[ანალიზი, VIDEO] ეროვნული ლიგა. ვიტ ჯორჯია 0-3 საბურთალო. კოხრეიძის გაბრწყინება და ლიდერის მორიგი სამი ქულა

ვიტ ჯორჯია-საბურთალო      0:3
08.04. თბილისი. მიხეილ მესხი (სათ)
0:1 კოხრეიძე (52), 0:2 შინდაგორიძე (72. კოხრეიძის პასით), 0:3 კაკუბავა (76. კოხრეიძის პასით)
ვიტ ჯორჯია (4-3-3): . შეროზია - . გაფრინდაშვილი, გეთიაშვილი, ჩიტიშვილი, კიკნაველიძე (70. მუჯირი) - ვასაძე, კურდღელაშვილი, მაისურაძე (60. ლაცაბიძე) - ღუდუშაური, კაკაშვილი, მუსელიანი (60. მოსიაშვილი)
სათადარიგოები: . ქავთარაძე, ვაზაგაშვილი, საჯაია, სეხნიაშვილი
მწვრთნელი: ვლადიმერ ხაჩიძე
საბურთალო (4-2-3-1): მიგინეიშვილი - ჩაბრაძე, მარგველაშვილი, კაკუბავა, ლაკვეხელიანი - ტერა, ალთუნაშვილი (77. გვარაძე) - შინდაგორიძე, დიასამიძე (73. გორგიაშვილი), კოხრეიძე - დვალიშვილი (73. როლოვიჩი)
სათადარიგოები: შელიხოვი, მალი, ნადარაია, ცნობილაძე
მწვრთნელი: გიორგი ჭიაბრიშვილი
გაფრთხილებები: ალთუნაშვილი (36), მაისურაძე (55), ჩიტიშვილი (59)
არბიტრი: . კიკაჩეიშვილი


ეს ორი გუნდი ქართული ფეხბურთის ისტორიაში უკვე შევიდა, როგორც ყველაზე ახალგაზრდა ჩემპიონი. მაგრამ პარადოქსია, რომ 2019 წლის 8 აპრილამდე ერთმანეთთან არასოდეს ეთამაშათ. როცა "ვიტ ჯორჯია" პირველ ლიგაში დაქვეითდა, "საბურთალო" უმაღლესში დაწინაურდა და ერთმანეთს ახლაღა ეკვეთნენ...

კარგ განწყობაზე...

მოქმედი ჩემპიონი კარგ განწყობაზე ხვდებოდა ამ დაპირისპირებას. მეექვსე ტურის შემდეგ, გიორგი ჭიაბრიშვილის გუნდმა უშუალო მეტოქეებთან სხვაობა ხუთ ქულამდე გაზარდა და პირველი წრის დასრულებამდე ოთხი ტურით ადრე ჩემპიონატს ერთპიროვნულად და დამაჯერელებლად ლიდერობდა.

რაც შეეხება "ვიტ ჯორჯიას", გუნდმა ბოლო სამი თამაშიდან ერთიც ვერ მოიგო და მოედანზე გამარჯვების იმედად გავიდა. ეგაა, "ვეტერინარებს" დისკვალიფიკაცირებული ზურაბ ღირდალაძე და ცენტრალური მცველი ალეკო ჩაკვეტაძე დააკლდათ...

გარდამავალი უპირატესობა დაზვერვით

პირველ ტაიმი გარდამავალი უპირატესობით მიმდინარეობდა. გუნდები ერთმანეთს აკვირდებოდნენ, თუ საიდან უღირდათ შეტევა. "ვიტ ჯორჯია" მოქმედი ჩემპიონის პლუსების განეიტრალებას მაღალი პრესინგით შეეცადა.

 "საბურთალო" კი ბურთის კონტროლს მაინც ახერხებდა და პირველი მეტ-ნაკლებად სახიფათო მომენტი მე-18 წუთზე შექმნა, როცა კარში სანდრო ალთუნაშვილმა დაარტყა, მაგრამ ჯონი შეროზია ბურთს ადგილზე დახვდა. 24-ე წუთზე, ლადო დვალიშვილმა საჯარიმოსთან კარგად დაუგდო ბურთი ლაშა შინდაგორიძეს, რომელმაც ძლიერად, მაგრამ არაზუსტად "გაისროლა".

26-ე წუთზე "საბურთალო" გადარჩა: საინტერესო მცველია ნოდარ კიკნაველიძე, რომელიც შეტევებს ხშირად ამწვავებს. მან მარცხენა ფლანგიდან შეუტია და ბურთი საჯარიმოში ჩაჰკიდა, სადაც პაატა ღუდუშაური ურტყამდა კარში, მაგრამ მცველი ლუკა ლაკვეხელიანი ზურგით გადაეფარა ბურს და გუნდი აშკარა გოლისგან იხსნა.

 28-ე წუთზე ისევ ალთუნაშვილმა შეუტია, როცა მცველისგან მოგერიებული ბურთი კარისკენ გაუშვა, თუმცა მიზანს ამჯერადაც ააცილა. 29-ე წუთზე კი შინდაგორიძემ დაარტყა მოულოდნელად და ისევ შეროზიამ ივაჟკაცა.

მართალია, "ვიტ ჯორჯიას" უჭირს, მაგრამ ღუდუშაური ამ გუნდის ნამდვილი გამონათებაა. 29-ე წუთზე მან პატარა საფეხბურთო სპექტაკლი დადგა - ელვინ ტერას მოედნის ცენტრში აართვა ბურთი, კარისკენ დაიძრა, ორი მცველი ჩამოიშორა და გაიტანდა კიდეც, ბურთს ლევან კაკუბავა რომ არ გადაფარებოდა.

