[ანალიზი, VIDEO] ეროვნული ლიგა. დილა 2-0 სიონი. მოდებაძის წარმატებული დებიუტი

დილა-სიონი  2:0
03.07. გორი. თენგიზ ბურჯანაძე
1:0 ფორტესი (44-პენ), 2:0 გოშთელიანი (90. ფორტესის პასით)
დილა (4-2-3-1): ბეგაშვილი - გიორბელიძე, ჩადუნელი, მირცხულავა, თორ. გრიგალაშვილი (90. კერელეიშვილი) - რაზმაძე, კუცია (71. ნონდი) - ნონიკაშვილი, კუგბენია (90. სპანდერაშვილი), ფორტესი - გოშთელიანი
სათადარიგოები: ტიტვინიძე, მამულაშვილი, ლემპტი, პაიმი
მწვრთნელი: ირაკლი მოდებაძე
სიონი (4-2-3-1): გოშაძე - ჩაჩუა, ხეცურიანი, უგრეხელიძე, სუხიაშვილი - თარხნიშვილი, ცაცკრიალაშვილი - . კირკიტაძე (64. თარგამაძე), გვარაძე, . ისიანი - უგულავა (77. სიხარულია)
სათადარიგოები: . ისიანი, ტვილდიანი, ქიქავა, საგანელიძე, ხვადაგიანი
მწვრთნელი: თემურ შალამბერიძე
გაფრთხილება: თარხნიშვილი (43), უგულავა (43), უგრეხელიძე (84)
არბიტრი: . კიკაჩეიშვილი


ამ შეხვედრას ექვსქულიანი ეთქმოდა. ერთმანეთს სატურნირო ცხრილში უშუალო კონკურენტები დაუპირისპირდნენ. "დილა" პირველად დამოძღვრა კლუბის ცოცხალმა ლეგენდამ, ირაკლი მოდებაძემ. გორელთა დარად, ბოლო დროს ძალიან არათანაბრად თამაშობს ბოლნისის "სიონიც". ქვემოქართლელებს დისკვალიფიკაციის გამო დააკლდათ ნიკოლოზ აფაქიძე. საქმეში ჩაერთო ტრავმები და სტუმართა დაცვის ხაზი ძალიან გაახალგაზრდავდა...

კიკაჩეიშვილმა სიონს არ მოუსმინა

თამაში დაიწყო და თავიდანვე ცხადი შეიქნა, რომ მინდორზე დიდი ბრძოლა და ძვლების ჭახა-ჭუხი გაჩაღდებოდა. "სიონმა" მალევე შექმნა ძალიან კარგი მომენტი. ბექა გვარაძემ შესანიშნავად უპასა ვილი ისიანს. კაპიტანი გიორგი ბეგაშვილთან პირისპირ დარჩა, მაგრამ მეკარემ დროულად დატოვა კარი და გუნდი გადაარჩინა.

"სიონი" ბედს კონტრშეტევებზე ეძებდა. რომან ჩაჩუას ჩაწოდების შემდეგ ბურთი დავით კირკიტაძემ მიიღო და კარგად დაუგდო ისიანს. "სიონის" კაპიტანმა შორეულ კუთხეს დაუმიზნა, მაგრამ უშედეგოდ.

21-ე წუთზე "დილამ" პირველი მომენტი შექმნა. ალვინ ფორტესი შორიდან ცდილობდა გატანას, მარცხენათი კარგადაც დაარტყა, მაგრამ ოთო გოშაძემ კონცენტრაცია არ დაკარგა და ბურთი კუთხურზე გადააგდო.

ორივე გუნდს უჭირდა მაღალ ტემპში თამაში. გურამ გოშთელიანმა შორიდან დაუმიზნა ბოლნისელთა კარს, მაგრამ მიზანმა უმტყუნა. ზოგადად, აბსოლუტურად თანაბარ თამაშში ხშირი არ იყო მწვავე მომენტები.

