[ანალიზი, VIDEO] ეროვნული ლიგა. დინამო (თბ) 1-0 ჩიხურა. გამარჯვება ულამაზესი გოლით და გაწითლებული ენდშპილი

დინამო (თბ)-ჩიხურა  1:0
23.06. თბილისი. დინამო არენა
1:0 ნინუა (80)
დინამო (4-2-3-1): პერალესი - კაპლიენკო (28. კობოური), მონხილი, მეჯუბი, იაშვილი - პაპავა (52. კუხიანიძე), ივანისენია (60. ქარდავა) - შულაია, ნინუა, შენგელია - კუტალია
სათადარიგოები: კუტალაძე, რუხაია, ზარია, აზაროვი
მწვრთნელი: ფელის ვისენტე
ჩიხურა (4-4-2): ჰამზიჩი - კორიფაძე, კაშია, მაისაშვილი, მეგრელიშვილი - დეკანოიძე (72. ფანცულაია), მამასახლისი (84. იონანიძე), ჩიკვაიძე (51. ჩიხლაძე), სარდალიშვილი - მარკოზაშვილი, მახარობლიძე
სათადარიგოები: მწყერაშვილი, კამლაძე
მწვრთნელი: სოსო ფრუიძე
გაფრთხილებები: ჩიკვაიძე (43), ნინუა (46), კაშია (79)
გაძევება: კაშია (87), ნინუა (89)
არბიტრი: ტ. რუხაია 




თბილისის "დინამო"-"ჩიხურას” მატჩი სატურნირო კუთხითაც მნიშვნელოვანი იყო და ელემენტარულად, საინტერესო იყო, რა მდგომარეობაში იმყოფებიან ევროპალიგის მონაწილე ქართული გუნდები...

თბილისის "დინამო" და "ჩიხურა" გამოეხმაურნენ ანტისაოკუპაციო აქციას და ორივე გუნდი მოედანზე სპეციალურად დამზადებული მაისურებით გამოჩნდა...


საინტერესო ცვლილება

ცხადია, ამ გუნდების ურთიერთშეხვედრაში უპირატესობა “დინამოს” მხარეს იყო (16 მოგება, 5 ფრე, 5 მარცხი), მაგრამ სოსო ფრუიძის გაწვრთნილები თბილისელთათვის მაინც უხერხული მეტოქეები არიან...

საინტერესო იყო ცვლილება, რომელიც “დინამოს” ძირითად შემადგენლობაში მოხდა - უკრაინელმა ახალწვეულმა ოლექსანდრ კაპლიენკომ მარჯვენა მცველად ითამაშა, ხოლო გუნდის კაპიტანმა გუჯა რუხაიამ სათადარიგოებში გადაინაცვლა - ეს პირველი თვალშისაცემი ცვლილება იყო. დინამოელთა განაცხადში ჯერჯერობით არ იყო სენეგალელი შემტევი ნახევარმცველი არფანგ დაფე.

მატჩამდე საჩხერელებმა საგანგებო პრიზით დააჯილდოვეს შოთა კაშია, რომელიც “ჩიხურაში” 2012 წლიდანაა და გუნდის ფორმით 200 მატჩი ჩაატარა. მაგრამ საჩხერელთა კაპიტნისთვის საიუბილეო მატჩი უიღბლო გამოდგა...

სად იყო ტემპი?

სიცხემ თამაშზე დიდი გავლენა მოახდინა, ფეხბურთელები ნელა მოძრაობდნენ... თამაში დინამოელთა შეტევებით დაიწყო და მე-8 წუთზე მათ ანგარიშის გახსნაც შეეძლოთ. ნოდარ იაშვილის ჩაწოდების შემდეგ საჯარიმოში ლევან კუტალია გაიხსნა და უკეთესად რომ დაერტყა, ანგარიშს გახსნიდა. დინო ჰამზიჩმა კი პოზიცია ზუსტად შეარჩია და გუნდი გადაარჩინა.

