[ანალიზი, VIDEO] ძიუდო. ოქროს დუბლი და ქართველთა ტრიუმფი მაროკოში. რას ველოდებით დღეს?

გრძელდება ქართველ ძიუდოისტთა ტრიუმფი მაროკოულ მარაკეშში მიმდინარე ახალგაზრდა ძიუდოისტთა მსოფლიოს ჩემპიონატზე. დღეს ჩვენმა ნაკრებმა კიდევ 3 მედალი მოიპოვა - 2 ოქრო და 1 ბრინჯაო. მსოფლიოს ჩემპიონები ვლადიმერ ახალკაცი (81) და ლაშა ბექაური (90) გახდნენ, ხოლო მესამეზე ტატო გრიგალაშვილი (81) გავიდა.

ბრინჯაოსთვის იჭიდავა მარიამ ჭანტურიამაც (70), მაგრამ, სამწუხაროდ, დამარცხდა და უმედლოდ დარჩა, მეხუთე ადგილს დასჯერდა. ამასთან, 81 კილოგრამში ქართულ ფინალამდე სულ ცოტა დაგვაკლდა, ეს კი უპრეცედენტო ფაქტი იქნებოდა, რადგან ევროპის წლევანდელ ჩემპიონატზე ამ წონაში ასევე ქართული ფინალი გაიმართა ამავე ძიუდოისტების მონაწილეობით. აქვე გეტყვით, რომ გრიგალაშვილი და ბექაური ევროპის წლევანდელი ჩემპიონებიც არიან, ხოლო ახალკაცი - ვიცე-ჩემპიონია.

ამდენად, საქართველოს დელეგაციის ანგარიშზე უკვე 4 მედალია: 3 ოქრო და 1 ბრინჯაო. შეგახსენებთ, რომ გუშინ მსოფლიოს ჩემპიონი ეთერ ლიპარტელიანი (70) გახდა. მან და ბექაურმა უკვე შეასრულეს დუბლი - წლეულს ისინი ევროპის ჩემპიონებიც გახდნენ, თუმცა მსგავსი მიღწევა შეიძლება, ხვალაც განმეორდეს, რადგან ევროპის კიდევ ორი წლევანდელი ჩემპიონი - ილია სულამანიძე (100) და გელა ზაალიშვილი (+100) ჭიდაობენ. ევროპის ჩემპიონატის მსგავსად, გუნდურ ჩათვლასაც ჯერჯერობით ჩვენი ნაკრები ლიდერობს.

გრიგალაშვილმა ჯგუფური ეტაპი ძალიან ძლიერად ჩაატარა, თუმცა ყველაზე ხმაურიანი გამარჯვება პირველივე შეხვედრაში მიითვალა, როცა იაპონელი დაისუკე ტაკაიჩი შიგნიდან ჩახვეული ფეხით პირდაპირ ბეჭებზე გადააგდო უკან. ჩვენმა ლიდერმა საფრანგეთის სახელით მოჭიდავე გიგა აბუაშვილიც წმინდად დაამარცხა, მერე კი 59 წამში მორიგი იპონი მიითვალა უზბეკ ჯალოდინ კურბონმუროდოვთან - აზიელი ბრუნს ცდილობდა, როცა ამან შიგნიდან გამოჰკრა ფეხი და ვაზარზე ხომ დააგდო, იქვე შებოჭა კიდეც.

სამწუხაროდ, ამ დამაჯერებელ გამარჯვებას მოჰყვა მარცხი ნახევარფინალში რუსეთის სახელით მოჭიდავე დავიდ კარაპეტიანთან. რუსმა დასრულებამდე ერთი წუთით ადრე ჯაჯგურში შიგნიდან მოახერხა ფეხის გამოკვრა და ვაზარი მიითვალა. გრიგალაშვილმა ჩამორჩენა 20 წამში გაქვითა, როცა წელში შესულმა მეტოქე აიღო და, უბრალოდ, დადო ტატამზე, თუმცა იპონამდე ცოტა დააკლდა.

საბედისწერო შეტევა მან ბრუნის მცდელობისას დაუშვა, როცა მეტოქემ დგება დაუხურა... არადა, რუსზე ბევრად მაღლა იდგა ოსტატობით და თავისუფლად შეეძლო, გარისკვის გარეშე მიეყვანა ეს შეხვედრა გამარჯვებამდე. ბრინჯაოსთვის შეხვედრაში გრიგალაშვილმა აზერბაიჯანელი მურად ფატიევი ჩახტომითი კისრულით ესთეტიურად დააიპონა.

