[ანალიზი, VIDEO] ეროვნული ლიგა. დინამო (თბ) 1-3 ლოკომოტივი. სერიოზული კრიზისი თუ დროებითი ჩავარდნა?

დინამო (თბ)-ლოკომოტივი      1:3
15.05. თბილისი. დინამო არენა
0:1 სამურკასოვი (24. უბილავას პასით), 1:1 ნინუა (54), 1:2 ინჯგია (78. სამურკასოვის პასით),1:3 სიხარულიძე (90. ინჯგიას პასით)
დინამო (4-2-3-1): სიკაჩი (26. პერალესი) - რუხაია, მონხილი, კობოური, იაშვილი (80. როხანო) - პაპავა, ნინუა - აზაროვი, კუხიანიძე (46. ქარდავა), შულაია - კუტალია
სათადარიგოები: ივანისენია, დარცმელია, ძოწენიძე, მოისწრაფიშვილი
ლოკომოტივი (4-2-3-1): ბულისკერია - უბილავა, . ჭანტურია, გურეშიძე, კომახიძე - ძებნიაური, შონია - . კირკიტაძე (86. ჯიქია), სამურკასოვი (90. გვალია), . კობახიძე (66. ინჯგია) - სიხარულიძე
სათადარიგოები: შეროზია, ჯაფარიძე, შეყილაძე, გოროზია
მწვრთნელი: ლევან კორღალიძე
არბიტრი: . მაჭარაძე


დედაქალაქური დერბი ხშირ შემთხვევაში ძალიან დაძაბულად მიმდინარეობს და გამონაკლისი არც ეს შეხვედრა უნდა ყოფილიყო. მით უმეტეს, ბოლო დროს ორივე გუნდი, განსაკუთრებით კი "ლოკომოტივი", ვერ აჩვენებს იმ შედეგებს, რომელსაც მისგან ელიან გულშემატკივრები.

სანამ უშუალოდ თამაშის ანალიზზე გადავიდოდეთ, ვთქვათ, რომ "დინამოს" დისკვალიფიკაციის გამო დააკლდა ერთ-ერთი ლიდერი ლევან შენგელია. რა თქმა უნდა, ამ დანაკლისის კომპენსირება იოლი არ იყო...

აქაც მე ვარ, იქაც მე ვარ...

შეხვედრა "ლოკომოტივის" აქტიურობით დაიწყო. ლევან კორღალიძის შეგირდები ბედს შეტევაში ეძებდნენ და "დინამოს" კართან რამდენჯერმე ძალიან დაცხა. თითქმის ყველა სახიფათო ეპიზოდი ახალგაზრდა "რკინიგზელის", თორნიკე კირკიტაძის შესანიშნავ გარჯას მოჰყვა.

ერთ-ერთ სიტუაციაში "ლოკომოტივის" ფეხბურთელები 11-მეტრიანს ითხოვდნენ. ისინი მიიჩნევდნენ, რომ "დინამოს" კაპიტან გუჯა რუხაიას საჯარიმოში ხელზე მოხვდა ბურთი, მაგრამ არბიტრმა პაატა მაჭარაძემ თამაშის გაგრძელება ბრძანა.

ეს იყო და, "ლოკომოტივმა" ლამის 100-პროცენტიანი მომენტი შექმნა. ირაკლი სიხარულიძემ უაღრესად ხელსაყრელი მდგომარეობიდან ვერ გაიტანა. სხვა დროს და სხვა შემთხვევაში გამოცდილი ფორვარდი, ალბათ, იოლად გაიფორმებდა გოლს.

კანონზომიერი გოლი

24-ე წუთზე "ლოკომოტივი" სრულიად დამსახურებულად დაწინაურდა. კონტრშეტევა დავით უბილავამ წამოიწყო და დავით სამურკასოვს უპასა. რატომღაც, დინამოელთა მეკარე სტეფან სიკაჩმა კარი დატოვა და ამ დროს ფეხი დაუცდა, კარი ცარიელი დარჩა და სამურკასოვმა მშვიდად გახსნა ანგარიში.

