[ანალიზი, VIDEO] ევრო 2020. შვეიცარია 1-0 საქართველო. როცა ვაისი არის... ვაისი...

ევრო 2020. საკვალიფიკაციო ეტაპი. D ჯგუფი

შვეიცარია-საქართველო  1:0
15.11. სენტ გალენი. კიბუნპარკი. 20 000 მაყურებელი
1:0 იტენი (77. ზაკარიას პასით)
შვეიცარია (3-4-1-2): ზომერი - ელვედი, აკანჯი, როდრიგესი - ლიხტშტაინერი, ზაკარია, ჯაკა, შტეფენი - ფერნანდესი (84. სოვი), აიეტი (71. იტენი), ვარგასი (78. ფასნახტი)
სათადარიგოები: მვოგო, მბაბუ, ებიშერი, ომლინი, კომერტი, ბენიტო, მუბანჟე, ლანგი, სეფეროვიჩი
მწვრთნელი: ვლადიმირ პეტკოვიჩი
საქართველო (4-2-3-1): ლორია - კაკაბაძე, კაშია, გრიგალავა, ხოჭოლავა - კანკავა, კიტეიშვილი (84. გვილია) - დავითაშვილი (84. პაპუნაშვილი), შენგელია, ყაზაიშვილი - ქვილითაია (82. ლობჯანიძე)
სათადარიგოები: კუპატაძე, მაკარიძე, ნავალოვსკი, ჯიღაური, აბურჯანია, ხარაიშვილი, დაუშვილი, არაბული, რეხვიაშვილი
მწვრთნელი: ვლადიმირ ვაისი
გაფრთხილება: ხოჭოლავა (29), კანკავა (31), შტეფენი (74)
არბიტრი: დ. მაკელი (ჰოლანდია)

მატჩი ციფრებში

63% ბურთის ფლობა 37%
25 კარში დარტყმა 14
10 მიზანში დარტყმა 4
9 კუთხური 1
4 თამაშგარე 1
12 ჯარიმა 15
727 პასები 347
654 ზუსტი პასები 279
151 შეტევები 68

საქართველოს ნაკრებმა ევრო 2020-ის საკვალიფიკაციო ციკლი შვეიცარიასთან თბილისური მარცხით (0:2) დაიწყო და იმავე შვეიცარიასთან საგარეო მარცხით (0:1) დაასრულა. ბედის ირონიით, ეს ერთადერთი გოლი მაშინ გავუშვით, როცა ჩვენი თამაში ვიპოვეთ. ვაჩვენეთ, რომ ფეხბურთის თამაში შეგვიძლია, მაგრამ ისიც გამოჩნდა, რომ არაერთი ნაკლიც გვაქვს...

მატჩამდე

შვეიცარიის ნაკრებს ამ შეხვედრაში მხოლოდ გამარჯვება აძლევდა ხელს. ვლადიმირ პეტკოვიჩის გუნდი თამაშს დიდი დანაკლისით შეეგება. მართალია, გამოჯანმრთელება მოახერხა "ბენფიკას" შემტევმა ჰარის სეფეროვიჩმა, მაგრამ ის სათადარიგოთა სკამს არ გასცილებია.

მასპინძლებს არაერთი მნიშვნელოვანი ფეხბურთელი დააკლდათ - ბრაის ემბოლო, მარიო გავრანოვიჩი, ადმირ მეჰმედი, სტივენ ზუბერი, ფაბიან შერი და ჯერდან შაჩირი, რემო ფროილერი და იოსიპ დრმიჩი. ამდენად, შვეიცარიელთა სამწვრთნელო შტაბი იძულებული გახდა, ექსპერიმენტებისთვის მიემართა.

ყველამ ვიცით საქართველოს ნაკრების დანაკლისიც. ვლადიმირ ვაისის მიერ თავდაპირველად შერჩეულ შემადგენლობას ჯანო ანანიძე და ჯიმი ტაბიძე გამოაკლდნენ. მანამდე ცნობილი იყო, რომ ეროვნულ გუნდს ვერ დაეხმარებოდნენ თორნიკე ოქრიაშვილი, საბა ლობჟანიძე და ლაშა დვალი.

ნებისმიერ შემთხვევაში, საქართველოს ნაკრების შემადგენლობა მეტად იყო ახლოს ოპტიმალურთან, ვიდრე ჩვენი მეტოქისა...

შესაძლოა, კატასტროფად დაგვიჯდეს...

საქართველოს ნაკრებს არც ამ შეხვედრაში მოშორდა ის ზნე, რომელიც თან სდევს მას შემდეგ, რაც გუნდი ვლადიმირ ვაისმა ჩაიბარა - მაღალ დონეზე ჩაატარა მეორე ტაიმი, რასაც ვერ ვიტყვით პირველ ნახევარზე.

ამაზე წერა უკვე კომიკური ხდება, მაგრამ რას ვიზამთ - რასაც მინდორზე ვხედავთ, ის უნდა დავწეროთ. ფაქტი კი ისაა, რომ მსგავსი კონტრასტულობა სულაც არ ასხამს წყალს საქართველოს ნაკრების წისქვილზე.

