[ანალიზი, VIDEO] ეროვნული ლიგა. დინამო (ბთ) 4-2 საბურთალო. 90 წუთი მომავლიდან, ანუ რა შეუძლია ხალხს

დინამო (ბთ)-საბურთალო        4:2
24.04. ბათუმი. ანგისას ბაზა
0:1 დიასამიძე (7), 0:2 როლოვიჩი (18. დიასამიძის პასით), 1:2 მამუჩაშვილი (21), 2:2 მამუჩაშვილი (21), 3:2 საბანაძე (41), 4:2 რამოსი (59. ფლამარიონის პასით) გამოუყენებელი პენალტი: ფლამარიონი (37. მეკარე)
დინამო (4-2-3-1): ალავიძე - მელიავა, ადამაძე, გაგოშიძე, ნავალოვსკი (87. ჩალაძე) - მანჯგალაძე, მამუჩაშვილი - რამოსი, ჯანელიძე (71. თორ. გაფრინდაშვილი), ფლამარიონი - საბანაძე (82. თევდორაძე)
სათადარიგოები: გოშაძე, . გადრანი, ცაცკრიალაშვილი, ილურიძე
მწვრთნელი: გია გეგუჩაძე
საბურთალო (4-2-3-1): მიგინეიშვილი - ჩაბრაძე, მარგველაშვილი, ცნობილაძე (56. გორგიაშვილი), ლაკვეხელიანი - კაკუბავა, ალთუნაშვილი - შინდაგორიძე (46. გიი), დიასამიძე, კოხრეიძე (62. გვარაძე) - როლოვიჩი
სათადარიგოები: შელიხოვი, მალი, თევზაძე, ტერა
მწვრთნელი: გიორგი ჭიაბრიშვილი
გაფრთხილება: ალთუნაშვილი (19), მამუჩაშვილი (26), მიგინეიშვილი (36), ფლამარიონი (45), მანჯგალაძე (66), დიასამიძე (83), თევდორაძე (83)
არბიტრი: . კვირიკაშვილი


სავსე ტრიბუნებითა და გაღიზიანებული ქომაგებით დახვდა ბათუმის "დინამო" მოქმედ ჩემპიონს ანგისას ბაზაზე, სადაც აჭარულ გუნდს მეორე წრის პირველივე ტურში დაწინაურებულ "საბურთალოსთან" მოგებით ჩემპიონატის ლიდერობის მოპოვება შეეძლო...

სტადიონის გარშემო პერიმეტრზე თამაშს იმაზე ნაკლები ხალხი არ უყურებდა, ვიდრე ტრიბუნებმა დაიტია. მატჩზე დაახლოებით 4 ათასამდე მაყურებელი მაინც შეიკრიბა, თანაც, შეხვედრამდე ერთი სათით ადრე ტრიუნები თითქმის შევსებული იყო.

..."გაღიზიანებული" ვახსენეთ შესავალში. საქმე ისაა, რომ ბათუმელ ქომაგთა აზრით, თასის მერვედფინალურ შეხვედრაში მათი საყვარელი გუნდი მსაჯის შეცდომების გამო დაიჩაგრა (თუ წააგებინეს) და იმუქრებოდნენ, რომ "საბურთალოს" ჯოჯოხეთს მოუწყობდნენ...

პრინციპში, დანაპირები აასრულეს კიდეც. ბათუმელი გულშემატკივარი პირველივე წუთებიდან სკანდირებდა "დინამო", "დინამოს"! ტრიბუნაზე მშვენიერი ატმოსფერო იყო, კარგი საფარი მოტივირებული გუნდები - ამ თამაშმა კიდევ ერთხელ გაგვახსენა, რომ ფეხბურთი საქართველოში ჯერ კიდევ უზომოდ უყვართ. ასეთ სტადიონზე ყოფნა ჭეშმარიტ ქომაგს აუცილებლად მოუნდებოდა. ასეთ გარემოში თამაშიც კარგია, ქომაგობაც და ჟურნალისტის მუშაობაც.

