[ანალიზი, VIDEO] ეროვნული ლიგა. XXXIII ტური. ჩიხურა 2-0 დინამო (ბთ). ყველაფერი თავდაყირა...

ჩიხურა-დინამო (ბთ)  2:0
01.11. ივანწმინდა
1:0 ფანცულაია (67. სარდალიშვილის პასით), 2:0 არდაზიშვილი (89)
ჩიხურა (4-4-2): ჰამზიჩი - კორიფაძე, მაისაშვილი, კაშია, ჩიკვაიძე (65. ჩიხლაძე) - სარდალიშვილი (74. ერგემლიძე), მამასახლისი, ჩიტეიშვილი, არდაზიშვილი - ფანცულაია (77. მუმლაძე), მარკოზაშვილი
სათადარიგოები: მწყერაშვილი, ტეფნაძე, ზ. კაპანაძე, სირაძე
მწვრთნელი: სოსო ფრუიძე
დინამო (4-2-3-1): ალავიძე - მელიავა, მ. კობახიძე, გაგოშიძე, ნავალოვსკი - ტეიდი (69. გაფრინდაშვილი), მამუჩაშვილი (83. ვ. თევდორაძე) - ჯიღაური (63. რამოსი), ფლამარიონი, მანჯგალაძე - დვალიშვილი
სათადარიგოები: კუჩინსკი, ჯანელიძე, ფაცაცია, ჩალაძე
მწვრთნელი: გია გეგუჩაძე
გაფრთხილებები: ნავალოვსკი (34), მაისაშვილი (54), კორიფაძე (66), ჰამზიჩი (73), მანჯგალაძე (85), რამოსი (90+2)
არბიტრი: . კიკაჩეიშვილი


ეროვნული ლიგის ფინიშამდე 3 ტურით ადრე საჩხერს "ჩიხურამ" ლამის ყველაფერი თავდაყირა დააყენა. სოსო ფრუიძის გუნდმა ბათუმის "დინამო" დაამარცხა და არა მხოლოდ ლიდერთა დავაში დასვა დიდი კიხვის ნიშანი, არამედ, ევროსაგზურის შანსიც გაუჩნდა და პლეი აუტის ზონასაც საგრძნობლად დაშორდა...

ტალახი ჩიხურას მხარეს

საჩხერელებს ისედაც მოკლე სკამი აქვთ და ახლა კიდევ ოთხი ფეხბურთელი დააკლდათ - ირაკლი კამლაძე, დავით მეგრელიშვილი, ბესიკ დეკანოიძე და ირაკლი ლექვთაძე. თუმცა, გავარდნის საფრთხე იმდენად დიდი მოტივაცია აღმოჩნდა, "ჩიხურამ" სეზონის ერთ-ერთი საუკეთესო მატჩი გამოუვიდა.

მოედანი ცალკე აღნიშვნის ღირსია - საფარი იმდენად მძიმე მდგომარეობაში იყო, ორივე გუნდს სერიოზულად უშლიდა ხელს თამაშში. ბურთი არ გორავდა და მეტოქეებს დიდი ფიქრი სჭირდებოდათ, როგორ მიეტანათ ტალახიდან ბურთი მოწინააღმდეგის კართან...

მაგრამ მძიმე გრუნტს ხელი არ შეუშლია ბათუმელებისთვის, პირველივე წუთებიდან უპირატესობა მოეპოვებინათ. მათ გულშემატკივრებიც ამხნევებდნენ - სტადიონზე მხოლოდ ბათუმელების ხმა ისმოდა, რომლებიც ერთნაირ ლუჯ საწვიმარში გამოწყობილიყვნენ.

ერთხელ სოსო ფრუიძემ თქვა, რომ ივანწმინდის მოედანი შემტევ გუნდს ხელს არ უწყობს, ეს საფრეო მატჩის საფარიაო. მაგრამ ამჯერად, ფაქტია, რომ საფარმა მათ "მხარეს" ითამაშა.

ხელი არა, იდაყვიო...

ბათუმელებმა პირველი რეალური საგოლე მომენტი მე-15 წუთზე შექმნეს. ჯოვინო ფლამარიონი საჯარიმოში მარცხნიდან შეიჭრა და კარის წინ ჯაბა ჯიღაური მოძებნა - დინო ჰამზიჩმა ორიოდე მეტრიდან დარტყმული თავური მოიგერია და გუნდი აშკარა გოლისგან იხსნა.

მე-18 წუთზე "ჩიხურას" სწრაფი კონტრშეტევა მიშიკო სარდალიშვილმა განავითარა, მაგრამ კარის წინ თემურ მარკოზაშვილს ვერ უპასა და მშვენიერი საგოლე შანსი დაიკარგა.

გავიდა ერთი წუთი და ლადო დვალიშვილმა საჯარიმოსთან ბურთი მიიღო და გია მანჯგალაძეს გააყოლა, მან კი ჯოვინო ფლამარიონი მოძებნა - ბრაზილიელმა დარტყმა დაახანა და მცველმა ვითარება განხმუხტა.

