[ანალიზი, VIDEO] ეროვნული ლიგა. პლეი აუტი. საპასუხო მატჩი. რუსთავი 1-2 თელავი. კახელები ელიტაში ბრუნდებიან!

რუსთავი-თელავი  1:2
პირველი მატჩი 0:1
11.12. რუსთავი. სფფ-ის ტექნიკური ცენტრი
1:0 ქავთარაძე (3-პენ), 1:1 ლაცაბიძე (15-საკ. კარში), 1:2 ძოწენიძე (33. კოშკაძის პასით)
რუსთავი (4-4-2): მამარდაშვილი - გუჯაბიძე (46. პ. კიტეიშვილი), ბუგულოვი, ტოლმასოვი, ლაცაბიძე (80. ლეჟავა) - ვასაძე (82. პავლოვი), ქოჩლაძე, სიჭინავა, სილაგაძე - იმნაძე, ბ. ქავთარაძე
სათადარიგოები: პროკოპენკო, ც. კაპანაძე, თევზაძე, ასათიანი
მწვრთნელი: ვარლამ კილასონია
თელავი (5-3-2): სანიკიძე - მარაქველიძე, ძოწენიძე, თოლორდავა, ბერიაშვილი, ჯიქია - მ. ბაშელეიშვილი (87. ბაჩიაშვილი), კოშკაძე (56. კაკიაშვილი), ვარშანიძე - კვასოვი, რუხაძე (77. ერისთავი)
სათადარიგოები: ბეზკროვნი, კუკუჯანაშვილი, ენგუენე, გოგოლიძე
მწვრთნელი: რევაზ გოცირიძე
გაფრთხილება: თოლორდავა (8), ბუგულოვი (8), კვასოვი (17), რუხაძე (20), სანიკიძე (90)
გაძევება: თოლორდავა (83)
არბიტრი: ი. კვირიკაშვილი

პირველი შეხვედრის შედეგიდან გამომდინარე, "რუსთავს" სხვა გზა არ ჰქონდა - ნებისმიერ შემთხვევაში უნდა შეეტია და მხოლოდ მოსაგებად უნდა ეთამაშა. აქედან გამომდინარეობდა ის ცვლილებები, რომელიც ვარლამ კილასონიამ განახორციელა - 5 ფეხბურთელი შეცვალა პირველი მატჩის შემდეგ...

თავის მხრივ, იყო ცვლილებები "თელავის" შემადგენლობაში. შემთხვევითი არც ის გახლდათ, რომ რევაზ გოცირიძემ დაცვის ხაზი გაამაგრა. დაცვით ფაზაში თელაველები ხუთი მცველით თამაშობდნენ...

სწრაფი გოლი

"რუსთავისთვის" იდეალური იქნებოდა სწრაფი გოლი და ვარლამ კილასონიას გაწვრთნილებმა ეს გოლი უკვე მე-3 წუთზე გაიტანეს. მასპინძლებმა თამაში აქტიურად დაიწყეს და ეგრევე სწრაფი, დინამიური შეტევა, რომლის მწვავე ფაზაში ბექა ქავთარაძის წინააღმდეგ მეკარე ლუკა სანიკიძემ წესი დაარღვია - გაშლილი ფეხით წავიდა შემტევზე და პენალტიც სამართლიანად დაინიშნა.

უმაღლესი საფეხბურთო სასჯელი უნაკლოდ აღასრულა თავად დაზარალებულმა და "რუსთავმა" მნიშვნელოვანი ფსიქოლოგიური უპირატესობა მიიღო - 1:0. მალ თელაველები ითხოვდნენ 11-მეტრიანს, თუმცა არბიტრი ირაკლი კვირიკაშვილი სხვანაირად ფიქრობდა.

მინდორზე სიტუაცია დაიძაბა. საბოლოოდ, კვირიკაშვილმა ვითარება ორი ყვითელი ბარათის დახმარებით განმუხტა...

არეულობა და...

ძალიან ძნელად სავარაუდო იყო, რომ ასეთი ფსიქოლოგიური შოკის შემდეგ "თელავი" მალე გამოფხიზლდებოდა. არადა, ეს სწორედ ასე მოხდა და ანგარიშიც გათანაბრდა - ირაკლი რუხაძემ კარგად ითამაშა ფლანგზე, ფირუზ მარაქველიძის დარტყმის შემდეგ ბურთი გიორგი ლაცაბიძემ არ შეუშვა კარში, მაგრამ თელაველი ფეხბურთელი ბრძოლას არ გამოეთიშა, ბოლომდე "მიაწვა" და თელაველთა კარის ხაზზე დიდი არეულობა შეიქმნა. ბურთმა მაინც გადაკვეთა თეთრი ზოლი და ის ავტოგოლად ჩაეწერა ლაცაბიძეს.