34-ე წუთზე ღუდუშაური მცველებს ისევ გასცდა და კარს კიდევ ერთხელ დაემუქრა, თუმცა - უშედეგოდ.

გავიდა კიდევ 5 წუთი და გეგა დიასამიძემ კარგი საფეხბურთო ინტელექტი გამოავლინა - როცა მისგან გადაცემას ელოდნენ, ბურთი კარში გაუშვა და შეროზიამ "ვიტ ჯორჯია" ნახტომში გადაარჩინა.

ეფექტური პირველი

მეორე ნახევარში "ვიტ ჯორჯია" სამ მცველზე გადაეწყო და სახიფათოდაც უტევდა. მაგალითად, 50-ე წუთზე კიკნაველიძის ძლიერი "გასროლა" კარს ოდნავ ასცდა.

ამ შეხვედრაშიც გამოჩნდა, რომ დვალიშვილი კარგ ფორმაში შედის. ის ბურთს მშვენივრად ანაწილებდა და შეტევებს კარგად ავითარებდა. 51-ე წუთზე, მისი მშვენიერი გადაცემის შემდეგ, კარის წინ გახსნილმა ლაშა შინდაგორიძემ დაარტყა. ბურთი, რომლის ჩაჭრას მცველი ცდილობდა, კარში წავიდა - შეროზიამ კარგი რეაქცია გამოავლინა და შეტევა მოიგერია.

"საბურთალომ" იერიში გააგრძელა. კუთხურიდან მოწოდებული ბურთი კარში ამჯერად დვალიშვილმა გაუშვა, შეროზიამ ისევ მოიგერია დარტყმული და პენალტის ნიშნულთან მარტო დარჩენილმა გიორგი კოხრეიძემ ნახევარბრუნში ულამაზესი დარტყმით ბურთი პირდაპირ "ცხრიანში" მოარტყა - 1:0.

53-ე წუთზე შინდაგორიძე ორ მცველს შორის ეფექტურად გაძვრა და კინაღამ მეორე გოლი გაიტანა.

თამაშის გადასარჩენად, "ვიტ ჯორჯიას" მთავარი მწვრთნელი ლაშა ფირცხალაიშვილი ვა-ბანკზე წავიდა და მოედანზე სამი შემტევი შეიყვანა. 72-ე წუთზე მისი გუნდი მიზანთან ახლოს იყო - გიორგი ლაცაბიძის შეტევას მცველი გადაეღობა და ბურთი მოიგერია, დამატებაზე გიორგი ვასაძემ დაარტყა და კარის ხაზიდან ბურთი ლაკვეხელიანმა გამოიტანა.

კოხრეიძე ვერ გააჩერეს

ეს ის შემთხვევა იყო, როცა კლასიკური "არ გაიტან, გაგიტანენ" ამოქმედდა - მძიმე შეტევის მოგერიების შემდეგ "საბურთალოს" თავდამსხმელი კოხრეიძე ბურთს საკუთარ საჯარიმოსთან დაეუფლა, უსწრაფესი კონტრშეტევა წამოიწყო, 60 მეტრი ირბინა, გზად სამი მცველი ჩამოიშორა და კარის წინ მშვენიერი გადაცემა გაუკეთა ლაშა შინდაგორიძეს, რომელმაც ზუსტად დაარტყა - 2:0.

...2017 წელს, "ლელოში" იტალიური "ევროსპორტის" წერილი ვთარგმნეთ, სადაც ჟურნალისტი ევროპულ კლუბებს ურჩევდა, ამ ტანმორჩილი ქართველისთვის ყურადღება მიექციათ. ბოლო სამი წელია კოხრეიძე ამტკიცებს, რომ მან ეს ავანსები დაიმსახურა და მისი სახით თანამედროვე, მებრძოლი და შრომისმოყვარე თავდამსხმელი გვეზრდება. მთავარია, ასე გააგრძელოს.

მალე "საბურთალომ" "ვეტერინართა" კარი მესამედაც აიღო და ამაშიც კოხრეიძე მონაწილეობდა. ლაკვეხელიანის მოწოდებული ბურთი თავით მოიგო და კარის წინ ლევან კაკუბავას დაუგდო, რომელმაც ახლოდან "საბურთალოს" მაისურით პირველი გოლი გაიტანა - 3:0.

1. საბურთალო 7 6 0 1 16:7 18
2. დინამო (თბ) 7 4 1 2 14:6 13
3. ტორპედო 7 4 1 2 9:7 13
4. დინამო (ბთ) 7 4 1 2 7:5 13
5. ჩიხურა 7 2 4 1 9:5 10
6. ვიტ ჯორჯია 7 2 2 3 3:6 8
7. სიონი 7 2 2 3 8:14 8
8. ლოკომოტივი 7 2 0 5 8:13 6
9. დილა 7 1 2 4 5:8 5
10. რუსთავი 7 0 3 4 5:13 3

ბომბარდირები
ლ. შენგელია (დინამო თბ) 5
ლ. შინდაგორიძე (საბურთალო) 5
ლ. კუტალია (დინამო თბ) 4
ო. როლოვიჩი (საბურთალო) 4
მ. სარდალიშვილი (ჩიხურა) 4
ჯ. უგულავა (სიონი) 4

მომდევნო ტური
პარასკევი, 12 აპრილი
დინამო (თბ)-დილა 19:00
ლოკომოტივი-სიონი 21:00
შაბათი, 13 აპრილი
ტორპედო-ვიტ ჯორჯია 16:00
რუსთავი-დინამო (ბთ) 19:00
საბურთალო-ჩიხურა 21:00

578
მკითხველის კომენტარები / 0 /
მსგავსი ამბები
რუბრიკის სხვა სიახლეები
;