[ანალიზი, VIDEO] ეროვნული ლიგა. ტორპედო 2-3 საბურთალო. უფსკრულის პირას, ანუ, როცა კარგ მატჩს ცუდი პერსპექტივა აუფერულებს

ტორპედო-საბურთალო   2:3
14.05. წყალტუბო. 26 მაისი
0:1 ალთუნაშვილი (8. ვაგნერის პასით), 1:1 ზივზივაძე (32. წიქარიძის პასით), 1:2 შინდაგორიძე (47. ვაგნერის პასით), 1:3 აზაცკი (56-აკ. კარში), 2:3 კაპანაძე (60)
ტორპედო (4-2-3-1): კვასხვაძე - გეგეჭკორი (23. ქიმაძე), მ. კობახიძე, აზაცკი, ხურცილავა - ცინცაძე, გიგაური - ნ. ქავთარაძე, წიქარიძე (58. თ. კაპანაძე), რიჩარდ ლუკა (59. დოლიძე) - ზივზივაძე
სათადარიგოები: ქვილითაია, ტაბატაძე, ჭიჭინაძე, ა. ჩაჩუა
მწვრთნელი: კახა ჩხეტიანი
საბურთალო (4-2-3-1): მიგინეიშვილი - ჩაბრაძე, მარგველაშვილი, კაკუბავა, ლაკვეხელიანი - ალთუნაშვილი, ტერა (81. ცნობილაძე) - ვაგნერი, გი (72. გორგიაშვილი), შინდაგორიძე - დვალიშვილი (64. როლოვიჩი)
სათადარიგოები: შელიხოვი, კოხრეიძე, მალი, გვარაძე
მწვრთნელი: გიორგი ჭიაბრიშვილი
გაფრთხილება: ტერა (28), კობახიძე (49)
არბიტრი: . ხორავა


ტურის ცენტრალური მატჩი წყალტუბოს 26 მაისის სახელობის სტადიონზე გაიმართა, სადაც საქართველოს თასის მფლობელი "ტორპედო" ქვეყნის მოქმედ ჩემპიონ "საბურთალოსთან" დრამატულ ბრძოლაში 2:3 დამარცხდა...

არცთუ კარგ განწყობაზე...

გუნდები შეხვედრას არცთუ კარგ განწყობაზე შეხვდნენ. "ტორპედოს" ფინანსური პრობლემების შესახებ ყველასთვის ცნობილია, გუნდში ორი თვის სახელფასო დავალიანებაა და კლუბის დაფინანსების საკითხი კიდევ უფრო ბუნდოვანია, ვიდრე აქამდე იყო.

მატჩის შემდეგ ქუთაისელთა მთავარმა მწვრთნელმა კახა ჩხეტიანმა პირდაპირ განაცხადა: "მიჭირს ამის თქმა, მაგრამ... შესაძლოა, მომდევნო თამაშამდე დავიშალოთ".

როცა ქვეყნის ერთ-ერთი ტიტულოვანი და საუკეთესო გუნდი ასეთ მგომარეობაშია, რთულია მატჩის სანახაობრივ მხარეზე და სტადიონზე შექმნილ კარგ საფეხბურთო გარემოზე ლაპარაკი...

ფინანსური პრობლემების მიუხედავად, "ტორპედომ" ბოლო მატჩები კარგად ჩაატარა და ზედიზედ ორი გამარჯვება იზეიმა, "საბურთალოსთანაც" ბოლომდე იბრძოლა, მაგრამ კრიზისი გუნდის თამაშს მაინც დაეწყო, აღნიშნა კიდეც ჩხეტიანმა - ხასიათი ვერ იყო ისეთი, როგორიც ასეთი მატჩების მოგებას სჭირდებაო...

რაც შეეხება მოქმედი ჩემპიონის უხასიათობის მიზეზს, მათ ფინანსური პრობლემები არ აწუხებთ, მაგრამ გიორგი ჭიაბრიშვილის გუნდმა, "ტორპედოსთან" მატჩამდე, მეორე წრეში გამართული სამი მატჩიდან 1 მოიგო და 2 წააგო, რაც მაღალი მიზნებისთვის მებრძოლი გუნდისთვის მიუღებელი შედეგია.

საბურთალოელთათვის "ტორპედოსთან" მოგება ძალიან მნიშვნელოვანი იყო და ამ თამაშში ყველაფერი ჩადეს.

ტორპედოს შანსი და საბურთალოს სწრაფი გოლი

მატჩის დებიუტში "ტორპედოს" ორი რეალური შანსი ჰქონდა. ბუდუ ზივზივაძემ მეკარესთან პირისპირ გაიყვანა რიჩარდ ლუკა, რომელმაც კარს სასწაულებრივად ააცილა.

