[ანალიზი, VIDEO] ეროვნული ლიგა. დინამო (თბ) 5-1 სიონი. რევანში წვიმაში, ანუ წყალბურთი ფეხბურთის ელემენტებით

დინამო (თბ)-სიონი      5:1
04.05. თბილისი. დინამო არენა
1:0 კუტალია (4), 2:0 პაპავა (25. ნინუას პასით), 2:1 . ისიანი (27), 3:1 კუტალია (60. შენგელიას პასით), 4:1 ქარდავა (85. ნინუას პასით), 5:1 მონხილი (90+1. აზაროვის პასით)
დინამო (4-2-3-1): პერალესი - იაშვილი, მეჯუბი, მონხილი, რუხაია - ნინუა, პაპავა - შენგელია (73. კარბია/83. აზაროვი), კუხიანიძე (78. ქარდავა), შულაია - კუტალია
სათადარიგოები: სიკაჩი, კობოური, ზარია, ივანისენია
მწვრთნელი: ფელის ვისენტე
სიონი (4-2-3-1): . ისიანი - ჩაჩუა, თომაშვილი, აფაქიძე, სუხიაშვილი - თარხნიშვილი, ხმალაძე (72. რაჟამაშვილი) - . კირკიტაძე (46. თარგამაძე), ქიქავა (63. მაქაცარია), . ისიანი - უგულავა
სათადარიგოები: ზარქუა, ტვილდიანი, ხეცურიანი, სიხარულია
მწვრთნელი: თემურ შალამბერიძე
გაფრთხილება: უგულავა (12), ხმალაძე (35), ჩაჩუა (89)
არბიტრი: . კვირიკაშვილი


ეროვნული ლიგის ტრადიციული ბინადრების მატჩი დაძაბული უნდა გამოსულიყო. "დინამო" ბოლო დროს შედარებით არათანაბრად თამაშობდა. "სიონმა" კი იპოვა საკუთარი თამაში, რაზეც საკუთარ "თამაზ სტეფანიაზე" ქუთაისის "ტორპედოს დამარცხება მეტყველებს. თანაც, "დინამო" რევანშის წყურვილით იწვოდა პირველ წრეში ბოლნისში განცდილი მარცხის (1:2) გამო...

მისალმებაც არ აცადეს

"დინამო არენას" მინდორზე ბურთის გაგორება ძალიან ჭირდა. ყველაფერში დამნაშავე კოკისპირული წვიმაა, რომელიც არც მატჩის მსვლელობის დროს შეწყვეტილა. "დინამომ" ისე გაიტანა, როგორც იტყვიან, მეტოქეს მისალმებაც არ აცალა...

გოლი ახლო მანძილიდან გაიტანა ლევან კუტალიამ. ბოლნისელები თამაშგარე მდგომარეობის დაფიქსირებას ითხოვდნენ, მაგრამ არბიტრმა ირაკლი კვირიკაშვილმა მიანიშნა, რომ დინამოელს ბურთი ბოლნისელთა მცველისგან მიუვიდა (გამეორებაზეც კარგად ჩანს) და გოლი ჩათვალა.

იქვე, ვილი ისიანი გაიხსნა კარგად "დინამოს" კართან და რომ არა წყლისგან გაღღენთილი გრუნტი, ანგარიში ძალიან დიდი ალბათობით გათანაბრდებოდა. პირველივე წუთებიდან გამოჩნდა - ფეხბურთელები შექმნილ ვითარებაში წყალბურთს უფრო ითამაშებდნენ, ვიდრე ფეხბურთს...

25-ე წუთზე თბილისელთა უპირატესობა ორბურთიანი გახდა. ნიკა ნინუამ კარგად შეასრულა "სტანდარტი", თავზე დაასვა ბურთი გიორგი პაპავას და ამ უკანასკნელმაც მძლავრად დასცხო "ცხრიანში".

"სიონი" არ შეურიგდა შექმნილ ვითარებას. ვილი ისიანმა მეტოქის კარისგან, ერთი შეხედვით, საკმაოდ შორს მოიხელთა ბურთი და დაარტყა კიდეც. "დინამოს" მეკარის რეაქციიდან ჩანდა, რომ დარტყმისას თითქოს მცირე "რიკოშეტი" იყო, რადგან ხოსე პერალესმა ცოტა გაუგებარი მოძრაობა გააკეთა და ბურთი კარში შევარდა - 2:1.

ძელი და ხარიხა

ტაიმის ბოლო მონაკვეთი "დინამომ" ძალიან კარგად ჩაატარა. "სიონი" შეტევას დიდი ძალებით ცდილობდა. "დინამო" კი ძალიან სახიფათოდ მოქმედებდა კონტრშეტევებზე. თბილისელებს ორი, ლამის 100-პროცენტიანი მომენტი ჰქონდათ გასატანად.

გიორგი კუხიანიძისა და ლევან შენგელიას დარტყმების შემდეგ ბურთი ბოლნისელთა კარის ძელსა და ხარიხას მოხვდა. საბოლოო ჯამში, ამინდის გათვალისწინებით, პირველ ტაიმში მომენტები საკმაოზე მეტი ვიხილეთ.

დუბლი და მეშვიდე

მეორე ტაიმი "დინამოს" მიერ შექმნილი კიდევ ერთი საგოლე მომენტით დაიწყო. კუტალია აღმოჩნდა ხელსაყრელ სიტუაციაში და მეკარეს ბურთი თავზე გადაუგდო, მაგრამ მცველმა ვითარება განმუხტა.

მერე ნიკა აფაქიძე ცდილობდა საჯარიმოში სიტუაციის განმუხტვას და ბრძოლაში წაიქცა. ძნელი სათქმელია, შეეხო თუ არა ის ბურთს ხელით და მანამდე იყო თუ არა ჯარიმა, მაგრამ არბიტრმა თამაშის გაგრძელება ბრძანა.

თამაშის დასრულებამდე ნახევარი საათი იყო დარჩენილი, როცა "დინამოს" უპირატესობა კვლავ ორბურთიანი გახდა - შენგელიამ კუტალიას გადააწოდა ბურთი, ამან ისევ შენგელიას დაუბრუნა, მერე ისევ კუტალიასთან აღმოჩნდა ბურთი, ბოლოს ერთი ცრუ მოძრაობა და მეკარე უძლურია - 3:1.

რევანში

მატჩის დასრულებამდე ათიოდე წუთით ადრე ტრავმა მიიღო შეცვლაზე შესულმა ფრან კარბიამ, რომელიც ირაკლი აზაროვმა ჩაანაცვლა. ჭაბუკმა დინამოელმა, ვისაც დიდ მომავალს უწინასწარმეტყველებენ, მესამე მატჩში მიიღო მონაწილეობა და მეორე საგოლე პასი მიითვალა, მაგრამ მანამდე...

"დინამო" არ გაჩერდა. მორიგი კუთხური "სიონის" კართან და ნინუას მორიგი საგოლე პასი - ბაქარ ქარდავას საკმაოდ რთული სიტუაციიდან გააქვს თავით.

და ბოლოს - 5:1. აზაროვმა კუთხურიდან თავზე დაასვა ბურთი ვიქტორ მონხილს და ესპანელმა მცველმაც უზადოდ შეასრულა დარტყმა - "დინამო არენაზე" სრულფასოვანი რევანში შედგა!

784
მკითხველის კომენტარები / 0 /
მსგავსი ამბები
რუბრიკის სხვა სიახლეები
;