[ანალიზი, VIDEO] ეროვნული ლიგა. ვიტ ჯორჯია 0-1 სიონი. ერთი შეცდომის ფასი

ვიტ ჯორჯია-სიონი    0:1
14.05. თბილისი. მიხეილ მესხი (სათ)
0:1 კირკიტაძე (87)
ვიტ ჯორჯია (3-5-2): . ქავთარაძე - გეთიაშვილი (67. . გაფრინდაშვილი), ჩაკვეტაძე, სეხნიაშვილი - ღუდუშაური, ვასაძე (73. მოსიაშვილი), კურდღელაშვილი (53. ზარიძე), კაკაშვილი, ლაცაბიძე - მუსელიანი, ღირდალაძე
სათადარიგოები: . შეროზია, ვაზაგაშვილი, მუჯირი, საჯაია
მწვრთნელი: ვლადიმერ ხაჩიძე
სიონი (4-2-3-1): . ისიანი - ჩაჩუა, აფაქიძე, უგრეხელიძე, სუხიაშვილი - თარხნიშვილი, ხმალაძე - . კირკიტაძე (90. ხეცურიანი), . ისიანი, თარგამაძე (62. სიხარულია) - უგულავა (62. მაქაცარია)
სათადარიგოები: ზარქუა, ტვილდიანი, ქიქავა, რაჟამაშვილი
მწვრთნელი: თეიმურაზ შალამბერიძე
გაფრთხილებები: თარხნიშვილი (45)
არბიტრი: . ნონიკაშვილი


ეს მატჩი ცხადი მაგალითია იმისი, თუ რამხელა მნიშვნელობა აქვს ფეხბურთში მარტივ და საიმედო თამაშს და რომ შეიძლება, გუნდი ერთი შეცდომისთვისაც მკაცრად დაისაჯოს...

რთული მისია

"ვიტ ჯორჯია" აუტსაიდერთა შორისაა და მისი მოთამაშეები მოედანზე დიდი მოტივაციით გავიდნენ. მათ მთელი თამაში ისე ჩაატარეს, მეტოქეზე ნაკლები არც მომენტები შეუქმნიათ და ქულასაც მათზე არანაკლებ იმსახურებდნენ. მაგრამ კიდევ ერთხელ გამოჩნდა, რომ "ვეტერინარებს" საგოლე მომენტების რეალიზიცია ძალიან უჭირთ და ამის გამო კიდევ ერთხელ იზარალეს.

საერთოდ, გუნდს შემსრულებლების ნაკლებობა ეტყობა. მართალია, ეროვნული ლიგა 2-დან გადმოსვლის შემდეგ ვიტელებმა მოთამაშეები დაიმატეს, მაგრამ ეს მთავარ ლიგაში საკმარისი არ არის. შემსრულებლების გარეშე კი მოგება და წინსვლა ძალიან რთულია.

ზოგადად, "მიხეილ მესხის" სათადარიგო მინდორზე ისეთი ფეხბურთი ვიხილეთ, როგორიც უმაყურებლო თამაშს შეშვენის - საინტერესო, დაძაბული და ბევრი ორთაბრძოლით, მაგრამ ნაკლები ფეხბურთით და კიდევ უფრო ნაკლები სანახაობით.

მაყურებლისა და შესაფერისი გარემოს გარეშე ფეხბურთი უფერულია. ქომაგი ამ ბიჭების თამაშს სხვა ელფერს შეჰმატებდა...

გამოუყენებელი მომენტები

მასპინძლებმა თამაში აქტიურად დაიწყეს და დასწყისშივე ორი კარგი მომენტი შექმნეს, მაგრამ ანგარიშის გახნის ამ რეალური შესაძლებლობებით ვერ ისარგებლეს. "ვიტ ჯორჯიამ" მომენტი პირველივე წუთზე შექმნა: გიორგი ვასაძის დარტყმა მეკარე ლევან ისიანმა მოიგერია, დამატებაზე კი კარის აღებას ზურაბ მუსელიანი ცდილობდა - მას ბოლნისელთა მცველი რომან ჩაჩუა გადაეფარა და გუნდი აშკარა გოლისგან იხსნა.

მე-7 წუთზე, ალეკო ჩაკვეტაძის ჩაწოდებული ბურთი ახლოდან კარში გიორგი გეთიაშვილმა გაგზავნა და მიზანს ააცილა.