დისკვალიფიკაციის გამო მეტოქეებს თითო მოთამაშე აკლდათ: ბათუმელებს - თავდამსხმელი რომან ჭანტურია, ხოლო მოქმედ ჩემპიონ "საბურთალოს" - ლადო დვალიშვილი.

ჩემპიონური დასაწყისი

ვინც თამაშს უყურა, დაგვეთანხმება - მსგავსი თამაში ეროვნულ ლიგაში დიდი ხანია არ გვინახავს. იყო კარგი ტემპი, სანახაობა, დრამატული სცენარი და, რაც მთავარია, ბევრი გოლი. გუნდები მაყურებლის ნებას აჰყვნენ და დაცვისკენ აღარ იხედებოდნენ...

ბათუმელებმა თამაში ზეაქტიურად დაიწყეს და ამის ფონზე "ცივი შხაპი" მიიღეს: მე-7 წუთზე გია მანჯგალაძემ ბურთი თავისიანს დაუგორა, გადაცემა გეგა დიასამიძემ ჩაჭრა, გურამ ადამაძეს ბურთი თავზე გადაუგდო და მეკარესთან პირისპირ გასულმა ანგარიში გახსნა.

ბათუმელები გაშვებულმა გოლმა კიდევ უფრო დამუხტა და ანგარიშის გათანაბრებაც სწრაფად შეეძლოთ, მაგრამ ჯოვინო ფლამარიონის დარტყმას მეკარე ომარ მიგინეიშვილი გადაეღობა.

ცხადია, გოლმა თამაშის ხასიათზე გავლენა იქონია. ბათუმელებმა დაცვა მოაშიშვლეს და კიდევ ერთი უპატიებელი შეცდომა დაუშვეს: გიორგი ჯანელიძეს ბურთი აართვეს, დიასამიძემ შეტევა ოგნიენ როლოვიჩს გაუგრძელა, რომელიც მეკარესთან პირისპირ დარჩა და სამ შეხვედრაში ბათუმელებს მე-3 გოლი გაუტანა - 2:0.

შემოტრიალება

თითქოს, ყველაფერი ნათელი იყო, მაგრამ მაგრამ ამის შემდეგ მოედანზე ნამდვილი საგიჟეთი დატრიალა. საქმეში გულშემატკივარი და მათგან განხნევებული მასპინძელთა მოთამაშეები ჩაერთვნენ და სტუმარს თავს "ზვავი" დაატყდა.

მთავარი მოქმედი პირი "საბურთალოს" ყოფილი ფეხბურთელი (შურისძიებაც ასეთი უნდა!) ლადო მამუჩაშვილი გახდა, რომელმაც ჯერ სხვაობა შეამცირა, 4 წუთში კი ანგარიშიც გაათანაბრა. ჯერ შორიდან ძლიერი დარტყმით გაიტანა (მეკარემ ბურთი ვერ დაინახა),  მეორე გოლი კი კურიოზული გამოდგა - მარცხენა ფლანგიდან მამუჩაშვილმა ჯარიმა შეასრულა, მცველებმა ბურთი ვერ მოიგერიეს, მეკარემაც დროული რეაგირება ვერ მოახერხა და - 2:2.

36-ე წუთზე ბათუმელებს დაწინაურების რეალური შანსიც ჰქონდა: მალხაზ გაგოშიძის გადაცემით მეკარესთან პირისპირ დარჩა ჯოვინო ფლამარიონი, რომელსაც მეკარე შეეჯახა და პენალტი დაინიშნა. მაგრამ ბრაზილიელმა ლეგიონერმა 11-მეტრიანი ვერ გამოიყენა - მიგინეიშვილმა ბურთი ნახტომში მოიგერია და საკუთარი შეცდომა გამოისყიდა.

