[ანალიზი, VIDEO]. ეროვნული ლიგა. ლოკომოტივი 1-1 რუსთავი. ოქროს ქულა

ლოკომოტივი-რუსთავი  1:1
22.06. თბილისი.  მიხეილ მესხი (სათ)
1:0 სიხარულიძე (2. ო. კობახიძის პასით), 1:1 ციცქიშვილი (44)
ლოკომოტივი (4-2-3-1): ბულისკერია - უბილავა, ჭანტურია, გურეშიძე, კომახიძე - გვალია (59. გოროზია), ძებნიაური - ო. კობახიძე, სამურკასოვი, ჯიქია (73. შეყილაძე) - სიხარულიძე (90. იაკობიძე)
სათადარიგოები: შეროზია, გაბაძე, ბუიღლიშვილი, ჯაფარიძე
მწვრთნელი: ლევან კორღალიძე
რუსთავი (4-2-3-1): მამარდაშვილი - კაპანაძე, გადრანი, ჯაფიაშვილი, ფონიავა - გუჯაბიძე, ქოჩლაძე (73. ქავთარაძე) - ციცქიშვილი, კიტეიშვილი, სილაგაძე (62. ჩოგაძე) - იმნაძე
სათადარიგოები: კულუა, ტაკულოვი, ნარიმანიძე, ბუგულოვი
მწვრთნელი: ვარლამ კილასონია
გაფრთხილება: ო. კობახიძე (7), ფონიავა (45), იმნაძე (71)
გაძევება: ო. კობახიძე (71)
არბიტრი: . მაჭარაძე


გუნდები მინდორზე სპეციალური მაისურებით გამოვიდნენ. მათ გააპროტესტეს, რომ ჩვენი ქვეყნის 20 პროცენტი ოკუპირებულია რუსეთის მიერ...

...ფავორიტად ბოლო დროს მართლაც რომ დიდებულ ფორმაში მყოფი "ლოკომოტივი" ითვლებოდა, მაგრამ ფეხბურთში მუდამ ფავორიტი როდი იგებს...

გამარჯობის თქმა არ აცალეს...

"ლოკომოტივმა" უსწრაფესი გოლი შეაგდო. ეს შეხვედრის მე-2 წუთზე მოხდა ძალიან კარგი კომბინაციის შედეგად. შეტევის მარჯვენა ფლანგიდან ბურთი საჯარიმოში ჩაჰკიდა ოთარ კობახიძემ, იქ ყველას ირაკლი სიხარულიძემ დაასწრო და მძლავრი თავურით შანსი არ დაუტოვა გიორგიმამარდაშვილს.

მალევე ისევ "ლოკომოტივს" ჰქონდა მომენტი და ისევ კობახიძის აქტიურობით, მაგრამ მას მეკარე მამარდაშვილმა არ გაატანინა. ზოგადად, მატჩის საწყის ნაწილში ლევან კორღალიძის მიერ გაწვრთნილი გუნდი ძალიან კარგად გამოიყურებოდა.

"რუსთავმა" მეთოდურად, თანდათან გამოასწორა თამაში და ლუკა იმნაძეს შესანიშნავი საგოლე შანსი ჰქონდა - კარის შორეულ კუთხეს დაუმიზნა ბურთი, მაგრამ ოდნავ ააცილა დემეტრე ბულისკერიას კარს.

რომ მოეგერიებინა...

ტაიმის შუაში ულამაზესი ეპიზოდი ვიხილეთ. დავით სამურკასოვის მიერ დარტყმული ბურთი მამარდაშვილმა აკრობატულ ნახტომში "მოხსნა" - ვფიქრობთ, რუსთაველთა ახალგაზრდა მეკარის სახით საქართველოს საიმედო გოლკიპერი ეზრდება...

ტაიმის დასრულებამდე აღარაფერი იყო დარჩენილი, როცა ანგარიში გათანაბრდა. ლუკა იმნაძემ შორიდან ძლიერად დაარტყა, ბულისკერიამ მოსაგერიებელი ბურთის ხელში დაჭერა სცადა და არ გამოუვიდა, ზაზა ციცქიშვილმა კი დამატებაზე იმარჯვა და - 1:1.

მეორე ნახევარი თანაბარ ბრძოლაში დაიწყო. სახიფათო მომენტი კარგა ხნის განმავლობაში არ იქმნებოდა. თამაში შეცვლაზე შესულმა გიორგი გოროზიამ გამოაცოცხლა. საქართველოს ასაკობრივი ნაკრების ყოფილმა ნახევარმცველმა ძლიერად დარტყმული ოდნავ ააცილა.

"ლოკომოტივმა" თამაში კაცნაკლულმა ჩაამთავრა. ოთარ კობახიძემ თამაშის წესი დაარღვია და მერე წაქცეული მეტოქისკენ დაარტყა ბურთი. მოედანზე სიტუაცია დაიძაბა. შედეგად, არბიტრმა პაპუნა მაჭარაძემ კობახიძეს წითელი ბარათი უჩვენა.

შეხვედრის დასრულებას ოთხიოდე წუთი აკლდა, როცა "ლოკომოტივს" თამაშის მოგების შანსი მიეცა. შეცვლაზე შესულმა შოთა შეყილაძემ შესანიშნავი პასი გაუკეთა სამურკასოვს, ვის დარტყმულსაც მამარდაშვილი ადგილზე დაუხვდა. ბოლო შანსი "რუსთავს" ჰქონდა, თუმცა მომენტს შედეგი არ მოჰყოლია.

ეს იყო და, თამაშიც დასრულდა. ვფიქრობთ, შედეგი კანონზომიერია. თუნდაც იმიტომ, რომ ხან ერთი გუნდი ფლობდა უპირატესობას და ხან - მეორე.

აღვნიშნოთ ისიც, რომ მეტოქეებს რამდენიმე წამყვანი ფეხბურთელი აკლდათ. ამ მხრივ განსაკუთრებით "რუსთავი" დაზარალდა. ქვემოქართლელთათვის სასიამოვნო სიახლეა ის, რომ ხანგრძლივი შესვენების შემდეგ მინდორს დაუბრუნდა ბექა ქავთარაძე. გუნდის ერთ-ერთი ლიდერი დაშავებული გახლდათ.

ასე იყო თუ ისე, "რუსთავმა" ძალიან მნიშვნელოვანი, შეიძლება ითქვას, "ოქროს" ქულაც კი წაიღო თბილისიდან - ქულა, რომელიც ჰაერივით სჭიდებოდა...

ყოველდღიური სპორტული გაზეთი "ლელო"
585
მკითხველის კომენტარები / 0 /
მსგავსი ამბები
რუბრიკის სხვა სიახლეები
;