[ანალიზი, VIDEO] ჩემპიონთა ლიგა. შერიფი 0-3 საბურთალო. აი, დებიუტი! საქართველოს ჩემპიონმა შერიფს ფეხბურთის გაკვეთილი ჩაუტარა

შერიფი-საბურთალო  0:3
10.07. ტირასპოლი. სტადიონულ შერიფი
0:1 როლოვიჩი (30. მალის პასით), 0:2 კოხრეიძე (67), 0:3 კაკუბავა (71. კოხრეიძის პასით)
შერიფი (4-4-2): მიკულიჩი - . პალჩიჩი (70. ტამბე), პოსმაკი, იახი, კრიშტიანუ - ხოსე ანხელი (46. ანტონი), ჰორდიენკო, ლატიფი, კენდიში - . პალიჩი (46. ბალინა), ბობანი.
სათადარიგოები: ჩელიადნიკი, მუჟეკი, ბელოუსოვი, დიაი
მწვრთნელი: ზორან ზეკიჩი
საბურთალო (4-2-3-1): მიგინეიშვილი - მალი, მარგველაშვილი, რეხვიაშვილი, ლაკვეხელიანი - გორგიაშვილი (61. კაკუბავა), ალთუნაშვილი - ვაგნერი (70. შინდაგორიძე), დიასამიძე, კოხრეიძე (76. გაბედავა) - როლოვიჩი
სათადარიგოები: შელიხოვი, ჩაბრაძე, გრიგალაშვილი, ცნობილაძე, გაბედავა
მწვრთნელი: გიორგი ჭიაბრიშვილი
გაფრთხილებები: კენდიში (34), კოხრეიძე (45), ლაკვეხელიანი (58), კაკუბავა (77)
არბიტრი: . გრიფიტი (უელსი)


ევროტურნირების დებიუტანტმა "საბურთალომ" ყველანაირი პროგნოზები დაამსხვრია და სადებიუტო შეხვედრაში გასვლაზე მოლდოვის ჩემპიონი "შერიფი" დიდი ანგარიშით აგაანადგურა.

გუნდი, რომელზეც ისე ლაპარაკობდნენ, როგორც გაჭირვებულ და საწყალ ბავშვზე, ბოლო წლებში ქართული ფეხბურთის თავს დაგროვილი სირცხვილისგან გვიხსნა.

ტირასპოლის ცენტრალურ სტადიონზე ქართული ფეხბურთის შესანიშნავი საღამო ვიხილეთ. არადა, მასპინძლები მოედანზე უეჭველი მოგების იმედად გავიდნენ, მაგრამ ძალიან მაგრად შერცხვნენ.

რა თქმა უნდა, "შერიფში" მოთამაშეთა ნახევარი ახალბედა იყო და ეს თამაშს დაეტყო კიდეც. მაგრამ მთავარი არა მასპინძელთა შეუთამაშებლობა, არამედ "საბურთალოს" მოულოდნელად ძალიან კარგი თამაში იყო, რომელმაც პოსტსაბჭოეთის ერთ-ერთ ყველაზე წარმატებულ გუნდს ისეთი გაკვეთილი ჩაუტარა, თითქოს, საქართველოს ეროვნული ლიგის რომელიღაც აუტსაიდერს ეთამაშებოდა...

არაფერია, მაინც გავიტანთ!..

...მოლდოველებს შეტევების ორგანიზება უჭირდათ. "საბურთალო" კი ბურთს კარგად აგორებდა და მეტოქეს პრობლემებს უქმნიდა. ცხადია, თავიდან ყველა ფიქრობდა, რომ ეს დროებითი იყო. მაგრამ სტუმრებმა ტაიმი ძალიან კარგად ჩაატარეს და მეტოქეზე უკეთესი ფეხბურთი ითამაშეს. ამაზე სტატისტიკა მეტყველებს - პირველ ტაიმში 7 დარტყმა მეტოქის 2 დარტყმის წინაააღმდეგ.

...მე-2 წუთზე ვაგნერ გონსალვესმა კუთხური ჩააწოდა, კარის აღებას გიორგი კოხრეიძე შეეცადა, მაგრამ მიზანს ააცილა.

მე-12 წუთზე ტირასპოლელთა შეტევის დაგვირგვინებას გაბრიელ ბობანი ცდილობდა და ისიც უშედეგოდ.

