[ანალიზი, VIDEO] ეროვნული ლიგა. სიონი 2-1 რუსთავი. როცა ფეხბურთი უკანა პლანზეა...

რუსთავის შემტევი ლუკა იმნაძე (N19) თავს უკეთ გრძნობს


სიონი-რუსთავი  2:1
02.11. ბოლნისი. თამაზ სტეფანია
1:0 გვარაძე (24), 2:0 გვარაძე (37. თარგამაძის პასით), 2:1 ქავთარაძე (45-პენ)
გამოუყენებელი პენალტი: ცაცკრიალაშვილი (90. სიონი)
სიონი (3-5-2): გოშაძე - აფაქიძე, თომაშვილი, . უგრეხელიძე - ივანიშვილი (86. ტვილდიანი), თარხნიშვილი, თარგამაძე, ხმალაძე, სუხიაშვილი - გვარაძე (71. ცაცკრიალაშვილი), უგულავა (64. ტატანაშვილი)
სათადარიგოები: . ისიანი, ჩაჩუა, შინჯიკაშვილი, კახაბრიშვილი
მწვრთნელი: თემურ შალამბერიძე
რუსთავი (4-3-1-2): მამარდაშვილი - კაპანაძე, ნოზაძე, ბუგულოვი, ლაცაბიძე - გუჯაბიძე, ქოჩლაძე, სილაგაძე (69. ბაირამოვი) - სიჭინავა - ქავთარაძე, იმნაძე (45. ლეჟავა)
სათადარიგოები: ალადაშვილი, რაფაელი, სალუქვაძე, ოშაყმაშვილი, ასათიანი
გაფრთხილება: ხმალაძე (19), უგულავა (35), გოშაძე (45), აფაქიძე (64)
არბიტრი: . კვირიკაშვილი

ფინალის ტოლი მატჩი - ასე შეგვიძლია მოვნათლოთ ბოლნისში გამართული დაპირისპირება, რომელშიც ერთმანეთს უმაღლეს ლიგაში პლეი აუტის გარეშე დარჩენის მოსურნე ორი გუნდი შეხვდა...

ვინღას ახსოვდა ფეხბურთი...

თუ "სიონს" დისკვალიფიკაციის გამო ზურაბ ჯაფიაშვილი დააკლდა, "რუსთავმა" ამავე მიზეზით ვერ დაიხმარა ნახევარდაცვის ორი საკვანძო ფეხბურთელი - გიორგი ვასაძე და პაატა კიტეიშვილი.

უნდა ითქვას ისიც, რომ "რუსთავის" დამრიგებელი ვარლამ კილასონია თავის დროზე "სიონს" ხელმძღვანელობდა და საკმაო წარმატებითაც. ასე რომ, ამ თამაშს ინტრიგას ესეც მატებდა.

ამ შეხვედრის "ხვედრითი წონიდან" გამომდინარე, საგოლე ფეერიასა და მომენტების სიმრავლეს იმთავითვე არ ველოდით და ჩვენი მოლოდინი თავიდან გამართლდა. მერე კი... ისეთები ვნახეთ, ბარე ორ თამაშს ეყოფოდა. შეხვედრის დასაწყისში კი გუნდები ფრთხილად მოქმედებდნენ და ყველანაირად ცდილობდნენ, მაქსიმალურად გამოერიცხათ შეცდომები...

ვერ ვიტყვით, რომ რომელიმე გუნდმა დაცვითი მოდელი აირჩია. უბრალოდ, მცველები და დაცვითი ყაიდის სხვა მოთამაშეები ძალიან დაკვირვებით თამაშობდნენ. იყო წვრილი ფოლები, რაც შეტევების სიმწვავეს ანელებდა, მაგრამ ეს მხოლოდ დროებით...

ასე იყო თუ ისე, პირველივე მომენტი გოლით დასრულდა. როგორც წესი, მიმდინარე სეზონში რუსთაველთა ახალგაზრდა მეკარე გიორგი მამარდაშვილი უშეცდომოდ თამაშობს, მაგრამ ამჯერად გამონაკლისი მოხდა - საჯარიმოს ხაზთან, უწყინარ სიტუაციაში მყოფმა, რატომღაც, ფინტის გაკეთება და ბექა გვარაძის მორტყუება მოინდომა, მაგრამ ვერ შეძლო. "სიონის" შემტევმა მოიგდო ბურთი და ცარიელ კარში შეაგორა.

33-ე წუთზე გოლთან ახლოს ისევ "სიონი" იყო. ამჯერად, გვარაძემ კარგი გადაცემა გააკეთა ჯაბა უგულავას მიმართულებით, რომელსაც სანტიმეტრები დააკლდა გატანამდე.