43-ე წუთზე თორნიკე თარხნიშვილის  მიერ ხელით თამაშისთვის არბიტრმა გოგა კიკაჩეიშვილმა "სიონის" კარში თერთმეტმეტრიანი დანიშნა. ბოლნისელთა კამათს შედეგი არ გამოუღია - ამ ეპიზოდიდან სახსოვრად მხოლოდ ყვითელი ბარათები დარჩათ. უმაღლესი საფეხბურთო სასჯელი კი ფორტესმა აღასრულა. გოშაძემ თითები წაატანა კაპევერდელის დარტყმულს, მაგრამ... ვერ მოიგერია.

გოლიც და საგოლეც

მეორე ტაიმი "სიონის" აქტიურობით დაიწყო, მაგრამ ეს მხოლოდ ბურთის ფლობაში გამოიხატა. მე-60 წუთზე "დილას" კონტრშეტევას კინაღამ გოლი მოჰყვა. ლევან ნონიკაშვილმა შესანიშნავად ითამაშა, ერთი მეურვე ჩამოიშორა, ფლანგზე გაილაღა და გურამ გოშთელიანს უპასა, ვისი დარტყმულიც კარს ასცდა.

65-ე წუთზე ორჯერ შესანიშნავად ითამაშა ბეგაშვილმა. მან ჯერ გვარაძეს აუღო ურთულესი ბურთი, მერე კი შეცვლაზე შესული დავით თარგამაძის თავურიც გააუვნებელჰყო.

მატჩის ბედი კი დამატებულ წუთებზე გადაწყდა. ფორტესმა გოლს საგოლე გადაცემა შემატა - დაფარული, შესანიშნავი პასის შემდეგ გოშთელიანმა მეკარე მოატყუა და ბურთი ცარიელ კარში შეაგორა.

"დილამ" დამაჯერებლად მოიგო. წარმატებული აღმოჩნდა გუნდის მთავარი მწვრთნელის პოსტზე ირაკლი მოდებაძის დებიუტი. "სიონში" კი კრიზისი გრძელდება და უკვე რეალურია ეროვნულ ლიგა 2-ში დაქვეითების საფრთხე.

1. დინამო (თბ) 21 13 2 6 39:23 41
2. საბურთალო 21 12 4 5 38:26 40
3. დინამო (ბთ) 21 12 3 6 34:22 39
4. ტორპედო 21 10 4 7 42:33 34
5. ლოკომოტივი 21 10 2 9 27:23 32
6. ჩიხურა 21 6 9 6 28:22 27
7. დილა 21 7 4 10 24:26 25
8. სიონი 21 6 4 11 23:52 22
9. რუსთავი 21 4 7 10 24:36 19
10. ვიტ ჯორჯია 21 4 3 14 11:27 15

ბომბარდირები
ბ. ზივზივაძე (ტორპედო) 13
ლ. შენგელია (დინამო თბ) 11
ლ. შინდაგორიძე (საბურთალო) 10
ი. სიხარულიძე (ლოკომოტივი) 10
გ. დიასამიძე (საბურთალო) 10
ლ. კუტალია (დინამო თბ) 10
ბ. მახარობლიძე (ჩიხურა) 9
ჯ. ფლამარიონი (დინამო ბთ) 9

მომდევნო ტური
პარასკევი, 2 აგვისტო
სიონი-ვიტ ჯორჯია 17:30
შაბათი, 3 აგვისტო
რუსთავი-ჩიხურა 19:00
ლოკომოტივი-დინამო (თბ) 21:00
კვირა, 4 აგვისტო
დინამო (ბთ)-დილა 19:00
საბურთალო-ტორპედო 21:00

ყოველდღიური სპორტული გაზეთი "ლელო"
585
მკითხველის კომენტარები / 0 /
მსგავსი ამბები
რუბრიკის სხვა სიახლეები
;