ცოტა ნახში თავად ზივზივაძეს ჰქონდა ანგარიშის გახსნის შესაძლებლობა - მცველების შეცდომის შემდეგ მეკარესთან მარტო დარჩა, მაგრამ გამოცდილმა ომარ მიგინეიშვილმა კარი დროულად დატოვა და გუნდი გოლისგან იხსნა.

ისე მოხდა, რომ მომენტები "ტორპედომ" შექმნა სწრაფი გოლი კი სტუმრებმა გაიტანეს. ვაგნერ გონსალვეის გადაცემის შემდეგ სანდრო ალთუნაშვილი მცველებს კარგად გაექცა და "საბურთალო" დააწინაურა. აქვე უნდა ვთქვათ, რომ ძირითადში დაბრუნებული ვაგნერი ერთ-ერთი საუკეთესო იყო - ტაიმის მიწურულს მან მეორე საგოლე გადაცემაც მიითვალა...

სწორედ იმ დროს გაათანაბრა ანგარიში...

გაშვებული გოლის შემდეგ "ტორპედომ" კარგა ხანს ვერ დაალაგა თამაში. ქუთაისელებს ბევრი წუნი ჰქონდათ გადაცემებში, ამით სტუმრები სარგებლობდნენ და ეპიზოდებში სახიფათოდ უტევდნენ.

ორჯერ მეტოქის კარს ვლადიმერ დვალიშვილი დაემუქრა, განსაკუთრებით სახიფათო იყო მეორე ეპიზოდი, როცა ალთუნაშვილის გადაცემის შემდეგ გამოცდილი ფორვარდი დასწრებაზე თამაშობდა, მაგრამ ზუსტად ვერ დაარტყა.

"ტორპედომ" სწორედ იმ დროს გაათანაბრა ანგარიში, როცა უპირატესობას სტუმრები ფლობდნენ - თენგიზ წიქარიძის ფლანგური ჩაწოდების შემდეგ ზივზივაძე ყველაზე მაღლა ახტა და თავური დარტყმით ანგარიში გაათანაბრა - 1:1.

შინდაგორიძის თავური და აზაცკის ავტოგოლი

...ქუთაისელთა სიხარული დიდხანს არ გაგრძელებულა. ვაგნერის მიერ კუთხურიდან ჩაწოდებულ ბურთს ტანმაღალმა ლაშა შინდაგორიძემ თავურით როინ კვასხვაძის კარში მიუჩინა ადგილი და ორბურთიანი სხვაობა აღადგინა. პირველ ტაიმში საინტერესო კიდევ ის იყო, რომ ლევან გეგეკორმა ტრავმა მიიღო და მის ნაცვლად მოედანზე გიორგი ქიმაძე გავიდა...

მატჩის მეორე ნახევარში სტუმრებმა სხვაობა უფრო კომფორტული გახადეს. ლუკა ლაკვეხელიანი ფლანგიდან დვალიშვილისკენ აკეთებდა გადაცემას, მაგრამ საბურთალოელთა ფორვარდს ლექსანდრ აზაცკიმ დაასწრო და... საკუთარ კარში ჩაჭრა ბურთი.

ელვა ცვლილება

კახა ჩხეტიანმა მდგომარეობის გამოსასწორებლად ცვლილებებს მიმართა. წიქარიძისა და ლუკას ნაცვლად თამაშში თორნიკე კაპანაძე და გრიგოლ დოლიძე ჩაერთვნენ. "ელვას" მოედანზე გასვლიდან ზუსტად 2 წუთი დასჭირდა გოლის გასატანად.

კაპანაძის გოლში ლომის წილი ნოდარ ქავთარაძემ შეიტანა. მისი დარტყმის შემდეგ ბურთი ძელმა აისხლიტა და პირდაპირ კაპანაძეს მიუვიდა, რომელმაც "ტორპედო", როგორც იტყვიან, თამაშში დააბრუნა.

ქუთაისელებს მატჩის სათავისოდ შესატრიალებლად საკმაო დრო ჰქონდათ, უტევდნენ კიდეც, მაგრამ რეალური საგოლე მომენტის შექმნა ვეღარ მოახერხეს.

მატჩის შემდეგ ტორპედოელები გულშემატკივრებთან მივიდნენ და მხარდაჭერისთვის მადლობა გადაუხადეს. იმედს ვიტოვებთ, რომ ქუთაისური გუნდი, რომელიც მართლაც რომ ალამაზებს ქართულ ფეხბურთს, არ დაიშლება და მომავალ ტურში დუბლებით არ მოუწევს თამაში.

ყოველდღიური სპორტული გაზეთი "ლელო"
697
მკითხველის კომენტარები / 0 /
მსგავსი ამბები
რუბრიკის სხვა სიახლეები
;