[ანალიზი, VIDEO] ჩემპიონთა ლიგა. საბურთალო 1-3 (3-0) შერიფი. ბეწვის ხიდზე

საბურთალო-შერიფი   1:3
16.07. თბილისი. მიხეილ მესხი
პირველი მატჩი 3:0
0:1 ლატიფი (3. ბობანის პასით), 0:2 მარგველაშვილი (8-საკ. კარში), 0:3 ტამბე (10. კენდიშის პასით), 1:3 როლოვიჩი (59. ლაკვეხელიანის პასით)
საბურთალო (4-4-2): მიგინეიშვილი - მალი, მარგველაშვილი, ლაკვეხელიანი, რეხვიაშვილი - დიასამიძე, ვაგნერი (80. შინდაგორიძე), ალთუნაშვილი (70. ტერა), გორგიაშვილი - კოხრეიძე, როლოვიჩი (77. გაბედავა)
სათადარიგოები: შელიხოვი, ჩაბრაძე, ცნობილაძე, კაკუბავა
მწვრთნელი: გიორგი ჭიაბრიშვილი
შერიფი (4-3-3): მიკულიჩი - პალჩიჩი, ნდიაე, მუჟეკი, კრიშტიანო - კენდიში, ანტონი (82. იახი), გორდიენკო (69. პალიჩი) - ლატიფი, ტამბე, ბობანი (69. ლეანდრო რიბეირო)
სათადარიგოები: ჩელიადნიკი, ბალიმა, ბელოუსოვი, კოჟოკარუ
მწვრთნელი: ზორან ზეკიჩი
გაფრთხილებები: პალჩიჩი (12), გორდიენკო (22), კოხრეიძე (23), ვაგნერი (39), ნდიაი (62), კენდიში (62), მარგველაშვილი (78)
გაძევება: პალჩიჩი (73. მეორე ყვითელი)
არბიტრი: პ. ორელი (ჩეხეთი)


ამ მატჩის მიმართ მოლოდინი დიდი იყო. როგორც იქნა, ქართულმა გუნდმა ჩემპიონთა ლიგის პირველი საკვალიფიკაციო ეტაპი გადალახა. მაგრამ სტადიონზე მოსული 8 ათასამდე გულშემატკივარი პირველი 10 წუთის შემდეგ სრულ შოკში იყო - ამ მოკლე მონაკვეთში "საბურთალომ" 3 გოლი გაუშვა და რეალური საფრთხის წინაშე დადგა, რომ სიხარულის ნაცვლად, ხალხი კიდევ ერთხელ დარჩენილიყო იმედგაცრუებული ქართული ფეხბურთით...

ფეხბურთელები ჯერ კიდევ "ტირასპოლში" იყვნენ და ვერც წარმოიდგენდნენ, რომ 3:0-ზე დამარცხებული მეტოქე ასეთ საშინელ პრესინგს და შტურმს პირველივე წამებიდან წამოიწყებდა. რაც მთავარია, "შერიფი" ამას მაღალ ტემპში აკეთებდა. სტუმრები მოედნის ცენტრში ძალიან მკაცრად თამაშობდნენ და თბილისელები ამას წინაააღმდეგობას ვერ უწევდნენ...

პირველი გოლი სწორედ ამ არხეინობის შედეგი იყო. კრიშტიანოს ფლანგური შეტევის შემდეგ რობერტ ტამბემ ბურთი კარში თავით გააგზავნა და ომარ მიგინეიშვილისგან მოგერიებული, გაბრიელ ბობანს მიუგორდა, რომლის გადაცემითაც ლირიდონ ლატიფმა ახლოდან ზუსტად დაარტყა - 0:1.

გავიდა მცირე ხანი და ფლანგზე არტიომ გორდიენკო ვერ შეაჩერეს, რომლის გადაცემის შემდეგაც გაგი მარგველაშვილმა ბურთი საკუთარ კარში ჩაჭრა - 0:2.

საბურთალოელები აშკარად დაიბნენ, ბურთის გორების ნაცვლად, მისი მოცილება სცადეს და... კიდევ ერთხელ დაისაჯნენ. "შერიფის" მეკარემ ბურთი თბილისელთა საჯარიმომდე მიაწვდინა, სადაც იური კენდიშმა "მეორე სართული" მოიგო და ბურთი საჯარიმოში რობერტ ტამბეს გააყოლა, კამერუნის ნაკრების თავდამსხმელმა (2017 წლის აფრიკის თასის გამარჯვებული) კი მახვილი კუთხიდან მასპინძელთა კარი კიდევ ერთხელ აიღო - 0:3.

