[ანალიზი, VIDEO] ეროვნული ლიგა. პლეი აუტი. სიონი 0-0 სამტრედია. პეტარდები, დაძაბულობა და კითხვა: იყო თუ არა გოლი და პენალტი?

სიონი-სამტრედია  0:0
05.12. ბოლნისი. თამაზ სტეფანია
სიონი (3-4-3): გოშაძე - აფაქიძე, უგრეხელიძე, ჯაფიაშვილი - ივანიშვილი (58. ტვილდიანი), თარხნიშვილი (78. უგულავა), ხმალაძე, სუხიაშვილი - თარგამაძე (58. ცაცკრიალაშვილი), ტატანაშვილი, გვარაძე
სათადარიგოები: ლ. ისიანი, ჩაჩუა, თომაშვილი, კახაბრიშვილი
მწვრთნელი: თემურ შალამბერიძე
სამტრედია (4-2-3-1): სეფიაშვილი - საჯაია, კილასონია, ჩაკვეტაძე, ახალაძე - პავიშიჩი, ქიქავა - სამუშია (66. რაჟამაშვილი), ენდელაძე, ივანიაძე (90+6. კერძევაძე) - ყურბანოვი (88. ხაბეიშვილი)
სათადარიგოები: ი. სტურუა, ლუკავა, მესიაჩენკო, ჭეიშვილი
მთავარი მწვრთნელი: კახა კაჭარავა
გაფრთხილებები: საჯაია (45)
არბიტრი: . მაჭარაძე


ბოლნისის "სიონი" პლეი აუტში ეროვნულ ლიგაში ადგილისთვის უკვე მეოთხდ იბრძვის. შარშან ასეთივე ბრძოლაში "სამტრედიაც" მონაწილეობდა, მაგრამ პირწმინდად დამარცხდა...

ხალხი და ტემპი

ბოლნისის "თამაზ სტეფანიაზე" საკმაოდ იყო ქომაგი, მათ შორის - სამტრედიელთა გულშემატკივრებიც. მაგრამ "სიონით" იმედგაცრუებულმა ბოლნისელებმა სტადიონი სრულად მაინც ვერ შეავსეს, რაც ყველაზე დიდი მოულოდნელობა იყო და სტუმრებზე ის ზეწოლა ვერ მოახდინეს, რასაც გუნდი იმედოვნებდა.

თამაშს დიდი მნიშვნელობა ჰქონდა. ამის მიუხედავადაც, გაუგებარი იყო, ორივე გუნდი მეტისმეტად ფრთხილად და რისკის გარეშე რატომ თამაშობდა? ტემპი დაბალი იყო და თამაშიც საკმაოდ უფერული გამოდგა...

იყო თუ არა გოლი?

"სამტრედია" შეტევაში უფრო აგრესიული იყო და პირველი სახიფათო მომენტიც მანვე შექმნა, მაგრამ გიორგი ივანიძის დარტყმა სუსტი და არაზუსტი გამოდგა.

მე-13 წუთზე მის მიერვე განვითარებულ მწვავე შეტევას მცველი ზურაბ ჯაფიაშვილი გადაეღობა და "სიონის" კართან ვითარება განმუხტა.

მე-15 წუთზე, ოთო გოშაძემ "სიონი" აშკარა გოლისგან იხსნა. გია ახალაძის ფლანგური გადაცემის დაგვირგვინებას თავდამსხმელი ცდილობდა, როცა ბოლნისელთა მეკარე კარიდან დროულად გამოვიდა და ბურთი კუთხურზე მოიგერია.

33-ე წუთზე უკვე სამტრედიელთა ფლანგის შემტევმა გურამ სამუშიამ შეუტია და გოშაძე ბურთს ადგილზე დახვდა.

ბოლნისელები მხოლოდ ამის შემდეგ გააქტიურდნენ და თამაში გამოასწორეს, პირველი ტაიმის ბოლო წუთზე კი სახიფათო ჯარიმის შესრულების უფლება მოიპოვეს. ჯარიმა დავით თარგამაძემ შეასრულა - მეკარე კოკა სეფიაშილმა ბურთი კარიდან გამოიტანა, მსაჯმა თამაში გააგრძელა, მაგრამ გადაკვეთა თუ არა ბურთმა კარის ხაზი? ბოლნისელები გოლის დაფიქსირებას უშედეგოდ ითხოვდნენ, შეტევა გაგრძელდა და ლევან ხმალაძის თავურის შემდეგ ბურთს ისევ სეფიაშვილი გადაეღობა.

 ამასობაში, ტრიბუნაზე ვითარება დაიძაბა. მომხდარს გულშემატკივრები აპროტესტებდნენ, მაგრამ ზღვარს არავინ გადასულა, პროტესტის ტალღაც მალე ჩაცხრა...

ბოლნისელთა მრისხანებამაც არ დააყოვნა, მაგრამ...

მეორე ტაიმში სურათი ოდნავ შეიცვალა და თამაში უფრო გამოცოცხლდა. პირველი სახიფათო მომენტი ისევ სამტრედიელებმა შექმნეს. ივანიაძის მიერ კარში დარტყმულს ისევ გოშაძე გადაეღობა, დამატებაზე კი ნიჯატ ყურბანოვს არ გაატანინა...