"რუსთავის" მდგომარეობა ძალიან დამძიმდა. თავად განსაჯეთ - კილასონიას გუნდს ახლა, სულ მცირე, 2 გოლის გატანა სჭირდებოდა მისთვის სასურველი შედეგის მისაღწევად....

ძოწენიძის ოქროს გოლი

შეხვედრის 33-ე წუთზე ყველაფერი თუ არა, თითქმის ყველაფერი გადაწყდა. შეიძლება ითქვას, "ოქროს" გოლი შეაგდო თორნიკე ძოწენიძემ, ხოლო გამოცდილმა ალეკო კოშკაძემ კიდევ ერთხელ გვიჩვენა პასის მაღალი კულტურა, როცა შესანიშნავად შეასრულა "სტანდარტული", რუსთაველთა კარის დარაჯ გიორგი მამარდაშვილს კი იმ ეპიზოდში უკეთ თამაში მართებდა...

სულ რამდენიმე წამიც და უკვე "რუსთავს" უნდა გაეტანა, თუმცა უაღრესად ხელსაყრელ ვითარებაში დარჩენილ ლაშა ქოჩლაძეს მცველებმა დაუფარეს. წინააღმდეგ შემთხვევაში, ანგარიში უთუოდ გათანაბრდებოდა.

ტაიმის დასრულებამდე წუთით ადრე "თელავს" ორი მშვენიერი შანსი მიეცა. მამარდაშვილმა მირიან ჯიქიას რთული ბურთი აუღო. მომდევნო ეპიზოდში სწრაფად შეიყვანა ბურთი თამაშში და იაროსლავ კვასოვს ძალიან ცოტა დააკლდა გოლამდე.

ასე დასრულდა პირველი ტაიმი, რომელმაც, ძალიან ბევრ საინტერესო მომენტთან ერთად, 3 გოლიც დაიტია...

ცივსისხლიანად, ხარისხიანად...

"რუსთავს" სხვა გზა აღარ ჰქონდა და მეორე ტაიმი ძალიან აქტიურად დაიწყო. ეგაა, ეს აქტიურობა შედეგში ვერ აისახა. მეორე ნახევრის სტარტზე ორი შანსი ჰქონდა დათა სიჭინავას, მაგრამ ვერ ისარგებლა - ჯერ მისი დარტყმული კარს ასცდა, მეორედ კი მეკარე სანიკიძე იოლად დაეუფლა ბურთს.

თამაშის ბოლო ათ წუთში მინდორზე განსაკუთრებული არაფერი მომხდარა. მერე კი თელაველთა მცველმა ანტონ თოლორდავამ ხელით დაბლოკა ბურთი და მეორე ყვითელი ბარათი მიიღო. "სტანდარტული" სიჭინავამ შეასრულა, მეკარე სანიკიძემ კი დიდებულ ნახტომში კუთხურზე გადააგდო ბურთი.

მერე მასპინძლებს თამაშგარე მდგომარეობიდან გატანილი გოლი გაუუქმეს. მატჩის ბოლომდე ერთხელაც ითამაშა შესანიშნავად თელაველთა მეკარემ და რუსთაველთა კიდევ ერთ მცდელობას ხაზი გადაუსვა.

საბოლოოდ, "თელავმა" ცივსისხლიანად და ხარისხიანად მიიყვანა საქმე ბოლომდე. ამრიგად, ეს კახური გუნდი პირველად ითამაშებს ქვეყნის მთავარ საფეხბურთო ლიგაში, სადაც ადრე თელავიდან "კახეთიც" ყოფილა წარმოდგენილი...

მოკლედ, ვულოცავთ "თელავს" დიდ და დამსახურებულ მიღწევას, მეორე მხრივ კი გული გვწყდება "რუსთავზეც", თვითმყოფად გუნდზე, რომელიც სეზონის დასაწყისში განწირული ჩანდა, მაგრამ ვარლამ კილასონიას თავკაცობით ჭაობიდან ამოძვრა, თუმცა... მწირი რესურსებისა და ტრავმების გადამკიდე, ბოლომდე ვერ გაუძლო მომქანცველ მარათონს და ქვედა ლიგაში აღმოჩნდა...

4398
მკითხველის კომენტარები / 0 /
მსგავსი ამბები
რუბრიკის სხვა სიახლეები
;