მალე ბოლნისელთა უპირატესობა ორბურთიანი გახდა. დავით თარგამაძემ, ვინც კვლავ მაღალ დონეზე ითამაშა, საგოლე პასი უბოძა გვარაძეს, ვინც დროულად "ჩაკეტა" შორეული კუთხე და დუბლი მიითვალა.

42-ე წუთზე კი ისეთი რამ მოხდა მინდორზე, ფეხბურთი ყველას დაგვავიწყდა. კარიდან გამოსული ოთარ გოშაძე ბურთზე წასულ "რუსთავის" შემტევ ლუკა იმნაძეს შეასკდა. არბიტრმა მასპინძელთა კარში პენალტი დანიშნა. არადა, იმნაძემ შეჯახების დროს გონება დაკარგა. რამდენიმე წუთის განმავლობაში მინდორზე დიდი პანიკა და განგაში იყო.

საბედნიეროდ, თანაგუნდელებისა და ექიმის დახმარებით, ლუკა გონს მოვიდა. სასწრაფო დახმარების მანქანით ის უმალ საავადმყოფოში გადაიყვანეს, სადაც ტვინის შერყევა დაუდგინდა. მოკლედ, ქართული ფეხბურთი ტრაგედიას გადაურჩა!..

გვესმის დაძაბულობაც, თამაშის ფასიც და ყველაფერი ის, რაც ფეხბურთს უკავშირდება, მაგრამ არსებობს ყველაზე ძვირფასი რამ - ადამიანის სიცოცხლე და მას გაფრთხილება სჭირდება. გვახსენდება წინა ტურის მატჩი "საბურთალოსა" და თბილისის "დინამოს" შორის, როცა კარიდან გამოვარდნილი ლაზარე კუპატაძე ლევან კუტალიას შეასკდა...

ან რაღა შორს მივდივართ - იმავე გოშაძემ, უდავოდ ნიჭიერმა მეკარემ, ანალოგიურ რამ გააკეთა "რუსთავი"-"სიონის" მესამე წრის მატჩში, როცა კარიდან გამოვარდა და ბექა ქავთარაძეს შეასკდა. მაშინ ის მოედნიდან გააძევეს, ამჯერად ყვითელი ბარათი აკმარეს, თუმცა პენალტთან ერთად... ასე რომ, მეკარეებო (და მინდვრის მოთამაშეებო), ითამაშეთ ბურთზე და იყავით მაქსიმალურად ფრთხილად - ფეხბურთი სიცოცხლეზე ძვირფასი ვერაფრით იქნება!

...ბექა ქავთარაძემ ზუსტად შეასრულა იმნაძის წინააღმდეგ წესების დარღვევისთვის დანიშნული პენალტი და პირველი ტაიმი "სიონმა" 2:1 მოიგო.

გამოუყენებელი მომენტების ტაიმი

მეორე ტაიმის პირველი მომენტი "რუსთავმა" შექმნა. ცოტნე კაპანაძე შეტევაში მწვავედ ჩაერთო და ძლიერად დაარტყა კიდეც. ბურთი ოდნავ ასცდა მასპინძელთა კარს. მომდევნო მომენტიც "რუსთავისა" იყო. ამჯერად, ლუკა სილაგაძემ "გაისროლა" შორიდან, მაგრამ გოშაძემ დამაჯერებლად ითამაშა. კარგი ეპიზოდი გამოვიდა.

მალე კიდევ ერთი მომენტი ვიხილეთ და ესეც რუსთაველთა შანსი იყო - ფლანგური პასის შემდეგ ქავთარაძემ ასპროცენტიანი მომენტი გაატანა ქარს.

"რუსთავი" თითქოს მეტოქეზე უკეთესი იყო, თუმცა საგოლე მომენტის შექმნა "სიონმაც" მოახერხა - დავით თარგამაძის (ვინც აშკარად ფორმაში შევიდა და მუდმივად ცდილობდა თამაშის გამწვავებას) დარტყმული ბურთი გიორგი მამარდაშვილის ნადავლი გახდა.

"სიონი" მწვავედ მოქმედებდა კონტრშეტევებზე და მატჩის ბოლოს 11-მეტრიანიც მოიპოვა. ბურთთან რატი ცაცკრიალაშვილი მივიდა, მაგრამ... კარს ააცილა.

საბოლოო დასკვნა ასეთია - მოიგო გუნდმა, რომელმაც უფრო ყაირათიანად გამოიყენა საგოლე მომენტები.

343
მკითხველის კომენტარები / 0 /
მსგავსი ამბები
რუბრიკის სხვა სიახლეები
;