ერთა ლიგის ორ უმნიშვნელოვანეს შეხვედრაში ასეთი რამ ნამდვილად არ გაგვიწევს კარგ სამსახურს. იქ ორივე ტაიმი ერთ დონეზე უნდა ვითამაშოთ, რადგან თუნდაც მცირე ჩავარდნა, შესაძლოა, კატასტროფად დაგვიჯდეს...

რას დავაბრალოთ კლასის ნაკლებობა?

საქართველოს ნაკრებს ჰქონდა 5 ძალიან კარგი საგოლე მომენტი. ამათგან, ოთხ შემთხვევაში დავარტყით შვეიცარიელთა კარის ჩარჩოში და კარგად ითამაშა მეკარე იან ზომერმა, ერთხელ კი გიორგი ქვილითაიას გაჰქონდა გოლი წაქცეულს, მაგრამ... სასწაულად არ გაუმართლა - მასპინძლები ძელმა იხსნა.

რა თქმა უნდა, შვეიცარიის ნაკრებს ჰქონდა ჩვენზე მეტი მომენტი და გიორგი ლორიასაც გაცილებით მეტჯერ მოუწია თამაშში ჩართვამ, ვიდრე მის შვეიცარიელ კოლეგას, მაგრამ ჩვენი მხრიდან 5 საგოლე მომენტი ცოტა არ არის.

იმავე ერთა ლიგაზე ამდენი შანსის გაფლანგვა არ გვეპატიება. რას უნდა დავაბრალოთ ეს? კლასის ნაკლებობას? ალბათ, საქმე სწორედ ამაშია. თავს იმით თუ დავიიმედებთ, რომ მარტში გიორგი ჩაკვეტაძე გვეყოლება - ყველაზე კლასიანი ფეხბურთელი დღევანდელ საქართველოში.

რატომ დაგვიანდა ცვლილებები?

ასე მგონია, ვლადიმირ ვაისი ძალიან სქემატური მწვრთნელია. არ ვამბობ, რომ კარგი, ან ცუდი, მაგრამ სქემატური ნამდვილად არის. რა გვაძლევს ამის თქმის უფლებას?

ყველამ კარგად ვნახეთ, როდის გააკეთა პირველი შეცვლა საქართველოს ნაკრების მთავარმა მწვრთნელმა. გასაგებია, რომ შედეგი საჩვენო იყო, მაგრამ რამდენიმე ფეხბურთელი აშკარად საჭიროებდა დასვენებას.

მაგალითად, მეორე ტაიმში აშკარად დაიღალა გიორგი ქვილითაია. ეს არ ნიშნავს იმას, რომ მან ცუდად ითამაშა. პირველ ტაიმში და მეორის დასაწყისში გიორგი იყო ძალიან კარგი, მან შეასრულა უდიდესი მოცულობის სამუშაო და მოიგო ძალიან ბევრი ორთაბრძოლა.

ერთადერთი, რაც მის თამაშს დააკლდა, იყო გოლი. ამ გოლთან კი, როგორც ზემოთ ვთქვით, ის ძალიან ახლოს იყო. ზოგადად, ქართველ თავდამსხმელებს იშვიათად გააქვთ და თუ მხოლოდ ამ კრიტერიუმით შევაფასებთ, ხელში პრაქტიკულად არაფერი შეგვრჩება.

ადვილი სავარაუდო იყო, რომ ქვილითაია დაიღლებოდა - მას "გენტში" არ აქვს სათამაშო პრაქტიკა. ან რატომ წაიყვანა ვაისმა ნაკრებში ბაჩანა არაბული, ვისაც საბერძნეთში გააქვს გოლები? რატომ არ შეიძლებოდა გიორგი ხარაიშვილის ნდობა? მოკლედ, კითხვები საკმაოზე მეტია.

როგორ უნდა გაარტყა შეცვლა "ათიანში", ეს პეტკოვიჩმა გვიჩვენა. გოლის ავტორი სედრიკ იტენი სამარქაფო იყო და თამაშში სწორედ მწვრთნელის ჩარევის შემდეგ ჩაერთო. არც ის უნდა დაგვავიწყდეს, რომ ეს იტენი "სენტ გალენის" ფორვარდია. იმ სტადიონზე მოთამაშე გუნდისა, სადაც ეს შეხვედრა გაიმართა...

როგორ ვიყენებთ სტანდარტულ მდგომარეობებს?

ამ კითხვაზე პასუხი ერთმნიშვნელოვანია: ძალიან ცუდად! ალბათ, დააკვირდით, რა სახიფათო ოყო შვეიცარიის ნაკრების თითქმის ყველა "სტანდარტი". თანამედროვე ფეხბურთში კუთხურებს და ჯარიმებს უდიდესი მნიშვნელობა აქვს. ჩვენ კი მათ ისე ვეკიდებით და ვასრულებთ, თითქოს წინასწარვე ვიყოთ შეგუებულები, რომ მაინც არაფერი გამოგვივა.