მე-20 წუთზე თორნიკე გორგიაშვილს რბილი პასით ოგნიენ როლოვიჩის მეკარესთან პირისპირ გაყვანა სურდა, მაგრამ ჩერნოგორიელმა ვერ გაუგო და ვითარება განიმუხტა.

23-ე წუთზე მოლდოველებმა მარჯვენა ფლანგიდან სწრაფი კონტრიერიშის განხორციელება მოისურვეს, მაგრამ შემტევს ლუკა ლაკვეხელიანი ჩაუწვა ფეხებში, ბურთს კი ომარ მიგინეიშვილი გადაეღობა.

28-ე წუთზე ლირიდონ ლატიფიმ ბედი მახვილი კუთხიდან სცადა და მიგინეიშვილმა კვლავ საიმედოდ ითამაშა. მოლდოველები ისე თამაშობდნენ, იგრძნობოდა, რომ განცდა ჰქონდათ - არაფერია, მაინც გავიტანთ!..

პირველი გოლი ევროთასებზე

...ვერ გაიტანეს! ანგარიში "საბურთალომ" გახსნა და ეს თამაშის მსვლელობიდან გამომდინარე, ლოგიკურიც იყო. ნიკა მალის მიერ ჩაწოდებული ბურთისთვის როლოვიჩმა "მეორე სართულზე" ტანმაღალ მცველს აჯობა და ანგარიში თავური დარტყმით გახსნა. ამრიგად, ჩერნოგორიელი ფორვარდი ევროტურნირებზე "საბურთალოს" პირველი და ისტორიული გოლის ავტორი გახდა!

39-ე წუთზე გეგა დიასამიძეს საბურთალოელთა უპირატესობის გაზრდა შეეძლო, მაგრამ მახვილი კუთხიდან ბურთი ძელს მოარტყა. შეტევა გაგრძელდა და სანდრო ალთუნაშვილის დარტყმის შემდეგ ბურთი კარს ასცდა.

სასიამოვნო ეპიზოდი იყო - გაგი მარგევლაშვილმა ხოსე ანხელ ხურადოსთან იუხეშა, მაგრამ მივიდა, წამოაყენა და გადაეხვია...

კარგი საყურებელი იყო მოლდოველთა საჯარიმოსთან დიასამიძის ეფექტური თამაშიც, როცა ორ მცველს ეფექტურად გასცდა, მაგრამ დარტყმას მცველი გადაეღობა და ბურთი კარისკენ არ გაუშვა.

 არბიტრმა პირველ ტაიმს 4 წუთი დაამატა, თუმცა მასპინძელთა შეტევების და შტურმის მოლოდინი ამჯერადაც ამაო გამოდგა - ისევ "საბურთალომ" შეუტია და შორიდან კორხეიძის დარტყმული მიზანს აცდა.

პირველი ნახევრის ბოლო ეპიზოდში კი მატეი პალიჩის წინააღმდეგ საიმედოდ ითამაშა მიგინეიშვილი და ამ შეტევასაც გადაეღობა.

შერიფის მცდელობა

ტირასპოლელთა ხორვატმა მთავარმა მწვრთნელმა ზორან ზეკიჩმა მეორე ტაიმის დასაწყისში ორი შეცვლა განახორცელა და მატჩის მსვლელობაში რადიკალური კორექტივის შეტანა სცადა. თავიდან, ისე ჩანდა, რომ "შერიფმა" ეს შეძლო.

მასპინძლებმა მარცხის შიში იგრძნეს და ტემპს მოუმატეს. მათ "საბურთალოს" შევიწროება აგრესიული პრესინგით სცადეს და სტუმართა კართანაც "ჩამოცხა". თუმცა, თბილისელებს შეტევაში მეტი სივრცე გაუჩნდათ და შეტევების ტალღა რომ მოიგერიეს, ძალიან მწვავე კონტრშეტევები განახორციელეს.

შესვენების შემდეგ პირველი სახიფათო მომენტი თბილისელებმა შექმნეს. კარის სიახლოვიდან ჯარიმა დიასამიძემ შეასრულა, ბურთი პირდაპირ კარში გაუშვა და მეკარე ზვონიმირ მიკულიჩმა გუნდი აშკარა გოლისგან იხსნა. ერთ წუთში კი შეტევაში თბილისელთა მცველი გიორგი რეხვიაშვილი ჩაერთო და ბურთი ძელს მოარტყა.

