[ანალიზი, VIDEO] ეროვნული ლიგა. პლეი აუტი. თელავი 1-0 რუსთავი. მოუმატეს და მოიგეს, მაგრამ სადაც სამართალია...

თელავი-რუსთავი  1:0
05.12. თელავი. გივი ჩოხელი
1:0 მ. ბაშელეიშვილი (54)
თელავი (4-3-2-1): სანიკიძე - ძოწენიძე, ბერიაშვილი, თოლორდავა, ჯიქია - მაგრაქველიძე, მ. ბაშელეიშვილი, ენგუენე (46. ვარშანიძე) - კოშკაძე (82. ერისთავი), რუხაძე (90. კაკიაშვილი) - კვასოვი
სათადარიგოები: ბეზკროვნი, კუკუჯანაშვილი, გოგოლიძე, ბაჩიაშვილი
მწვრთნელი: რევაზ გოცირიძე
რუსთავი (5-4-1): კულუა (61. მამარდაშვილი) - კაპანაძე, გუჯაბიძე, ტოლმასოვი, ნოზაძე, ლაცაბიძე - პ. კიტეიშვილი (55. ქოჩლაძე), პავლოვი (59. იმნაძე), ვასაძე, სილაგაძე - ბ. ქავთარაძე
სათადარიგოები: სიჭინავა, ლეჟავა, ბაირამოვი, ასათიანი
მწვრთნელი: ვარლამ კილასონია
გაფრთხილება: რუხაძე (14), გუჯაბიძე (34), ნოზაძე (61), მ. ბაშელეიშვილი (54), ვასაძე (87)
არბიტრი: გ. ყრუაშვილი


გუნდებმა ყოველგვარი დაზვერვის გარეშე დაიწყეს თამაში და სახიფათო მომენტებიც ძალიან სწრაფად შეიქმნა. დასაწყისიდანვე იგრძნობოდა მინდორზე სასიამოვნო სპორტული დაძაბულობა...

დაზვერვის გარეშე

მატჩი თელაველთა მეკარის, ლუკა სანიკიძის შესანიშნავი თამაშით გაიხსნა. მან ორჯერ გადაარჩინა თავისი გუნდი. განსაკუთრებით რთული ბურთი მან ბექა ქავთარაძეს აუღო. თავის მხრივ, შანსი თელაველებსაც ჰქონდათ - ალეკო კოშკაძის გადაცემის შემდეგ ირაკლი რუხაძემ ცოტა იჩქარა, თორემ კაცმა არ იცის, რა მოხდებოდა...

თავიდანვე ცხადი გახდა ვარლამ კილასონიას ჩანაფიქრი. რუსთაველთა მწვრთნელმა მაქსიმალურად დატვირთა უკანა და შუა ხაზი. რაც შეეხება "თელავს", საშინაო შეხვედრის ფაქტორი მასპინძლებს შემტევი სათამაშო მოდელის ერთგულებას აიძულებდა.

ლოგიკამ თავისი გაიტანა

...ეს მოსალოდნელიც იყო: სასტარტო "აფეთქების" შემდეგ საპლეიოფო ლოგიკამ თავისი გაიტანა და გუნდებმა თამაში ფრთხილად გააგრძელეს. გასაკვირი ნამდვილად არაფერი იყო - ორრაუნდიან დაპირისპირებაში ხომ თითოეულ გოლს ოქროს ფასი აქვს!

34-ე წუთზე მომენტი "რუსთავს" შეექმნა. შეტევაში ჩართულმა ცოტნე კაპანაძემ სახიფათოდ დაარტყა, მაგრამ კარს ააცილა. ტაიმი "თელავის" მომენტით დასრულდა - ირაკლი რუხაძეს მეკარე გოგი კულუამ არ გაატანინა.

თელავის ტაიმი

მეორე ტაიმი "თელავის" მწვრთნელმა რევაზ გოცირიძემ ცვლილებით დაიწყო. კამერუნელი ლიონელ ენგუენეს ნაცვლად მინდორზე ბექა ვარშანიძე შევიდა. მასპინძლები საგრძნობლად გააქტიურდნენ და მალე გოლითაც დაჯილდოვდნენ - ალეკო კოშკაძემ კუთხური ჩააწოდა. ბურთი ორჯერ ჩაბრუნდა რუსთაველთა საჯარიმოში, მეორე ჯერზე კი სიტუაციაში ყველაზე კარგად მიხეილ ბაშალეიშვილი გაერკვა და ბურთი ახლო მანძილიდან შეაგორა კარში - 1:0.

"თელავს" იქვე მეორეც უნდა შეეგდო. "სტანდარტის" შემდეგ იაროსლავ კვასოვმა თავით დაარტყა, კულუამ დიდებული რეაქცია გამოავლინა, თორნიკე ძოწენიძემ კი რაღაც სასწაულით ვერ გაიტანა - ორიოდე მეტრიდან თავურით ხარიხას მოარტყა ბურთი.

გაშვებული გოლის შემდეგ ვარლამ კილასონიამ სწრაფადვე გააძლიერა თავდასხმა, თუმცა იქვე მეკარის შეცვლაც დასჭირდა - დაშავებული კულუას ნაცვლადაც მინდორზე გიორგი მამარდაშვილი შევიდა...

"თელავმა" თამაში თამამად გააგრძელა და ისევ შექმნა დიდებული საგოლე შანსი. კვასოვი ცარიელი კარის წინ აღმოჩნდა, მაგრამ... ვერ გაიტანა. წამებში რუსთაველთა კართან ისევ შეიქმნა ორი ნახევარმომენტი...

გავიდა წუთი და თამაშში მამარდაშვილიც ჩაერთო. მან ანტონ თოლორდავას მიერ ძლიერად დარტყმული ბურთი არ შეუშვა კარში. 74-ე წუთზე "თელავს" აუცილებლად უნდა გაეტანა - აქტიურმა კოშკაძემ კარგად ითამაშა და რუხაძე მეკარესთან პირისპირ დატოვა. ირაკლის დიდი დრო ჰქონდა, თუმცა მამარდაშვილს მაინც ვერ აჯობა.

ორიოდე წუთში სტუმართა მეკარემ ერთხელაც ითამაშა შესანიშნავად, როცა კვლავ აჯობა რუხაძეს. ეს უკანასკნელი მახვილი კუთხიდან ცდილობდა გატანას, თუმცა... გადის მცირე დრო და ისევ რუხაძეს ეძლევა შანსი და... ვერც ამჯერად გააქვს.

საბოლოოდ, "თელავმა" მოიგო, მაგრამ სადაც სამართალია, ესეც ვთქვათ - რომ არა თითქმის 100-პროცენტიანი შანსების განიავება, მასპინძელთა სასარგებლოდ ანგარიში უფრო სოლიდური იქნებოდა. ასე კი, ყველაფერი რუსთავში (11 დეკემბერი, 13:30) გადაწყდება...

1791
მკითხველის კომენტარები / 0 /
მსგავსი ამბები
რუბრიკის სხვა სიახლეები
;