ბოლნისელებმა პირველი მეტნაკლებად სახიფათო შეტევა 25-ე წუთზე განახორციელეს - ვილი ისიანმაც ოდნავ ააცილა მიზანს.

27-ე წუთზე "სიონი" კიდევ ერთხელ გადარჩა: კუთხურიდან მოწოდებულ ბურთს ახლოდან კარში ჩაკვეტაძე გზავნიდა და სტუმრები ძელმა იხსნა.

31-ე წუთზე საკამათო მომენტი იყო: ზურაბ ღირდალაძე საჯარიმოში ნიკა აფაქიძესთან ბრძოლის დროს წაიქცა, მაგრამ არბიტრმა პენალტის მოთხოვნა უსაფუძვლოდ ჩათვალა და თამაში გააგრძელა.

ერთ წუთში "სიონს" შანსი მიეცა: ჩაკვეტაძე შეტევის მოგერიებისას შეცდა და საჯარიმოში ბურთი ვილი ისიანს მიუგორა, რომელიც მეკარესთან პირისპირ რჩებოდა, მაგრამ კუთხე შეამცირა, მცველიც გადაეფარა და სტუმართა პირველი მშვენიერი შანსი გაანიავა.

42-ე წუთზე, დავით კირკიტაძის მიერ განვითარებული შეტევის დაგვირგვინებას ისევ ისიანი შეეცადა და ამჯერადაც უშედეგოდ.

როგორ მიეპარა ზურგიდან...

მეორე ტაიმში ორივე გუნდი ფრთხილად თამაშობდა და მეტოქეებმა საგოლე მომენტი მხოლოდ რამდენჯერმე შექმნეს: 71-ე წუთზე, ზვიად სიხარულიამ კარის წინ ვილი ისიანი მოძებნა, რომელმაც ახლოდან მიზანს ააცილა და რეალური შანსი გაფლანგა.

83-ე წუთზე "ვიტ ჯორჯია" მიზანთან ახლოს იყო: აკაკი კაკაშვილის ძლიერი დარტყმის შემდეგ ბურთს სტუმართა მცველი გადაეღობა, ხოლო რიკოშეტის შემდეგ ძელმა აისხლიტა.

მომენტების გამოუყენებლობისთვის მასპინძელი მკაცრად დაისაჯა. თუმცა, ერთი შეხედვით, 87-ე წუთზე განვითარებული იერიში საშიში არ ჩანდა: ისიანმა მარცხენა ფლანგიდან ბურთი საჯარიმოში ჩაჰკიდა, გიორგი ლაცაბიძე ბურთს მკერდით იგერიებდა და ვერ შენიშნა, როგორ წამოეპარა ზურგიდან დავით კირკიტაძე. "სიონის" შემტევი უცებ გაერკვა სიტუაციაში და ბურთი "ცხრიანში" მოარტყა.

ბოლნისელებმა ზედიზედ მეორე გამარჯვება მოიპოვეს, "ვიტ ჯორჯია" კი ზედიზედ მეოთხედ დამარცხდა. 

1. საბურთალო 13 9 0 4 28:21 27
2. დინამო (ბთ) 12 8 1 3 20:13 25
3. ტორპედო 13 7 2 4 20:16 23
4. დინამო (თბ) 12 6 2 4 24:13 20
5. სიონი 13 6 2 5 18:25 20
6. ჩიხურა 12 4 6 2 15:11 18
7. დილა 12 4 2 6 11:12 14
8. ვიტ ჯორჯია 13 3 2 8 7:14 11
9. ლოკომოტივი 12 3 0 9 13:21 9
10. რუსთავი 12 2 3 7 12:22 9
646
მკითხველის კომენტარები / 1 /
ნიკა
0
დაისაჯა ვიტ ჯორჯია , იცით რატომ?! მეკარეს რომელსაც ეროვნეულ ლიგაში ყველაზე ნაკლები გოლი აქვს გაშვებული,იმის ფონზე თუ რომელ ადგილზეა დღეს გუნდი,სვამ სკამზე ერთი ჩაგდებული მატჩის გამო,რათქმაუნდა დაისჯევბოდა,უსამართლოდ მოექცნენ შეროზიას ,საუბარი არც მაქ არაკაც ფეხბურთელებზე ზოგიერთებზე რათქმაუნდა. “მაგრამ ღმერთი არ გასწირავს კაცსაა თქვენგან განაწირსაო” ნათქვამია ;)
მსგავსი ამბები
რუბრიკის სხვა სიახლეები
;