28-ე წუთზე საჯარიმოში მყოფმა დვალიშვილმა ბურთი კარისკენ გაუშვა, დარტყმულს საჩხერელთა მცველი დავით მაისაშვილი გადაეფარა და... ვიდეოკადრიდან ჩანს, რომ ბურთი ხელზე მოხვდა. სტუმრები პენალტს ითხოვდნენ, მაგრამ არბიტრმა ანიშნა, რომ იდაყვი იყო და თამაში გააგრძელა.

35-ე წუთზე პენალტს უკვე საჩხერელები ითხოვდნენ, როდესაც საჯარიმო მანჯგალაძემ შეასრულა - საჯარიმოში მცველთან ბრძოლაში ლაშა ჩიკვაიძე წაიქცა, მაგრამ არბიტრმა თამაში ამჯერადაც გააგრძელა. ტაიმის მიწურულს კი შორეული დარტყმით კარის აღება ლადო მამუჩაშვილმა სცადა და მანაც უშედეგოდ.

არდაზიშვილის შედევრი

მეორე ტაიმი გაცილებით დაძაბულად მიმდინარეობდა. ატალახებულ მოედანზე თამაშიც სულ უფრო ჭირდა, თუმცა საგოლე მომენტები მაინც შეიქმნა. მე-60 წუთზე, ჯიღაურს ფლამარიონი მეკარესთან პირისპირ გაჰყავდა, როცა შოთა კაშიასთან ორთაბრძოლის შემდეგ წაიქცა და სტუმრები ემოციურად ითხოვდნენ წითელ ბარათს. კონტაქტი კი იყო...

ერთ წუთში საჩხერელებმაც შეუტიეს - გიორგი ფანცულაიას დარტყმულს მეკარე მიხეილ ალავიძე გადაეღობა. სულ რაღაც ერთ წუთში მანვე მახვილი კუთხიდან დარტყმული მიზანს ააცილა. ასევე მოხდა ჯოვინოს მორიგ შეტევაზე, რომელმაც ზუსტად ვერ დაარტყა.

საჩხერელებმა კი სწრაფი კონტშეტევა განახორციელეს, რომელსაც გოლი მოჰყვა - თემურ მარკოზაშვილმა შეტევა საჯარიმოსთან მიხეილ სარდალიშვილის გაუგრძელა, რომელმაც გიორგი ნავალოვსკი ჩამოიტოვა და კარის წინ გახსნილი გიორგი ფანცულაია მოძებნა, ამან კი ცარიელ კარში უპრობლემოდ შეაგორა ბურთი - 1:0.

 ბათუმელებს მალევე შეეძლოთ წონასწორობის აღდგენა. 75-ე წუთზე კუთხურიდან მოწოდებული ბურთი ჯოვინომ თავით კარში ახლოდან გააგზავნა, მაგრამ ჰამზიჩმა სასწაული რეაქცია გამოავლინა, დამატებაზე კი ბრაზილიელმა ახლოდან ააცილა.

ბათუმელებმა დაცვა მოაშიშვლეს, მთელი გუნდით წინ წავიდნენ და 79-ე წუთზე, გიორგი კორიფაძის სოლორეიდის შემდეგ, კინაღამ მეორე გოლიც გაუშვეს, მაგრამ მეკარე მიხეილ ალავიძე მეტოქეს ფეხებში ჩაუწვა და გუნდი გადაარჩინა.

ჯოივინოს კარის აღების კიდევ ერთი მცდელობა ჰქონდა, მაგრამ ახლო მანძილიდან მის დარტყმას მცველი გადაეფარა და ვითარება განმუხტა.

89-ე წუთზე კი პატარა სპექტაკლი დადგა რატი არდაზიშვილმა - ორ მცველს შორის გაძვრა, მესამე ჩამოიშორა და მეოთხეს დაასწრო - 2:0. საბოლოოდ, "ჩიხურამ" უმნიშნელოვანესი გამარჯვება მოიპოვა, ბათუმელებმა კი "ოქროს" ქულები დაკარგეს.

1525
მკითხველის კომენტარები / 2 /
ფეხბურთის მოყვარული
0
ამ თამაშის გამართვა ასეთ სტადიონზე დიდი შეცდომაა, ბათუმი არ უნდა დათანხმებოდა, რაც შეეხება მსაჯს, ვფიქრობ ის საერთოდ აღარ უნდა გააკარონ ამ საქმეს.მისმა მსაჯობამ კიდევ ერთხელ დაგვანახა რომ ქართულ ფეხბურთს დიდხანს არ ეშველება....
kakha
0
ასე რომ დაასათაურეთ ეს სტატია,იმაზე რატომ არაფერს ამბობთ,რომ რა სტადიონებზე თამაშობენ???იმას რატომ არ ახსენებთ თუ როგორი მსაჯობა იყო???თუ ეს თქვენ არ გეხებათ ან თქვენს კომპეტენციაში არ შედის???ამოიგეთ ხმა...ერთხელ მაინც დაწერეთ ვრცელი სტატია ამნაირ უმსგვასოებაზე და უსამართლოებაზე....იკნებ ისიც გაარკვიოთ რატომ არაა საქართველოში ვიდეორეფერის სისტემა???თუ საქართველო სხვა პლანეტაზეა და ფიფას წესები აკ არ ვრცელდება???
მსგავსი ამბები
რუბრიკის სხვა სიახლეები
;