[ანალიზი, VIDEO] ეროვნული ლიგა. დინამო (ბთ) 2-0 სიონი. ბათუმი ბრძოლაში რჩება, სიონი მძიმედაა...

დინამო (ბთ)-სიონი  2:0
08.11. დინამოს ბაზა
1:0 მანჯგალაძე (24. ჯიღაურის პასით), 2:0 ჯიღაური (48. ნავალოვსკის პასით)
დინამო (4-3-3): ალავიძე - მელიავა, . კობახიძე, გაგოშიძე, ნავალოვსკი - მამუჩაშვილი (31. . გაფრინდაშვილი), მანჯგალაძე, ტეიდი (79. ჩალაძე) - ჯიღაური, ფლამარიონი, . თევდორაძე (74. ჯანელიძე)
სათადარიგოები: კუჩინსკი, გეგეჭკორი, დვალიშვილი, ფაცაცია
მწვრთნელი: გია გეგუჩაძე
სიონი (5-4-1): გოშაძე - ივანიშვილი (56. ტვილდიანი), აფაქიძე, ჯაფიაშვილი, უგრეხელიძე, სუხიაშვილი - თარგამაძე, თარხნიშვილი (41. თომაშვილი), ხმალაძე, გვარაძე - უგულავა (56. ტატანაშვილი)
სათადარიგოები: . ისიანი, ჩაჩუა, შინჯიკაშვილი, კახაბრიშვილი
მწვრთნელი: თემურ შალამბერიძე
გაფრთხილებები: ჯაფიაშვილი (2), აფაქიძე (23), სუხიაშვილი (45+2), ხმალაძე (55)
გაძევება: აფაქიძე (34. მეორე ყვითელი)
არბიტრი: . მაჭარაძე


ბათუმური მატჩი ორივე გუნდისთვის უმნიშვნელოვანესი იყო, შესაძლოა, მიმდინარე სეზონში ერთ-ერთი საკვანძოც კი. თბილისის "დინამოსთან" ორქულიანი ჩამორჩენის გამო, აჭარის მთავარ გუნდს საჩემპიონო ბრძოლაში მხოლოდ მოგება აწყობდა, ხოლო მერვეადგილოსან "სიონს" ლიგაში ადგილის შესანარჩუნებლად ასევე მხოლოდ 3 ქულა სჭირდებოდა. მოკლედ, კომპრომისი გამორიცხული იყო...

აგრესიული პრესინგი

მასპინძლებს აკლდათ დისკვალიფიკაცირებული გაბრიელ რამოსი და ტრავმირებულები - ნიკა საბანაძე, გურამ ადამაძე და გიორგი ილურიძე, ხოლო ბოლნისელები საბრძოლო შემადგენლობით იყვნენ.

ბათუმელებმა მეტოქეს აგრესიული, მაღალი პრესინგი შესთავაზეს. "სიონის" მთავარმა მწვრთნელმა თემურ შალამბერიძემ კი, მეტოქის შეტევებისგან თავის დასაცავად, ყრუ დაცვითი ფეხბურთი ამჯობინა, მოედანზე 3 ცენტრალური და 2 ფლანგელი მცველი დააყენა.

უცნაური იყო მარჯვენა მცველად გიორგი ივანიშვილის გამწესება. ბოლნისელები იმედებს სწრაფ კონტრშეტევებზე ამყარებდნენ და ამ მიზნით ფლანგებზე სწრაფი თავდამსხმელები - დავით თარგამაძე და ბექა გვარაძე ჰყავდათ დაყენებული...

პირველი ორი მომენტი ბათუმელთა საყრდენი ნახევარმცველის გია მანჯგალაძის მონაწილეობით შეიქმნა. მისი ჯარიმა "ცოცხალ კედელში" ჩამდგარ მცველს მოხვდა და ვითარება განიმუხტა, ხოლო მე-5 წუთზე შორიდან "გაისროლა" და მიზანს ოდნავ ააცილა.

ბოლნისელებმა კარში პირველად მე-6 წუთზე დაარტყეს - თარგამაძის შესრულებული ჯარიმის შემდეგ ბურთი მეკარე მიხეილ ალავიძის იოლი ნადავლი გახდა.

პირველი რეალური საგოლე მომენტი მე-19 წუთზე სტუმრებმა შექმნეს. თარგამაძის მოწოდების შემდეგ, საჯარიმოში ბურთი ნიკა აფაქიძეს მიუგორდა, რომლის დარტყმული ბურთიც კარის ხაზამდე ბენჯამინ ტეიდს მოხვდა და მისგან ასხლეტილის კარში გაგზავნის საშუალება ლევან ხმალაძ არ მისცა - ბათუმის "დინამო" აშკარა გოლს გადაურჩა.

რატომ გააძევეს აფაქიძე?

23-ე წუთზე მატჩის არბიტრი პაატა მაჭარაძე შეცდა. ტეიდი ორ მცველს შორის მოხვდა და წესის დარღვევით წააქციეს, მაგრამ შემდეგ აფაქიძემ ბურთი მოიგერია და ყვითელი ბარათი აჩვენა.

ჯარიმა სამართლიანად დაინიშნა, ამას სტუმრებისთვის ძალიან ცუდი შედეგი მოჰყვა. ბათუმელებმა ჯარიმა გაითამაშეს, ჯაბა ჯიღაურმა ბურთი კარის გასწვრივ ჩააწოდა, სადაც მანჯგალაძემ მცველს დაასწრო და ბურთი კარში გაგზავნა - 1:0.

