[ანალიზი, VIDEO] სამხ. კორეა 2-2 საქართველო. კითხვა, რომელიც უნდა დავსვათ...

სამხ. კორეა-საქართველო  2:2
05.09. სტამბოლი. ფათიჰ თერიმი
0:1 ანანიძე (40. ყაზაიშვილის პასით), 1:1 უი-ჯო ჰვანი (47. ჰიუნ-მინ სონის პასით), 2:1 უი-ჯო ჰვანი (85. ჯინ-სუ კიმის პასით), 2:2 ქვილითაია (90. კანკავას პასით)
სამხ. კორეა (3-5-2): სუნ იუნ გუ - ჯი სუ პარკი (46. იან გვონ კიმი), მინ ჯაე კიმი, კიუნ ვონ კვონი - სეუნ ჰო პაიკი (46. ვუ იან იუნი), ჰი ჩან ჰვანი, კანგინ ლი (72. ბო კუინ კიმი), ჩან ჰუნ კვონი, ჯინ სუ კიმი - იეონ ჰიოპ ლი (46. უი ჯო ჰვანი), ჰიუნ-მინ სონი (62. სან ჰო ნა).
მწვრთნელი: პაულო ბენტუ
საქართველო (4-2-3-1): მაკარიძე - კაკაბაძე, კაშია, ტაბიძე, ხარაბაძე - აბურჯანია (57. გვილია), კიტეიშვილი (71. დაუშვილი) - დავითაშვილი (73. ლობჟანიძე), ანანიძე (57. პაპუნაშვილი), ოქრიაშვილი (57. ქვილითაია) - ყაზაიშვილი (80. კანკავა)
სათადარიგოები: ლორია, კუპატაძე, გრიგალავა, ჭანტურიშვილი, ჯიღაური, კვარაცხელია
მწვრთნელი: ვლადიმირ ვაისი
გაფრთხილება: ვუ-იან იუნი (82), კანკავა (90)
არბიტრი: ჰუსეინ გიოჩეკი (თურქეთი)

საქართველოსა და კორეის ნაკრებები ერთმანეთს პირველად დაუპირისპირდნენ. ორივე გუნდი საპასუხისმგებლო მატჩებისთვის ემზადება. თუ ჩვენს ეროვნულ გუნდს ევროპის ჩემპიონატის შესარჩევი ციკლის შეხვედრა ელის დანიასთან, კორეელები თურქმენეთში ჩავლენ და იქაურ ნაკრებს გაეჯიბრებიან მსოფლიოს ჩემპიონატის შესარჩევი ციკლის შეხვედრაში...

შანსი ახალგაზრდებს

საქართველოს უპირველეს გუნდს ზედ თამაშის წინ დააკლდნენ დავით ხოჭოლავა და საბა კვირკველია. რა თქმა უნდა, ვლადიმირ ვაისს დიდი პრობლემები შეექმნა დაცვის ცენტრში. თამაშის წინ ყველას ძალიან გვაინტერესებდა, თუ როგორ მოაგვარებდა სლოვაკი მწვრთნელი ამ პრობლემას. მან დაცვის ცენტრში გურამ კაშიასა ჯიმი ტაბიძე შეუწყვილა...

ვაისმა წინასამატჩო კომენტარში თქვა, რომ კორეასთან შეხვედრა შანსი იყო ახალგაზრდებისთვის. ასე და ამგვარად, საქართველოს ნაკრების ძირითად შემადგენლობაში ვიხილეთ ჯიმი ტაბიძე, ლევან ხარაბაძე, გიორგი აბურჯანია და ზურიკო დავითაშვილი. ბოლო წამს მიღებული მცირე ტრავმის გამო, თავიდანვე ვერ ვიხილეთ მინდორზე ჯაბა კანკავა...

კორეელებმა კი ძირითადში არ გაამწესეს მთავარი ფორვარდი შინ ვუკ კიმი. სამაგიეროდ, კორეელებს მინდორზე გაუძღვა გუნდის უდავო ლიდერი, "ტოტენჰემის" ვარსკვლავი ჰიუნ მინ სონი.

საქართველოს ნაკრებმა თამაში აქტიურად დაიწყო. კარგად დავიჭირეთ ბურთი და პრესინგიც ხშირად გამოგვდიოდა. აქტიურობდა ვაკო ყაზაიშვილი, ვინც ფლანგზე გახლდათ გამწესებული...

