[ანალიზი] გავტეხოთ ნავსი და ირლანდია: კუნძულელი მეტოქე ჩვენთვის ძალიან უხერხულია

საქართველოს ეროვნული ნაკრები შაბათს, 17 საათზე, „დინამო არენაზე“ ეთამაშება ირლანდიის უპირველეს გუნდს.

ნავსი გასატეხია - კუნძულელი მეტოქე ჩვენთვის ძალიან უხერხულია. საკმარისია აღინიშნოს, რომ მისთვის არასოდეს მოგვიგია. ამდენად, ნავსი უნდა გატყდეს. ამის დრო მოვიდა, მიუხედავად იმისა, რომ ირლანდიის ნაკრები ჩვენზე უფრო მოტივირებულია. 

რატომ უნდა მოვიგოთ?

ერთა ლიგის გადამწყვეტ შეხვედრებამდე ბევრი დრო აღარ დარჩა. აქედან გამომდინარე, ადვილი წარმოსადგენია, ფსიქოლოგიური კუთხით რა კარგად იმოქმედებს საქართველოს ნაკრებზე ისეთი უხერხული მოწინააღმდეგის დამარცხება, როგორიცაა ირლანდია.

გავრისკავთ და ვიტყვით, რომ საამისოდ მართლაც რომ საუკეთესო ჟამი დგას. მართალია, „სამყურებს“ გვარიანი სატურნირო მოტივაცია აქვთ, მაგრამ ჩვენც არ გვაკლია გამარჯვების წყურვილი. 

ირლანდიას ორი საკვანძო ფეხბურთელი აკლია. თბილისში ვერ ითამაშებს გუნდის წამყვანი ცენტრალური მცველი რიჩარდ კეო. წესითა და რიგოთ ვერ უნდა ეთამაშა მის მეწყვილეს, შეინ დაფსაც, მაგრამ უკანასკნელი ინფორმაციით, „ბრაიტონის“ უკანახაზელი გამოჯანმრთელდა და ინგლისურ კლუბთან ერთად ივარჯიშა კიდეც. ალბათ, თბილისში მას სასტარტოში ვიხილავთ.

ირლანდიელთა დამრიგებელს, მიკ მაკარტის იმედი გაუმართლდა. მოგეხსენებათ, მან განაცხადა, რომ დაფისა და „შეფილდ იუნაიტედის“ ფორვარდის, დევიდ მაკგოლდრიკისათვის თვითმფრინავში ადგილს ინახავდა. დაფი ამ თვითმფრინავში ჩაჯდება, მაკგოლდრიკი კი...

კონოლის იმედად

ბოლო ინფორმაციით, ირლანდიის ნაკრებს მაკგოლდრიკი ვერაფრით დაეხმარება. ეს „სამყურებისათვის“ ძალიან დიდი დანაკლისია. გამოდის, რომ ირლანდიელთა შეტევაში მთავარი კაცი „ბრაიტონის“ თინეიჯერი შემტევი, აარონ კონოლი იქნება.

კონოლი კარგ ფორმაშია და ამასწინათ ორი გოლიც შეაგდო „ტოტენჰემის“ კარში, მაგრამ მას აკლია სანაკრებო გამოცდილება. ზოგადად, მაკგოლდრიკი და კეო ირლანდიელთა ლიდერებად ითვლებიან და მათი არყოფნა საჩვენოდ უნდა გამოვიყენოთ.

ის ვნახე არაერთხელ. თუნდაც სომხეთთან ახალგაზრდული ნაკრების მატჩში... სხვათა შორის, არ გამკვირვებია მისი გოლები „ტოტენჰემის“ კარში. უკვე ვთქვი, რომ მისი იმედი გვაქვს. კონოლი მიიღებს შანსს და მან ეს შანსი უნდა გამოიყენოს. მთავარი ის არის, რომ ნებისმიერ შემთხვევაში ბევრი იშრომოს. ახალგაზრდა ფეხბურთელისთვის შრომა ძალიან მნიშვნელოვანია. მან უნდა გვასახელოს“ - ამბობს კონოლის თაობაზე მიკ მაკარტი.

მაკარტი თბილისში  სირთულეებს ელის

„რა თქმა უნდა, ჩვენი მიზანი მხოლოდ მოგებაა. ეჭვგარეშეა რომ ძალიან რთული შეხვედრა გველის. იმედი გვაქვს იმ ფეხბურთელების, რომლებიც ამ შეხვედრისათვის შევარჩიეთ.“ - ამბობს ირლანდიის ნაკრების დამრიგებელი. ირლანდიური მედია თანხმდება, რომ ჩვენი მეტოქე 4-3-3 სქემით ითამაშებს.