ბოლნისელებს შეტევებში უჭირდათ და "სიონის" მთავარმა მწვრთნელმა თემურ შალამბერიძემ 58-ე წუთზე, რგოლების დასაბალანსებლად და წინა ხაზის გასაძლიერებლად შეცვლები განახორციელა: გიორგი ივანიშვილი არჩილ ტვილდიანით ჩაანაცვლა, რატი ცაცკრიალაშვილი კი დავით თარგამაძის ნაცვლად შეუშვა, რამაც ეს უკანასკნელი გაანაწყენა და პირდაპირ გასახდელებში წავიდა...

სამტრედიელებს კი ერთ-ერთი ლიდერი გურამ სამუშია დაუშავდათ და მის ნაცვლად მოედანზე დავით რაჟამაშვილი გამოჩნდა. ცვლილებებმა უფრო უკეთ მასპინძლებზე იმოქმედა. 73-ე წუთზე, ზედიზედ ორჯერ, ბოლნისელები მეტოქის საჯარიმოში წააქციეს. "სიონი" განსაკუთრებით უკმაყოფილო ანზორ სუხიაშვილის ეპიზოდის შემდეგ დარჩა, როცა ვარლამ კილასონიამ ხელი ჰკრა და მომენტი პენალტს ჰგავდა, მაგრამ... არბიტრმა თამაში გააგრძელა და ბოლნისელთა მრისხანებამაც არ დააყოვნა.

სამტრედიელებმა მალევე კონტრშეტევა წამოიწყეს, თუმცა რაჟამაშვილმა სწორი გადაწყვეტილება ვერ მიიღო - ვერც დარტყმა მოახერხა, ვერც - გადაცემა და შეტევა ჩაიშალა.

საპასუხო კონტრშეტევაზე სამტრედიელებმა სუხიაშვილის მორიგი შეტევა შეაჩერეს. 77-ე წუთზე კი არბიტრმა თამაში დროებით შეაჩერა, რადგან სეფიაშვილის კარის უკან ბოლნისელებმა პეტარდები ისროლეს და ასეთ ვითარებაში თამაშის გაგრძელება მართებული არ იქნებოოდა. თუმცა, ვითარება ამ შემთხვევაშიც მალევე ჩაწყნარდა და თამაში განახლდა...

შალამბერიძის ვა-ბანკი

თემურ შალამბერიძე ბოლოს ვაბანკზე წავიდა - საყრდენი ნახევარმცველის, თორნიკე თარხნიშვილის ნაცვლად მოედანზე გუნდის საუკეთესო ბომბარდირი ჯაბა უგულავა შეუშვა და ტაქტიკა 4-3-3-ზე გადააწყო. უგულავა დიმიტრი ტატანაშვილს შეტევების გამწვავებაში ნამდვილად დაეხმარა და ბოლნისელებმა მთელი ძალებით შეუტიეს... თუმცა საინტერესოა - სად იყვნენ აქამდე? რას ელოდნენ?..

მე-80 წუთზე სახიფათო, მაგრამ უშედეგო გამოდგა ლევან ხმალაძის დარტყმა. ორ წუთში, სუხიაშვილის ფლანგური ჩართვის შემდეგ სტუმართა კარის აღება ბექა გვარაძეს შეეძლო, რომელიც კარის წინ ბურთიანად შემოტრიალდა და... მიზანს ვერ მიაღწია.

85-ე წუთზე ბოლნისელთა სწრაფი კონტრშეტევის დაგვირგვინება უგულავას შეეძლო, თუმცა მეკარე სეფიაშვილს ვერ აჯობა.

არბიტრმა ძირითად დროს 5 წუთი დაამატა და "სამტრედია" კიდევ ერთხელ გადარჩა: უგულავამ თავურით კარის წინ ტატანაშვილი მოძებნა, რომელმაც ახლო მანძილიდან თავური ააცილა და მშვენიერი მომენტი ვერ გამოიყენა.

მესამე დამატებულ წუთზე კი სახიფათო გამოდგა ვარლამ კილასონიას მიერ შესრულებული ჯარიმაც, მაგრამ გოშაძემ ისევ საიმედოდ ითამაშა და საბოლოოდ, შეხვედრა ასეც დასრულდა - 0:0.

საპასუხო მატჩი 11 დეკემბერს სამტრედიაში გაიმართება (დასაწყისი 13:30-ზე). შედეგიდან გამომდინარე, ჯერ წარმატება გარანტირებული არც ერთ გუნდს არ აქვს, მაგრამ "სამტრედიამ" მცირე უპირატესობა მაინც მოიპოვა, მით უფრო, იმის გათვალისწინებით, რა გულშემატკივრობა და მხარდაჭერაც კახა კაჭარავას გუნდს "ეროსი მანჯგალაძეზე" ელის...

1212
მკითხველის კომენტარები / 0 /
მსგავსი ამბები
რუბრიკის სხვა სიახლეები
;