31-ე წუთზე ბათუმელებმა ლადო მამუჩაშვილის შეცვლა დასჭირდათ - ბურთის მოგერიებისას ის უხერხულად წაიქცა, მხარი იტკინა და მოედანი ნაადრევად დატოვა, მის ნაცვლად კი თორნიკე გაფრინდაშვილი გამოჩნდა...

ახლა სტუმრებისთვის მიყენებულ მეორე ზარალზე: 34-ე წუთზე არბიტრმა მეორე ყვითელი ბარათი უჩვენა აფაქიძეს (რომელიც წინა შემთხვევაში უსამართლოდ გააფრთხილა) და თან სრულიად სამართლიანად. მაგრამ პირველი უსამართლობის გათვალისწინებით, შესაბამისად, მოედანიც უსამართლოდ დაატოვებინა.

სტუმართა მთავარმა მწვრთნელმა მალევე ცვლილება განახორციელა და "სიონი" მოედანზე... 6 მცველით დარჩა.

ტაიმის ბოლოს ბათუმელებმა საჯარიმოს შესრულების უფლება მოიპოვეს, მაგრამ ჯიღაურის მიერ დარტყმული ბურთი მცველისგან კუთხურზე გადავიდა და "სიონმა" საფრთხე თავიდან აიცილა.

ფორმალური ტაიმი ბრძოლის სურვილით

იმის გათვალისწინებით, რომ სტუმრები 10 კაცით თამაშობდნენ, 48-ე წუთზე ყველაფერი დასრულდა. გიორგი ნავალოვსკიმ მარცხენა ფლანგიდან საჯარიმოსთან ჯიღაური მოძებნა, რომელმაც ზუსტად დაარტყა (ნეტავ, მცველები სად იყვნენ?) და ოთო გოშაძემ ბურთი ახლო კუთხეში გაუშვა - 2:0.

ამის შემდეგ თამაში ფორმალობა გახდა. კრივის მსგავსად, თეთრი პირსახოცის გადმოფენის უფლება რომ ჰქონოდათ, წესით, ბოლნისელებს უნდა გადმოეფინათ. მაგრამ "სიონის" ფეხბურთელები მაინც ბოლომდე იბრძოდნენ. 65-ე წუთზე თარგამაძე ჯარიმით სხვაობის შემცირებას შეეცადა, მაგრამ მიზანს ააცილა.

ერთ წუთში, ტეიდის მიერ წამოწყებულ სწრაფ შეტევას მანჯგალაძე აგვირგვინებდა, თუმცა სიზუსტე მასაც არ ეყო. 68-ე წუთზე გოშაძემ სტუმრები მესამე გოლს გადაარჩინა. "სიონის" მეკარემ ჯიღაურის ძლიერი დარტყმა მოიგერია, მაგრამ ბურთი ისევ კარისკენ დატრიალდა და წაქცეულმა მეკარემ წამოდგომა მოახერხა, ბურთს ხელი წაჰკრა და სიტუაცია განმუხტა.

72-ე წუთზე "სიონს" ანგარიშის შემცირება შეეძლო, როცა არჩილ ტვილდიანის ფლანგური გადაცემის შემდეგ კარის წინ დიმიტრი ტატანაშვილი გაიხსნა, მაგრამ ბურთს ფეხი ააცილა და მშვენიერი შანსი გაანიავა.

82-ე წუთზე შეტევაში ჩართული ლაშა ჩალაძის დარტყმა არაზუსტი გამოდგა. დამატებულ წუთზე მასპინძელთა კარს ისევ ეროვნული ნაკრების ყოფილი თავდამსხმელი დავით თარგამაძე დაემუქრა, მაგრამ მეკარემ ბურთი კუთხურზე მოიგერია.

საბოლოოდ, თამაში ბათუმის "დინამოს" გამარჯვებით დასრულდა, ეს კი იმას ნიშნავს, რომ გია გეგუჩაძის გუნდი ჩემპიონობისთვის ბრძოლას აგრძელებს.

გუნდი  დარჩენილი მატჩები
XXXV ტ. 24.11 XXXVI ტ. 1.12
1  დინამო (თბ) 34 21 6 7 66-30 69 დილა (ს)  ვიტ ჯორჯია (შ) 
2  დინამო (ბთ) 34 20 7 7 54-28 67 რუსთავი (შ)  ლოკომოტივი (ს)
3  საბურთალო 34 19 7 8 59-34 64 ჩიხურა (ს)  სიონი (შ) 
4  ლოკომოტივი 34 15 4 15 40-44 49 სიონი (ს)  დინამო ბთ (შ) 
5  ჩიხურა 34 11 11 12 45-40 44 საბურთალო (შ)   ტორპედო (ს)
6  დილა 34 11 9 14 37-40 42 დინამო თბ (შ)  რუსთვი (ს)
7  ტორპედო 34 11 8 15 50-52 41 ვიტ ჯორჯია (ს)  ჩიხურა (შ) 
8  სიონი 34 10 8 16 37-50 38 ლოკო (შ)  საბურთალო (ს) 
9  რუსთავი 34 9 10 14 37-52 37 დინამო ბთ (ს)  დილა (შ) 
10  ვიტ ჯორჯია 34 4 8 22 15-46 20  ტორპედო (შ) დინამო თბ (ს)

 განმარტება: (ს)  - სტუმრად, (შ) - შინ

შენიშვნა:    n ჩემპიონთა ლიგის საკვალიფიკაციო;     
n ევროპალიგის საკვალიფიკაციო;
nპლეი ოფი ლიგა 2-ის II-III ადგილოსანთან; 
n  პირდაპირ ვარდება ლიგა 2-ში.  

1766
მკითხველის კომენტარები / 1 /
გრიზლი
0
გარანტიით შაბათამდე
მსგავსი ამბები
რუბრიკის სხვა სიახლეები
;