დამშვიდება

ალბათ, სტუმრებმა თამაში სწორედ ამის შემდეგ წააგეს. მათაც დაიჯერეს, რომ პირველი მატჩი სრული კურიოზი იყო და "საბურთალოს" დიდი ანგარიშით გაანადგურებდნენ. თბილისელები შოკიდან გამოსვლას დიდხანს ცდილობდნენ. მართალია, შეტევები არ გამოსდიოდათ, მაგრამ მეტოქეც დაწყნარდა და "საბურთალოც" მეტი კონცენტრაციით ათამაშდა.

მე-14 წუთზე პირველი რეალური საგოლე მომენტი გიორგი რეხვიაშვილს ჰქონდა, მაგრამ მისი თავური მეკარე ზვონიმირ მიკულიჩმა მოიგერია. ასევე მოხდა 22-ე წუთზე, როცა სტუმართა კიპერმა ახლოდან გეგა დიასამიძის შეტევა მოიგერია.

39-ე წუთზე უკვე მიგინეიშვილმა ივაჟკაცა და ლატიფის მიერ ჯარიმიდან დარტყმული ბურთი გააუვნებლა, რითაც გუნდი მეოთხე გოლისგან იხსნა.

  შესვენებამდე, "საბურთალოსგან" ბოლო მცდელობა ლუკა ლაკვეხელიანს ჰქონდა, რომელმაც კარის აღება ვერ მოახერხა.

მაგრამ იგრძნობოდა, რომ საქართველოს ჩემპიონი მაინც ნირწამხდარი იყო და საფუძველი არ ჩანდა, რაც მასპინძლებს წაგებისგან იხსნიდა...

დაბრუნებული სახე

მაგრამ ეს საფუძველი საკუთარი თავის, სტილისა და სახის ერთგულებაა. არცერთ გუნდს, ალბათ, არასოდეს მოუგია თამაში, როცა კი საკუთარი თავისთვის უღალატია. მეორე ტაიმში სხვა "საბურთალო" ვიხილეთ - გუნდმა ბურთი გააგორა, თამაშის გაკონტროლება დაიწყო და "შერიფის" ფეხბურთელები ისევე ანერვიულდნენ, როგორც - პირველ შეხვედრაში. ეს უკვე გიორგი ჭიაბრიშვილის გუნდი იყო - გუნდი, რომელსაც თამაში შეუძლია.

59-ე წუთზე ამის შედეგიც გამოჩნდა. ლაკვეხელიანის ფლანგურ ჩაწოდებაზე საჯარიმოში ოგნიენ როლოვიჩი გაიხსნა და სხვაობა "საბურთალოსთვის" სასარგებლოდ შეამცირა.

"შერიფი" დანებებას არ აპირებდა, მაგრამ  გიორგი კოხრეიძე გუნდს კიდევ ერთხელ დაეხმარა. მართალია, გოლი არ გაუტანია, მაგრამ მუდმივი მანევრებით მეტოქე აიძულა და შეცდომა დააშვებინა. მატეი პალჩიჩმა მასპინძელთა თავდამსხმელი ფლანგზე მოცელა და მეორე ყვითელთან ერთად, წითელი ბარათიც დაიმსახურა

...ბოლო წუთები დაძაბული გამოდგა. "შერიფი" მცდელობას არ აკლებდა. ლატიფმა ჯარიმა ძალიან კიდევ ერთხელ ძალიან სახიფათოდ შეასრულა და მიგინეიშვილმა გუნდი კიდევ ერთხელ გადაარჩინა.

სტუმრებს დასაკარგი აღარაფერი ჰქონდათ და ბოლო წამებზე მთელი გუნდი შეტევაზე წამოვიდნენ, რითაც თბილისელებს შეეძლოთ, ესარგებლათ - სწრაფი კონტრშეტევა ფლანგზე კოხრეიძემ გააგრძელა და საჯარიმოში ბურთი ფეხზე დაასვა კარის წინ მარტო დარჩენილ დიასამიძეს, რომელმაც... ორიოდე მეტრიდან ვერ გაიტანა.

არბიტრის მიერ დამატებული 6 წუთიც მიიწურა და ევროტურნირის დებიუტანტი "საბურთალო" ბეწვის ხიდით გავიდა შემდეგ ეტაპზე, სადაც ხორვატიის ჩემპიონ ზაგრების "დინამო" შეხვდება. პირველი მატჩი თბილისში 23 ივლისს გაიმართება, ხოლო საპასუხო - 30 ივლისს ზაგრებში.

ყოველდღიური სპორტული გაზეთი "ლელო"
1946
მკითხველის კომენტარები / 0 /
მსგავსი ამბები
რუბრიკის სხვა სიახლეები
;