[ანალიზი, VIDEO] ეროვნული ლიგა. ლოკომოტივი 1-0 საბურთალო. სერია შეწყდა, სერია გრძელდება

ლოკომოტივი-საბურთალო   1:0
25.06. თბილისი. მიხეილ მესხი (სათ)
1:0 სიხარულიძე (56. სამურკასოვის პასით)
ლოკომოტივი (4-3-3): ბულისკერია - უბილავა, . ჭანტურია, გურეშიძე, კომახიძე - შონია, ძებნიაური, გოროზია (68. გვალია) - სამურკასოვი, სიხარულიძე (90+1. შეყილაძე), ჯიქია (90+4. იაკობიძე)
სათადარიგოები: . შეროზია, ანდრონიკაშვილი, გვალია, გაბაძე, ბუიღლიშვილი
მწვრთნელი: ლევან კორღალიძე
საბურთალო (4-2-3-1): მიგინეიშვილი - მალი, მარგველაშვილი, რეხვიაშვილი,  ლაკვეხელიანი (63. ჩაბრაძე) - კაკუბავა (61. ტერა), ალთუნაშვილი - ვაგნერი, დიასამიძე, შინდაგორიძე (60. გაბედავა) - კოხრეიძე
სათადარიგოები: შელიხოვი, გრიგალაშვილი, გაბედავა, ჩაბრაძე, ცნობილაძე, გორგიაშვილი
მწვრთნელი: გიორგი ჭიაბრიშვილი
გაფრთხილებები: ძებნიაური (50), ჩაბრაძე (86), სამურკასოვი (88), მალი (90)
არბიტრი: . ყრუაშვილი


თბილისში ბევრი გუნდია, მაგრამ თუკი რომელიმე ორის დაპირისპირებას შეიძლება "ნამდვილი თბილისური დერბი" ვუწოდოთ, ეს "ლოკომოტივი"-"საბურთალოა". ამ წყვილში შედეგს წინასწარ ვერავინ გამოიცნობს...

დაცხა თბილისში...

დისკვალიფიკაციის გამო მატჩი მხოლოდ "ლოკომოტივის" ნახევარმცველმა ოთარ კობახიძემ გამოტოვა. ორივე გუნდი თამაშს შვიდ-შვიდმატჩიანი წაუგებელი სერიით შეხვდა და საინტერესო იყო, რომელი მათგანი მოახერხებდა წარმატებულ სხვლას...

ერთი დიდი და საერთო პრობლემა იყო გაუსაძლისი სიცხე, რომელმაც თამაშის ხასიათზე დიდი გავლენა მოახდინა. ისეთი ტემპი ვერ ვიხილეთ, როგორიც ამ გუნდების შეხვედრაში იშვიათობა არ არის.

პირველი სახიფათო შეტევა მე-5 წუთზე "საბურთალომ" განახორციელა: ლაშა შინდაგორიძე საჯარიმოს მიუახლოვდა და ზუსტად, მაგრამ სუსტად დაარტყა და მეკარე დემეტრე ბულისკერიას კარის დაცვა არ გასჭირვებია.

ანგარიშის გახსნის პირველი რეალური შანსი მე-13 წუთზე მასპინძლებს ჰქონდათ, როცა გიორგი გოროზიას დარტყმა გაგი მარგველაშვილმა მოიგერია და "ლოკომოტივის" თავდამსხმელმა დამატებაზე ახლოდან ვერ გაიტანა.

სახიფათო იყო 25-ე წუთზე ვაგნერ გონსალვეშის დარტყმა, რომელიც კარს ოდნავ ასცდა. პლუას ამას, შესვენებამდე კარის აღება გეგა დიასამიძემაც სცადა, მაგრამ მიზანს გვარიანად აააცილა.

ორი ბომბარდირი

მეორე ტაიმში პირველი მწვავე შეტევა მასპინძლებმა წამოიწყეს, მაგრამ დავით უბილავას გადაცემა მცველმა ჩაჭრა. მერე ვაგნერ გონსალვეში შეეცადა სახიფათო საჯარიმოდან ანგარიშის გახსნას და ეს მცდელობაც უშედეგოდ დასრულდა.

სამაგიეროდ, "ლოკომოტივმა" მოახერხა ძალიან მწვავე და სწრაფი შეტევის განვითარება - დავით ჯიქიამ მოედნის ცენტრში გიორგი გოროზია მოძებნა, რომელმაც მარჯვენა ფლანგზე შეტევა დავით სამურკასოვს გაუგრძელა, ამ უკანასკნელმა კი საჯარიმოში ირაკლი სიხარულიძეს უპასა და მასპინძელთა თავდამსხმელმა შანსი გოლად აქცია. აღსანიშნავია, რომ სიხარულიძემ ბოლო 9 მატჩში 7 გოლი გაიტანა.

2017 წლის სეზონის ბომბარდირის შემდეგ მოედანზე 2018 წლის ლიგის ბომბარდირი გიორგი გაბედავა ვიხილეთ, რომელმაც "საბურთალოში" თამაშის უფლება მიიღო და გუნდის ფორმა პირველად მოირგო. მოქმედი ჩემპიონის მთავარმა მწვრთნელმა, გიორგი ჭიაბრიშვილმა, ახალწვეული მოედანზე გაშვებული გოლის შემდეგ შეტევების გასამწვავებლად გაუშვა...

ვერ გატეხეს

..."ლოკომოტივი" კი დაცვაში ჩაჯდა და მეტოქეს გასაქანს არ აძლევდა, "საბურთალოც" ისეთ ტემპში თამაშს ვერ ახერხებდა, დაცვაში ბზარი რომ ენახა. იყო მცდელობები, მომენტები, მაგრამ გოლამდე საქმე არ მისულა. მე-80 წუთზე მეტოქის კარს გიორგი კოხრეიძემ შეუტია, მაგრამ დემეტრე ბულისკერიამ ბურთი იოლად დაამიწა.

83-ე წუთზე ჯიქიამ შეტევა განავითარა და საჯარიმოში თორნიკე ძებნიაური მოძებნა, რომელმაც ბურთი ლაშა გვალიას დაუგორა და ამ უკანასკნელი დარტყმა ოდნავ არაზუსტი გამოდგა.

რა თქმა უნდა, "საბურთალოს" სურდა თამაშის გადარჩენა, მაგრამ ვერაფერს უხერხებდა მეტოქეს, რომელსაც დამატებულ დროში კონტრშეტევაზე ორი გოლის გატანის შანსი ჰქონდა. პირველად, საჯარიმოში გადაცემაზე მეკარე ომარ მიგინეიშვილი ჩაუწვა ფეხებში სამურკასოვს და გუნდი გადაარჩინა, ერთ წუთში კი დავით უბილავამ შეუტია ძალზე სახიფათოდ, მაგრამ მანაც - უშედეგოდ.

საბოლოოდ, "ლოკომოტივმა" წარმატებული თამაშების სერია 8-მდე გაზარდა, 29 ქულა დააგროვა და ლიდერებს კიდევ უფრო მიუახლოვდა. "საბურთალომ" კი 7-მატჩიანი წაუგებელი სერია შეწყვიტა.

ყოველდღიური სპორტული გაზეთი "ლელო"
496
მკითხველის კომენტარები / 0 /
მსგავსი ამბები
რუბრიკის სხვა სიახლეები
;