ფატიევს ახალკაცმაც მოუგო მეოთხედფინალში და ეს იყო ერთადერთი შეხვედრა, რომელშიც მომავალ ჩემპიონს ძალიან გაუჭირდა - გასაკვირიც არ იქნებოდა, მსაჯს მესამე გაფრთხილებით რომ მოეხსნა, თუმცა საბოლოოდ ასე ფატიევი დასაჯეს. ოღონდაც ეს დამატებით დროში მოხდა, მეშვიდე წუთის დასასრულს... მანამდე ფატიევს რამდენჯერმე დასჭირდა ექიმთა დახმარება და მთელი შეხვედრა ისე მჭიდროდ თავშეხვეულმა ჩაატარა, პერიოდულად სახე არც კი უჩანდა, მაგრამ ახალკაცმა ვერც გდება გაუკეთა და თანაც უსაშველოდ დაიღალა - არბიტრი გამუდმებით მოუწოდებდა, ამდგარიყო და ეჭიდავა (თუმცა ამგვარ შენიშვნებს მეტოქესაც აძლევდა).

ახალკაცმა მანამდე მოლდოველი კატალინ მარიანი, ყაზახი აიბოლ ნისანალი და კანადელი ალექსანდრე არენსიბია დაამარცხა წმინდად, ნახევარფინალში კი ბრაზილიელ გილერმო შმიდტს მოხდენილად ამოჰკრა ფეხი და მოწყვეტით დაახეთქა ტატამს. ფინალში მორიგი ბრწყინვალე და თანაც საჩემპიონო გამარჯვება კარაპეტიანთან მოიპოვა, როცა ჯერ გარეფეხით ვარდნაში ვაზარზე გადაიტანა, მერე კი მოგვერდით იპონზე პირდაპირ დააწყვიტა ტატამს.

ბექაურმა დუბლის შესასრულებლად ჯერ მასზე უფრო ტანმაღალი უზბეკი მუზაფარბეკ ტურობოევი შეხვედრის დაწყებიდან 15 წამში მოგვერდზე ზვარაკივით წამოიკიდა და ვაზარზე დააგდო, დასრულებამდე ნახევარი წუთით ადრე კი ფეხი კარგად ჩაუდგა, მიაწვა და მორიგ ვაზარზე გადააგდო. მას არგენტინელი მარიაო გოტო ბერსიერიც ზედ მიაყოლა, როცა ვარდნაში იპონზე გადაიყოლა, მეოთხედფინალში კი კორეელ ჯუიეოპ ჰანს კარგა ხანს უმზადა ილეთი და შედეგიანადაც - ისიც ვარდნაში გადააგორა, ოღონდ პირდაპირ იპონზე.

ბექაურმა ნახევარფინალში იაპონელ კოსუკე მაშიამას კიდევ უფრო დიდი უპირატესობით მოუგო - ჯერ ზედა ჩავლებიდან ვარდნაში გამოცერა ვაზარზე, შეხვედრის ბოლოს კი ისევ ზედა ჩავლებიდან უკან გამოცერა. ბექაურმა ფინალიც იპონით მოიგო უნგრელ ევროპის მესამე პრიზიორ როლანდ გოზთან - იაპონელივით ისიც გარეფეხით „გადატეხა“.

ჭანტურიამ ჯგუფში უზბეკ შოკისტა ნაზაროვას, ვენესუელელ ელიანა აგიარს და მაროკოელ ოულაია ხაირის წმინდად მოუგო, მერე კი ჯერ ნახევარფინალში დამარცხდა იაპონელთა მომავალ ჩემპიონ მამი ასაჰისთან, შემდეგ კი ბრინჯაოსთვის პაექრობაც ვაზარიც დათმო ფრანგ მორგანე ფერესთან.

მოკლედ, კიდევ ერთხელ - კვირას ვაჟებში 100 კგ-მდე წონით კატეგორიაში იჭიდავებს ევროპის წლევანდელი ჩემპიონი ილია სულამანიძე, რომლის პირველი მეტოქე სამხრეთკორეელი სიმ ჯე ვუ იქნება. +100 კგ-ში კი გამოვლენ საბა ინანეიშვილი (პირველ წრეში ჩინელ ჰაონან ჰუს ხვდება) და ევროპის კიდევ ერთი ჩემპიონი გელა ზაალიშვილი (პირველ წრეში თავისუფალია), რომელზეც განსაკუთრებულ იმედს ვამყარებთ. გოგონებს შორის +78 კგ-ში იჭიდავებს სალომე მაყიშვილი, რომლის პირველი მეტოქე ჰოლანდიელი მარიტ კამპსი იქნება.

1459
მკითხველის კომენტარები / 0 /
მსგავსი ამბები
რუბრიკის სხვა სიახლეები
;