ამას დაემატა ისიც, რომ კორეელებმა არაერთი შეცდომა დაუშვეს. თანდათან კორეა გამოფხიზლდა. ჯერ იყო და, სონმა შესანიშნავი პასი გადააწოდა კვონს, მაგრამ ჯიმი ტაბიძემ აშკარა გოლისაგან გადაგვარჩინა, მერე კი იგივე სონი ცდილობდა გატანას ორიგინალურად, მაგრამ მიზანს ვერ მიაღწია.

ამას საქართველოს ნაკრების შეტევა მოჰყვა და ზედიზედ ორი შანსი გვქონდა - ჯერ გიორგი აბურჯანიას დარტყმულს გადაეფარა მცველი, მერე კი ოთარ კიტეიშვილს უმტყუნა სიზუსტემ.

დავითაშვილი გადაგვირჩა, ჯანომ შეასრულა!

ზოგადად, პირველ ტაიმში საქართველოს ნაკრების უპირატესობა თვალსაჩინო იყო ტექნიკური მომზადების მხრივ, მაგრამ არ იყო "ბოლო პასი", თორემ ნებისმიერი ცოტა მაღალი კლასის გუნდი აუცილებლად დასჯიდა კორეელებს ამდენი თავისუფალი სივრცის დატოვების გამო.

37-ე წუთზე კვონი ძალიან ეუხეშა ეროვნული გუნდის დებიუტანტ ზურიკო დავითაშვილს. კიდევ კარგი, ახალგაზრდა ქართველი სერიოზულ ტრავმას გადაურჩა. იქვე უნდა გაგვეტანა - ვაკო ყაზაიშვილმა ახლოდან დაარტყა, მაგრამ კორეელთა მეკარეს ვერ აჯობა.

თამაში ისე მიდიოდა, რომ უნდა გაგვეტანა და გავიტანეთ კიდეც. ყაზაიშვილმა ართმევაზე დიდებულად ითამაშა და კარგი პასიც გაუკეთა ჯანო ანანიძეს. მოსკოვის "სპარტაკის" ნახევარმცველმა კი, როგორც იტყვიან, შეასრულა - მეკარესთან პირისპირ გასულმა შორეულ კუთხეში "მოჭრა" ბურთი - 1:0.

პირველი ტაიმი სავსებით ლოგიკურად მოვიგეთ. რაც მთავარია, ვითამაშეთ ზუსტად ისეთი ფეხბურთი, როგორსაც ვითხოვთ ჩვენი ბიჭებისგან - ერთხელაც გამოჩნდა, რომ შეტევაში თამაში არის ის, რაშიც მუდამ უნდა სცადოს ბედი ნაკრებმა.

...და ისევ კონტრასტი ტაიმებს შორის

საქართველოს ნაკრებს ვლადიმირ ვაისის ხელში რომ უცნაური ზნე სჭირს, ამაზე არაერთხელ დავწერეთ. ასე იყო ამჯერადაც - პირველი ტაიმი გაცილებით უკეთესი იყო ჩვენი გუნდის შესრულებით, ვიდრე - მეორე.

განახლდა თუ არა თამაში, კორეელებმა გაგვიტანეს. რაც ვნახეთ, ისე ჩანდა, რომ გოლი აშკარა თამაშგარე მდგომარეობიდან გავიდა, მაგრამ საკითხავია ისიც - იყო თუ არა თამაშგარე ჩვენი გოლისას? ყოველ შემთხვევაში, კორეელთა შეტევისას ოფსაიდი აშკარა გახლდათ...

მალევე მეტოქეს კიდევ ერთი კარგი მომენტი შეექმნა - "სტანდარტულიდან" ძელს მოარტყეს ბურთი. თუმცა ჩვენი მომენტები უფრო მწვავე იყო. არაერთხელ მართებდა გატანა ზეაქტიურ (ალბათ, საუკეთესოც იყო ქართველთა შორის) ყაზაიშვილს, ვისაც ერთ ეპიზოდში მეკარემ მოუგერია ფეხით რთული ბურთი, დანარჩენ შემთხვევებში კი მცველებმა დააფარეს, ან აართვეს.

არადა, ყაზაიშვილის კლასის ფეხბურთელს, სულ მცირე, ერთი მაინც უნდა გაეტანა. მეორეს მხრივ, ის ძალიან აქტიური იყო და, ალბათ, საუკეთესოც ქართველთა შორის.

