[ანალიზი, VIDEO] ძიუდო. სულამანიძის ვერცხლი, ანუ წამიერი მოდუნების ფასი

ტყიბულელმა ილია სულამანიძემ (100) ვერცხლის მედლით დაასრულა გამოსვლა ახალგაზრდა ძიუდოისტთა მსოფლიოს ჩემპიონატზე. მან ფინალური პაექრობა იაპონელ კაზუნარი კამიგაკისთან წმინდად დათმო.

არადა, ვაზარი ამოუქაჩა და მოგებაც თავისუფლად შეეძლო, მაგრამ წამიერი მოდუნება წაგებად დაუჯდა. აქვე შეგახსენებთ, რომ სულამანიძე ევროპის წლევანდელი ჩემპიონია.

ფინალურ შეხვედრაში მთავარი მოვლენები ბოლო წუთზე განვითარდა, ჯერ იყო და დასრულებამდე 47 წამით ადრე იაპონელმა სავაზარედ ამოუსვა სულამანიძეს, თუმცა არც ქართველი გატყდა და ზუსტად 37 წამში ჩახტომით კისრულზე წამოიღო კამიგაკი.

დამატებით დროშიც თანაბარი ბრძოლა იყო, მაგრამ ერთ მომენტში სულამანიძემ კონცენტრაცია დაკარგა, რითაც კარგად ისარგებლა მეტოქემ და "გარე ფეხით" მორიგი ვაზარი მიითვალა.

სულამანიძემ პირველივე წრეშიც საყურადღებო გამარჯვება მოიპოვა, როცა კორეელი ჯაევოო სიმი დაამარცხა წმინდად. საერთოდაც, ის ფინალში იპონებით გავიდა - ამგვარად მოუგო უნგრელ პეტერ არვალს, დანიელ მატიას მადსენს (ამას დამატებით ვაზარიც აართვა) და ნახევარფინალში რუს მატვეი კანიკოვსკის

სამწუხაროდ, დღეს ეს ჩვენი ერთადერთი მედალი აღმოჩნდა. ძალზე დასანანია, რომ უმედლოდ დარჩა ჩვენი გუნდის ერთ-ერთი ლიდერი, ევროპის კიდევ ერთი წლევანდელი ჩემპიონი გელა ზაალიშვილი (+100). თუმცა მას წილისყრამაც არ გაუმართლა - პირველივე შეხვედრაში სავარაუდო მეტოქედ იაპონელი სოსუკე მაცუმურა ჰყავდა.

სამწუხაროდ, სასწაული არ მოხდა - მაცუმურამ მოიგო პირველი წრის შეხვედრა და მერე სულაც ჩემპიონიც გახდა, გმირობა კი ვერც ზაალიშვილმა ჩაიდინა, ვერ დაამარცხა იაპონელი - იპონით წააგო და საერთოდ გამოვარდა, რადგან მერვედფინალში დამარცხდა და არა მეოთხედფინალში.

ანალოგიურად დაემშვიდობნენ ჩემპიონატს საბა ინანეიშვილი (+100) და სალომე მაყიშვილიც (+78). ინანეიშვილმა პირველ წრეში ჩინელი ჰაონან ჰუ კი დააიპონა, მაგრამ მერვედფინალში წააგო უნგრელ რიხარდ სიპოჟთან. მაყიშვილი პირველივე შეხვედრაში დამარცხდა ჰოლანდიელთა მომავალ მესამე პრიზიორ მარიტ კამპსთან.

ამით მარაკეშში პირადი პირველობა დასრულდა, ჩვენმა ნაკრებმა კი გამოსვლა 5 მედლით დაასრულა: 3 ოქრო და თითო ვერცხლ-ბრინჯაო. ამათგან 1 ოქრო გოგონების ნაკრებზე მოდის - ქართული ძიუდოს ისტორიაში, მსოფლიოს პირველი ჩემპიონი ეთერ ლიპარტელიანი (57) გახდა, ხოლო ბიჭებში ოქროს მედლებს ვლადიმერ ახალკაცი (81) და ლაშა ბექაური (90) დაეუფლნენ.

მსოფლიოს ვიცე-ჩემპიონი სულამანიძე გახდა, ხოლო ტატო გრიგალაშვილი (81) მესამეზე გავიდა. ამათგან ლიპარტელიანმა და ბექაურმა ახალგაზრდული დუბლიც შეასრულეს - წლეულს ევროპის ჩემპიონებიც გახდნენ.

81 კილოგრამში, ევროპის ჩემპიონატის მსგავსად, ახლაც ორი ქართველი ავიდა კვარცხლბეკზე, ოღონდ მაშინ ოქრო-ვერცხლი გვქონდა, ახლა - ოქრო და ბრინჯაოს დავინარჩუნეთ.  

საერთო გუნდურ ჩათვლაში  საქართველოს ნაკრები მეორეზე გავიდა იაპონიის შემდეგ, ხოლო ბიჭებში ჩვენ და იაპონიას ზუსტად თანაბარი ოდენობისა და სინჯის მედლები გვაქვს. თუმცა იაპონელებმა იმით გაგვისწრეს, რომ, ჩვენგან განსხვავებით, მეხუთე ადგილზე გასული სპორტსმენი ჰყავთ.

380
მკითხველის კომენტარები / 1 /
ვასიკო კეჟერეაძე
0
არაფერი სასწაული არ იქნებოდა ვიღაც მაცუმურა რომ დაემარცხებინა გელა ზაალიშვილს. მე თუ მკითხავთ, სასწაული იაპონელისთვის იყო გელასთან გამარჯვება.აბა, შეადარეთ, რა მიღწევები აქვს ერთს და მეორეს... უბრალოდ, მეტისმეტად თამამად შევიდა ორთაბრძოლაში ჩვენი ფალავანი, იღლიაში ისე ამოიდო მისი მკლავი, დარწმუნებული იყო, დაყვებოდა ეს ამხელა რუმბი. თავდაჯერებულობა რომ არა, ორგზის ჩემიონი იქნებოდა. არა უშავს, სამომავლოდ ფრთხილად იჭიდავებს და რა შეუძლია, კი ვნახთ ზაგრების გრან პრის ფინალში.
მსგავსი ამბები
რუბრიკის სხვა სიახლეები
;