გოლი გოლად და, ამ ეპიზოდის შემდეგ შესაცვლელი შეიქმნა "დინამოს" მოლდოველი მეკარე - როგორც აღმოჩნდა, კარიდან გამოსვლის დროს მან ტრავმა მიიღო და ადგილი ესპანელ ხოსე პერალესს დაუთმო. "რატომღაც" - ტყუილად არ ვთქვით ზემოთ: სრულიად გაუგებარი იყო, რატომ გამოვარდა სიკაჩი კარიდან?..

ტაიმი სტუმართა უდიდესი სათამაშო და ტერიტორიული უპირატესობით გაგრძელდა. კირკიტაძემ ერთხელაც გაილაღა შეტევის მარჯვენა ფლანგზე და ჩააწოდა კიდეც. უფრო სწორად რომ ვთქვათ, ჩაწოდება დარტყმად ექცა - პერალესი ფხიზლად იყო.

პირველი ტაიმი უსუსტესი იყო არათუ თანამედროვე "დინამოს", არამედ, ზოგადად, "დინამოს" ისტორიაში...

ასე გამოიღვიძა დინამომ...

რა თქმა უნდა, ასე გაგრძელება აღარ შეიძლებოდა და "დინამო" გამოცოცხლდა. ამას ხელი შეუწყო დინამოელთა სამწვრთნელო შტაბის ქმედებამაც. გიორგი კუხიანიძის ნაცვლად მინდორზე გასული ბაქარ ქარდავა თამაშში აქტიურად ჩაერთო.

54-ე წუთზე ანგარიში გათანაბრდა. ნიკა ნინუამ შესანიშნავად შეასრულა "სტანდარტული", ბურთი ძელს გაეხახუნა და ისე შევარდა ექსდინამოელი დემეტრე ბულისკერიას კარში - 1:1.

მალევე, მოვლენების ეპიცენტრში ლევან კუტალია მოექცა. მან პარტნიორის პასი მიიღო, რამდენიმე მეტოქეს გასცდა და მახვილი კუთხიდან დაარტყა კიდეც, თუმცა... ბულისკერიას ვერ აჯობა.

შეცვლის ფასი

...66-ე წუთი მიდიოდა, როცა მინდორზე "ლოკომოტივის" ახალგაზრდა "ვინგერი" რევაზ ინჯგია გამოჩნდა. ის ძალიან აქტიურად ჩაერთო თამაშში და მალევე გაიტანა კიდეც. შეხვედრის საუკეთესო მოთამაშემ, დავით სამურკასოვმა, რევაზს შესანიშნავი პასი უბოძა და ამ უკანასკნელსაც სიზუსტემ არ უმტყუნა.

90-ე წუთზე ყველაფერი დასრულდა! წერტილი ირაკლი სიხარულიძის გოლმა დასვა და ეს იყო ამ შეხვედრის ლოგიკური ფინიში. "დინამოში" კრიზისია. დიდია ეს კრიზისი, თუ საქმე დროებით ჩავარდნასთან გვაქვს, ამას ახლო მომავალში ვნახავთ.

1. საბურთალო 13 9 0 4 28:21 27
2. დინამო (ბთ) 13 8 1 4 20:14 25
3. ტორპედო 13 7 2 4 20:16 23
4. დინამო (თბ) 13 6 2 5 25:16 20
5. სიონი 13 6 2 5 18:25 20
6. ჩიხურა 13 4 7 2 15:11 19
7. დილა 13 5 2 6 12:12 17
8. ლოკომოტივი 13 4 0 9 16:22 12
9. ვიტ ჯორჯია 13 3 2 8 7:14 11
10. რუსთავი 13 2 4 7 12:22 10

ბომბარდირები
ჯ. უგულავა (სიონი) 8
ლ. კუტალია (დინამო თბ) 7
ლ. შინდაგორიძე (საბურთალო) 7
ო. როლოვიჩი (საბურთალო) 6
ვ. ისიანი (სიონი) 6
ბ. ზივზივაძე (ტორპედო) 6

მომდევნო ტური
კვირა, 19 მაისი
სიონი-ჩიხურა 17:00
ლოკომოტივი-დილა 19:00
დინამო (ბთ)-ვიტ ჯორჯია 21:00
ორშაბათი, 20 მაისი
რუსთავი-ტორპედო 19:00
საბურთალო-დინამო (თბ) 21:00
ყოველდღიური სპორტული გაზეთი "ლელო"
746
მკითხველის კომენტარები / 0 /
მსგავსი ამბები
რუბრიკის სხვა სიახლეები
;