ბათუმელებმა სტუმართა კარი შესვენებამდე მესამედაც აიღეს: ნიკა საბანაძემ მცველთან ბრძოლაში ზუსტად დაარტყა - 3:2. სტუმრები თავდამსხმელზე გაგი მარგველაშვილისთვის ხელის კვრის გამო ჯარიმას ითხოვდნენ, მანამდე კი მასზევე თამაშგარის დაფიქსირებას, მაგრამ პრეტენზია არ დაკმაყოფილდა და გოლიც ჩაითვალა.

კიდევ ერთი

მეორე ნახევარში, შეტევების გასაძლიერებლად, გიორგი ჭიაბრიშვილმა ლაშა შინდაგორიძე ტრავმამოშუშებული ინტერს გიით შეცვალა. ხოლო მცველ დაჩი ცნობილაძის ნაცვლად, თამაშში ნახევარმცველი თორნიკე გორგიაშვილიც ჩართო და უკანა ხაზი 3-მცველიანი გახდა.

კოტდივუარელი თამაშში აქტიურად ჩაერთო. 52-ე წუთზე ის საჯარიმოში მცველმა წააქცია - სტუმრები პენალტს ითხოვდნენ, მაგრამ არბიტრმა თამაში გააგრძელა და საბურთალოელთა უკმაყოფილება დაიმსახურა.

სტუმრებმა მთელი ძალით შეტევა სცადეს, ბათუმელებმა კი მათი დაცვის მოშიშვლებით ისარგებლეს: შეტევა საბანაძემ ჩაჭრა, ფლამარიონს გაუგრძელა, რომელმაც კარის წინ გაბრიელ რამოსი დატოვა - 4:2.

გულშემატკივრის ძალა

ბათუმის "დინამომ" შესანიშნავი მატჩი ჩაატარა, გულშემატკივრის უზომო მხარადჭერამ კი მოთამაშეებს გასაოცარი ძალა შეჰმატა და გამარჯვებაში უდიდესი როლი ითამაშა. ესაა სწორედ გულშემატკივრის ძალა, რამაც ბათუმური მატჩი დაუვიწყარ სანახაობად აქცია.

ბათუმის სტადიონზე ნამდვილი "საგიჟეთი" იყო, სასიამოვნო და სასურველის "საგიჟეთი". ასეთი მატჩებით მაყურებელს სტადიონისკენ ნამდვილად მიიზიდავ. ბათუმელები ასე თუ გააგრძელებენ, საქართველოს ჩემპიონატების ისტორიაში პირველად შეიქმნება ბილეთების გადამყიდველთა ბაზარი (ერთ ქალაქში მაინც).

საერთოდაც, ჩვენ 90 წუთით მაინც გავიხედეთ მომავლისკენ და სანატრელი ქართული ფეხბურთი ვიხილეთ! მადლობა ამისთვის ბათუმელებს!

1. დინამო (ბთ) 10 7 1 2 15:8 22
2. საბურთალო 10 7 0 3 23:16 21
3. ტორპედო 9 5 2 2 11:8 17
4. დინამო (თბ) 9 5 1 3 15:7 16
5. ჩიხურა 9 3 5 1 12:7 14
6. ვიტ ჯორჯია 9 3 2 4 5:8 11
7. სიონი 9 3 2 4 12:18 11
8. ლოკომოტივი 10 3 0 7 12:17 9
9. დილა 9 2 2 5 7:10 5
10. რუსთავი 10 0 3 9 6:19 3

ბომბარდირები
ჯ. უგულავა (სიონი) 6
ო. როლოვიჩი (საბურთალო) 6
ლ. შენგელია (დინამო თბ) 5
ლ. შინდაგორიძე (საბურთალო) 5
გ. დიასამიძე (საბურთალო) 5
ყოველდღიური სპორტული გაზეთი "ლელო"
1533
მკითხველის კომენტარები / 0 /
მსგავსი ამბები
რუბრიკის სხვა სიახლეები
;