ჰურიჰანის მიერ ძალიან კარგად დარტყმული ბურთი გიორგი ლორიამ მოიგერია. მე-11 წუთზე გატანის შანსი მასპინძელთა ფორვარდ დევიდ მაკგოლდრიკსაც მიეცა, მაგრამ ზეენერგიული შემტევის დარტყმა ოდნავ ასცდა ქართველთა კარს.

სწრაფი გოლი არ გამოვიდა, მაგრამ ირლანდიამ მაინც გაიტანა - ეს მას შემდეგ, რაც იქაური ფეხბურთის შიდა სამზარეულოთი უკმაყოფილო ფანებმა მინდორზე ჩოგბურთის ბურთები გადმოყარეს. ეს იყო დაგეგმილი აქცია...

ამასობაში, "სტანდარტული" ჰურიჰანმა შეასრულა. ლორიამ მისგან ახლო კუთხეში კი გაუშვა ბურთი, თუმცა ხელაღებით ყველაფერს მას ვერ დავაბრალებთ - უნდა ვივარაუდოთ, რომ საქართველოს ნაკრების კარის დარაჯი "ცოცხალი კედლის" გამო ბურთს კარგად ვერ ხედავდა.

განსაკუთრებით თვალში საცემი იყო მაკარტის გუნდის ძალიან კარგი ფიზიკური მომზადება. ამ დროს კი საქართველოს ნაკრები მეტოქის საჯარიმოს პირველად 25-ე წუთზე მიუახლოვდა...

ტაიმის ბოლოს შანსი მაინც მოგვეცა - ნიკა კვეკვესკირმა ძალიან მაგარი პასით მასპინძელთა მთელი დაცვა გააქვავა და ვაკო გვილიამ ახლო მანძილიდან ძლიერად დაარტყა - მეკარე დარენ რენდოლფმა აშკარა გოლისგან იხსნა ირლანდია.

ძელი რომ არა, ანუ უმართლებთ ძლიერებს

ირლანდიის ნაკრების მთავარი მწვრთნელი ძალიან ჭკვიანი კაცია. მან კარგად იცის თავისი გუნდის რეალური ძალა და ისიც, რომ მთელ მატჩს ირლანდიელები ასეთ ტემპში ვერ ითამაშებდნენ. შესაბამისად, მეორე ნახევარში გუნდმა რაციონალურად გადაანაწილა ძალები.

თავის მხრივ, საქართველოს ნაკრებს უკეთესი მეორე ტაიმი ჰქონდა, მაგრამ აქვე ჩნდება კითხვაც - როდის მოხდება ისე, რომ ვაისის ხელმძღვანელობით საქართველოს უპირველესი გუნდი ორ თანაბარ ტაიმს ჩაატარებს?

ასე იყო გუშინაც - ტაიმებს შორის დიდზე დიდი ზღვარი ვიხილეთ. ასეთ ვითარებაში კი წარმატებაზე ფიქრი ძალიან რთულია. საბოლოო ჯამში გაიმარჯვა უძლიერესმა. თუნდაც მეორე ტაიმში ირლანდიელებს ჩვენზე მეტი მომენტი ჰქონდათ.

არადა, არწაგება ნამდვილად შეგვეძლო. ჯაბა კანკავას მიერ უძლიერესად დარტყმული ბურთი ძელს რომ არ მოხვედროდა, ქულას ავიღებდით, მაგრამ საფეხბურთო ფორტუნამ ამჯერად მართებულად განსაჯა და ირლანდიას 3 ქულა არგუნა.

მოვემზადოთ ერთა ლიგის პლეი ოფებისთვის

უნდა ვაღიაროთ - ამ შეხვედრის შედეგი საქართველოს ნაკრებისთვის ახლახან დაწყებულ შესარჩევში წარმატებაზე ფიქრის დასრულებას ნიშნავს. დანარჩენი მატჩები იმისთვის უნდა გამოვიყენოთ, რომ ევროპის ჩემპიონატამდე დარჩენილი ორი ნაბიჯი წარმატებით გადავდგათ.

სამწუხაროდ, უნდა ვაღიაროთ ისიც, რომ ერთა ლიგის D დივიზიონში ჩაუქობა სულაც არ ნიშნავს იმას, რომ უკვე ჩამოვყალიბდით ევროპის საშუალო დონის ნაკრებად მაინც...

დღეს ეს ვიკმაროთ, განვლილი ორი თამაშის უფრო დეტალურ ანალიზს "ლელოს" მომდევნო ნომერში გაახლებთ.

1. ირლანდია 2 2 0 0 2:0 6
2. შვეიცარია 2 1 1 0 5:3 4
3. დანია 1 0 1 0 3:3 1
4. გიბრალტარი 1 0 0 1 0:1 0
5. საქართველო 2 0 0 2 0:3 0

ომდევნო მატჩები
პარასკევი, 7 ივნისი
საქართველო-გიბრალტარი
დანია-ირლანდია

ორშაბათი, 10 ივნისი
დანია-საქართველო
ირლანდია-გიბრალტარი

ყოველდღიური სპორტული გაზეთი "ლელო"
4406
მკითხველის კომენტარები / 0 /
მსგავსი ამბები
რუბრიკის სხვა სიახლეები
;