მე-15 წუთზე ლევან შენგელიამ მშვენივრად ითამაშა, საჯარიმოსთან სამი მცველი ეფექტურად ჩამოიშორა და კარში დაარტყა, მაგრამ ჰამზიჩმა საიმედოდ ითამაშა. ზუსტად ერთ წუთში საჩხერელებს უკვე ნიკა ნინუა დაემუქარა და სტუმართა ბოსნიელ მეკარეს ვერც მან აჯობა.
საჩხერელებმა პირველად მე-20 წუთზე შეუტიეს, მაგრამ ბესიკ დეკანოიძის დარტყმა ხოსე პერალესმა იოლად დაამიწა და უნდა ითქვას, რომ ესპანელ კიპერს პირველ ტაიმში ბევრი საქმე არც ჰქონია.

26-ე წუთზე დინამოელთა ახალწვეული კაპლიენკო დაშავდა და თბილისელთა მწვრთნელი ჩისკო მუნიოსი იძულებული გახდა, ის დავით კობოურით შეეცვალა.

36-ე წუთზე ვიქტორ მონხილმა ჯარიმა სახიფათოდ დაარტყა და ჰამზიჩმა ბურთი კუთხურზე მოიგერია. შესვენებამდე კი ბოლო შეტევა ლევან შენგელიამ განახორციელა, რომელმაც ჰამზიჩს ასევე ვერ აჯობა.

რითი დაგვამახსოვრდა თამაშის ბოლო?

მეორე ტაიმში საჩხერელები ოდნავ გააქტიურდნენ, მაგრამ “დინამოს” ვერაფერი დააკლეს - მასპინძლებმა მიზანს მაინც მიაღწიეს.

68-ე წუთზე საჩხერელებმა უმწვავესი შეტევა წამოიწყეს - თემურ მარკოზაშვილმა საჯარიმოში შეტევა მიხეილ სარდალიშვილს გაუგრძელა, რომელმაც კარის წინ გახსნილი ბიძინა მახარობლიძე მოძებნა. ამ უკანასკნელის დარტყმული კი კარს ასცდა - მშვენიერი შანსი დაკარგა.

საპასუხო შეტევა 70-ე წუთზე “დინამომ” წამოიწყო, რომლის დაგვირგვინებაც ბაქარ ქარდავამ სცადა, მაგრამ მიზანს ოდნავ ააცილა.

77-ე წუთზე გიორგი ფანცულაიამ საჯარიმოში ბურთი მახარობლიძეს შეაყოლა, რომელმაც სახიფათოდ კი დაარტყა, მაგრამ მიზანს მცირედით ააცილა და ვერ გაიტანა.

ანგარიში მატჩის მიწურულს ნიკა ნინუამ გახსნა - თბილისელთა ნახევარმცველმა იუველირის სიზუსტით შეასრულა საჯარიმო დარტყმა და ჰამზიჩს შანსი არ დაუტოვა - ულამაზესი გოლი იყო!

ენდშპილი კი ორი წითელი ბარათით დაგვამახსოვრდა. 87-ე წუთზე მეორე ყვითლისთვის (ნინუასთან უხეშობისთვის მიიღო) ჯერ შოთა კაშია გააძევეს, ორ წუთში კი მის გზას მატჩის გმირი ნინუაც გაუყოლეს.

საინტერესო დამთხვევაა - წელს “ჩიხურას” სამი მოთამაშე გააძევეს - დავით მაისაშვილი, რეზო ჩიტეიშვილი და შოთა კაშია და სამივე წითელი ბარათი თბილისის “დინამოსთან” შეხვედრაში უჩვენეს. 

ფოტოები fcdinamo.ge და ჩიხურას ოფიციალური ფეისბუქგვერდი

405
მკითხველის კომენტარები / 0 /
მსგავსი ამბები
რუბრიკის სხვა სიახლეები
;