თითქოს მეტოქეც ხვდება, რომ ჩვენს ჯარიმებსა და კუთხურებს მაინცდამაინც დიდი ხიფათი არ მოჰყვება, ნახევარი ძალით იცავს ხოლმე თავს და ხშირად მზაკვრულ კონტრშეტევას აქეთ გვახვედრებს...

რა უნდა ჯაბას ყაზახეთში?

უბრალოდ, არ მესმის, რატომ თამაშობს ჯაბა კანკავა ყაზახეთის ჩემპიონატში? პირადად ჩემი აზრია: მას თავისუფლად შეუძლია ითამაშოს ნებისმიერი ტოპჩემპიონატის საშუალო გუნდში მაინც. შვეიცარიასთან მატჩი ამის კიდევ ერთი დასტური გახლდათ.

ყველამ იბრძოლა, ენა რომელიმეს დასაძრახად ძნელად თუ მოგიბრუნდება კაცს, მაგრამ როგორ გინდა, გიორგი ლორია არ შეაქო?! მეკარის პოზიციაზე სანერვიულო არაფერია - გიორგი მაკარიძეც შესანიშნავ ფორმაშია.

მომეწონა ზურიკო დავითაშვილი - ჟინით, ტექნიკით, გამწვავების სურვილით, თუნდაც შეცდომებით... საერთოდ, ასე მგონია: საქართველოს ნაკრებში მალე მოვა ახალი თაობა, რომელიც გაცილებით მეტს მიაღწევს და უკეთეს ფეხბურთსაც ითამაშებს. ამ თაობას უკვე ჰყავს თავისი ლიდერი და მის გვარ-სახელს ერთხელაც აღარ დავწერთ...

რა უნდა გამოსწორდეს მარტამდე?

ახლაც და შვეიცარიასთან მატჩამდეც ჩვენი საფიქრალი ბელარუსთან წარმატებით თამაშია. საკითხს უფრო გლობალურად შევხედოთ და დავსვათ კითხვა - რა უნდა გამოსწორდეს მარტამდე?

სათამაშო კომპონენტებზე ზემოთ ვილაპარაკეთ. დარჩა ერთი და მთავარი: როგორმე ისე უნდა მოხდეს, რომ ჩვენს ფეხბურთელებს არ მოაკლდეთ სათამაშო პრაქტიკა თავიანთ კლუბებში. შვეიცარიასთან შეხვედრამაც გვიჩვენა, რომ ზოგიერთ მათგანს ის აშკარად აკლია და ეს ძალიან დიდ დაღს ასვამს არამარტო უშუალოდ მათ თამაშს, არამედ, ეს მთლიანად გუნდსაც უშლის ხელს...

ასე თუ ისე, მეტად თუ ნაკლებად, ვაისმა უკვე ნახა საქმეში ყველა ის ქართველი ფეხბურთელი, ვინც ნაკრებში შეიძლება მოიაზრებოდეს. ამიტომ, ერთა ლიგის პლეი ოფებისთვის მწვრთნელი მაქსიმალურად უნდა დაეყრდნოს იმ მოთამაშეებს, რომელთაც მოცემულ მომენტში სათამაშო პრაქტიკა ექნებათ და ფორმაში იქნებიან.

სხვა შემთხვევაში, სერიოზული კითხვის ნიშნის ქვეშ დავაყენებთ იმ მატჩ(ებ)ის ბედს, რომელსაც დამოუკიდებელი ქართული ფეხბურთის ისტორიაში ყველაზე მნიშვნელოვანია.

1. დანია 7 4 3 0 22:5 15
2. შვეიცარია 7 4 2 1 13:5 14
3. ირლანდია 7 3 3 1 6:4 12
4. საქართველო 8 2 2 4 7:11 8
5. გიბრალტარი 7 0 0 7 2:25 0

ორშაბათი, 18 ნოემბერი
გიბრალტარი-შვეიცარია  23:45
ირლანდია-დანია  23:45

8289
მკითხველის კომენტარები / 4 /
gocha chelidze
0
საქართველოს ნაკრებმა ძალიან კარგად ითამასა. ბოლომდე იბრძოლეს. ჩემი აზრით კარში დამრტყმელის ნაკლებობაა. თუ კარში არ დაარტყავ გოლს ვერ გაიტან.
რეზო
0
ჩვენ გუნდს საერთოდ არ ეტყობა,რომ ჰყავს მწვრთნელი.არ აქვთ დამუშავებული სტანდარტები.აუტს ვერ აწვდიან.რა უბედურებაა.არადა რომ შევადაროდ შვეიცარიელებს,ჩვენები ბევრად უკეთესები არიან,გუნდად კი ისინი გვჯობიან.ვაისი ერთა ლიგას ვერ მოიგებს.კომპლექსიანი ადამიანია.ნახეთ შეცვლებს როდის აკეთებს!.....
მსგავსი ამბები
რუბრიკის სხვა სიახლეები
;