დიასამიძეს შეეძლო გამწვავება, მაგრამ საჯარიმოში შესულმა კარის წინ ზუსტად ვერ ჩააწოდა და  ბურთი მეკარემ აიღო. სახიფათოდ შეიჭრა საჯარიმოში კოხრეიძეც და ისე წაიქცა, პენალტი ჩანდა, მაგრამ... არბიტრმა თამაში გააგრძელა.

ტირასპოლელთა კაპიტულაცია

ქართული გუნდების ბოლო წლების "გმირობის" ფონზე იყო ბუნებრივი მოლოდინი, რომ ადრე თუ გვიან "საბურთალო" გატყდებოდა და მეტოქის ზეწოლას ვერ გაუძლებდა. გიორგი ჭიაბრიშვილის გუნდის სასახელოდ უნდა ითქვას, რომ არათუ გაძლო, მეტოქე აიძულა, სრული კაპიტულაცია გამოეცხადებინა.

67-ე წუთზე გიორგი კოხრეიძემ მასპიძლებს მეორეც გაუტანა - 20 წლის თავდამსხმელმა ბურთი მოედნის ცენტრში მიიღო, კარისკენ დაიძრა და როგორც კი მცველებს მიუახლოვდა, 25 მეტრიდან უძლიერესი დარტყმით ულამაზესი გოლი გაიტანა.

გავიდა 4 წუთი და "საბურთალომ" მასპინძლებს მესამეც შეუგდო - თბილისელებმა კუთხური გაითამაშეს, დიასამიძის ჩაწოდებული ბურთი როლოვიჩმა კარის წინ შეცვლაზე ახალშესულ ლევან კაკუბავას დაუგდო, რომელმაც თავით ახლოდან კარში გააგზავნა და "შერიფი" ნამდვილ შოკში ჩააგდო - 0:3.

ნამუსი მოგვწმინდა

ქართულმა გუნდმა ჩემპიონთა ლიგის საკვალიფიკაციო ეტაპზე შთამბეჭდავად გაიმარჯვა. ყოჩაღ გიორგი ჭიაბრიშვილს და მის გაწვრთნილებს!

ეს არის ქართული გუნდის პირველი საგარეო გამარჯვება ჩემპიონთა ლიგაში 2013 წლის შემდეგ, როცა თბილისის "დინამომ" ფარერულ "ებ სტრეიმურს" 3:1 სძლია.

საქართველოს ჩემპიონმა, თან ევროტურნირის დებიუტანტმა ჩემპიონთა და ევროპალიგის ჯგუფური ეტაპების რამდენიმეგზის მონაწილე დაამარცხა და პირველი ეტაპის ლამის ყველაზე დიდი სენსაციის ავტორი გახდა.

ამაზე მეტყველებს თამაშამდე ტოტალიზატორების ფსონებიც - "საბურთალოს" მოგებაზე 8,0-დან 9,0-მდე კოეფიციენტი ეწერა, ანუ "შერიფის" გამარჯვებაში ეჭვი არ შეჰქონდათ.

ეს გამარჯვება ქართულ ფეხბურთს და მთლიანად ქვეყანას სჭირდებოდა, რომ ცოტა მეტი იმედი გვქონდეს და ცოტა მეტად დავიჯეროთ, რომ ფეხბურთი ნამდვილად ჩვენი თამაშია და რომ ასეთი წყალწაღებულები აღარ ვიქნებით, თუ საქმეს თავით გავაკეთებთ.

საპასუხო მატჩი 16 ივლისს თბილისში, "მიხეილ მესხზე" გაიმართება და მოულოდნელად, ფავორიტი ჩვენი ჩემპიონი გახდა. მატჩის პირდაპირ რეპორტაჟს 21:30 საათიდან საქართველოს საზოგადოებრივი მაუწყებლის "პირველი არხი" შემოგთავაზებთ.

მადლობა ამ საღამოსთვის, მადლობა ამ სიხარულისთვის! "საბურთალომ" მოულოდნელად გაგვიჩინა იმედი!..

ყოველდღიური სპორტული გაზეთი "ლელო"
3045
მკითხველის კომენტარები / 0 /
მსგავსი ამბები
რუბრიკის სხვა სიახლეები
;