დაბრუნდა და გაიტანა!

კარგად შევიდა შეცვლაზე გიორგი ქვილითაია. უთამაშებელი ფეხბურთელის კვალობაზე კარგადაც გაიხსნა, კარგადაც მიიღო, გასცა და გაამწვავა თამაში. ჩანდა, მას ძალიან მონატრებული აქვს მინდორზე ყოფნა...

არ უნდა დავუკარგოთ გარჯა გიორგი მაკარიძესაც, ვინც კორეელთა რთული თავური გააუვნებლა. თამაშის ბოლოს კი საქართველოს ნაკრების სათამაშო მოდელი შედარებით დაცვითი გახდა და, შეიძლება, ამიტომაც დავისაჯეთ - ისეთი გოლი გავუშვით, რომელსაც დღეს პრაქტიკულად აღარავინ უშვებს: თავური პასი და თავური გოლი...

გაშვებული გოლის შემდეგ საქართველო პენალტს ითხოვდა, მაგრამ მსაჯმა თამაში გააგრძელა. თუმცა მაინც გავათანაბრეთ - გაგვიხარდა, მაგრამ... სულო ცოდვილო, ისევ თამაშგარეს ჰგავდა. კარგი იყო, რომ ქვილითაიამ შეაგდო, ვისაც "გენტში", რატომღაც, არ ეძლევა თავის გამოჩენის საშუალება.

თამაშის ბოლოს კორეამ მოსაგებად გაიწია. სახიფათო თავურიც დაგვირტყეს, მაგრამ ანგარიში აღარ შეცვლილა - 2:2.

არწასაგები თამაში იყო და არ წავაგეთ. რეიტინგში ჩვენზე წინ მყოფ და, ზოგადად, ალბათ უფრო ძლიერ მეტოქესთან, მაგრამ რა ვუყოთ იმას, რომ ტაიმებს შორის ისევ იყო დიდი კონტრასტი?!

რა დაგვამახსოვრდა?

ამ თამაშის მთავარი ინტრიგა ის იყო, თუ როგორ წარმოაჩენდნენ თავს საქართველოს ნაკრების დებიუტანტები. კარგი იყო ზურიკო დავითაშვილი, და განსაკუთრებით მაშინ, როცა ნაკრები გუნდურად თამაშობდა.

დანარჩენებზე ბევრს ვერაფერს ვიტყვით. ისევ და ისევ უნდა აღინიშნოს ქვილითაიას კარგი შემოსვლა. თურმე, ფეხბურთში პარადოქსებიც ხდება და უთამაშებელ ფეხბურთელს შეუძლია, გამორჩეული იყოს მინდორზე...

დაგვამახსოვრდა ისიც, რომ მეტოქე უზომოდ ბევრ სივრცეებს გვიტოვებდა, რასაც ვერა და ვერ ვიყენებდით. არადა, დღევანდელ ფეხბურთში არავინ ტოვებს ამხელა სივრცეებს და თუ ტოვებს, მწარედაც ისჯება.

კითხვა, რომელიც უნდა დავსვათ...

ახლა დავსვათ კითხვა, რომელსაც ნამდვილად ვერ გავექცევით. რამდენად გამოგვადგება კორეასთან შეხვედრა დანიასთან მატჩის წინ? ზოგადად, დანიელთა კლასი რომ უფრო მაღალია, ამაზე არავინ დავობს, მაგრამ კორეელთა სათამაშო ორგანიზაცია მთელ რიგ მატჩებში უახლოვდება დანიელთა დონეს.

და მაინცდამაინც გუშინ იყო კორეა ყველაზე ნაკლებად ორგანიზებული; მაინცდამაინც გუშინ უშვებდა ისეთ მარტივ შეცდომებს, როგორსაც სხვა დროს არ უშვებს ხოლმე; და მაინცდამაინც საქართველომ ვერ ისარგებლა ამით ისე, რომ თამაში მოეგო.

შანსი არ არის, დანია ასეთ საჩუქრებს არ გაგვიკეთებს და, სხვა თუ არაფერი, არბიტრიც გაცილებით კვალიფიციური იქნება, ვიდრე თურქეთში...

ყოველდღიური სპორტული გაზეთი "ლელო"
3328
მკითხველის კომენტარები / 0 /
მსგავსი ამბები
რუბრიკის სხვა სიახლეები
;