ირლანდიელთა შემადგენლობა ასეთია:
მეკარეები: დარენ რენდოლფი (მიდლსბრო, ინგლისი), მარკ ტრავერსი (ბორნმუთი, ინგლისი), კირან ოჰარა (ბარტონი, ინგლისი);
მცველები: სიმუს კოულმენი (ევერტონი, ინგლისი), მეტ დოჰერტი (ვულვზი, ინგლისი), კევინ ლონგი (ბარნლი, ინგლისი), ჯონ იგანი (შეფილდ იუნაიტედი, ინგლისი), დარა ლენიჰანი (ბლექბერნი, ინგლისი), გრეგ კანინგემი (ბლექბერნი, ინგლისი), ენდა სტივენსი (შეფილდ იუნაიტედი, ინგლისი);
ნახევარმცველები: ალან ბრაუნი (პრესტონი, ინგლისი), ჯოშ კალენი (ჩარლტონი, ინგლისი), გლენ ველანი (ჰართსი, შოტლანდია), კონორ ჰურიჰანი (ასტონ ვილა, ინგლისი), ჯეიმს მაკლინი (სტოკი, ინგლისი), რონან კერტისი (პორტსმუთი, ინგლისი), ჯეფ ჰენდრიკი (ბარნლი, ინგლისი), კალუმ ოდოვა (ბრისტოლი, ინგლისი), ჯეკ ბირნი (შემროკ როვერსი, ინგლისი), შეინ დაფი (ბრაიტონი, ინგლისი).
თავდამსხმელები: ჯეიმს კოლინზი (ლუთონი, ინგლისი), შონ მაგუაირი (პრესტონი, ინგლისი), კალუმ რობინსონი (შეფილდ იუნაიტედი, ინგლისი), ალან ჯაჯი (იფსვიჩი, ინგლისი), სკოტ ჰოგანი (სტოკი). 

თითქმის  ოპტიმალურით

საქართველოს ნაკრები მეტოქეს თითქმის ოპტიმალური შემადგენლობით დაუხვდება. ტრავმებს მაინც ვერ ავერიდეთ. ჯერ ლაშა დვალი დაგვიშავდა, მერე კი ვახო ჭანტურიშვილი.

ამის მიუხედავად, შემადგენლობაკარგია. არის სხვადასხვა პრობლემები, მათ შორის - სათამაშო პრაქტიკის ნაკლებობა, მაგრამ მათ აღარ ჩავუღრმავდებით. ფაქტი ისაა, რომ ამ შემადგენლობას ირლანდიელთა დამარცხება შეუძლია.

მეკარეები: გიორგი ლორია (ანორთოსისი, კვიპროსი), გიორგი მაკარიძე (ვიტორია, სეტუბალი, პორტუგალია), ლაზარე კუპატაძე (საბურთალო, თბილისი)
მცველები: ოთარ კაკაბაძე (ლუცერნი, შვეიცარია), გურამ კაშია (სან ხოსე ერთკვეიკსი, აშშ), სოლომონ კვერკველია (ლოკომოტივი, მოსკოვი, რუსეთი), დავით ხოჭოლავა (შახტარი, დონეცკი, უკრაინა), გია გრიგალავა (არსენალი, ტულა, რუსეთი), ჯიმი ტაბიძე (უფა, რუსეთი), გიორგი ნავალოვსკი (დინამო, ბათუმი)

ნახევარმცველები: ჯაბა კანკავა (ტობოლი, ყაზახეთი), ოთარ კიტეიშვილი (შტურმი, ავსტრია), ვაკო გვილია (ლეგია, პოლონეთი), საბა ლობჟანიძე (რანდერსი, დანია),, გიორგი აბურჯანია (ტვენტე, ჰოლანდია), ჯანო ანანიძე (სპარტაკი, მოსკოვი, რუსეთი), თორნიკე ოქრიაშვილი, მურთაზ დაუშვილი (ორივე ანორთოსისი, კვიპროსი), ლევან შენგელია (ქონიასპორი, თურქეთი), გიორგი ხარაიშვილი (გეტებორგი, შვედეთი), ვაკო ყაზაიშვილი (სან ხოსე ერთკვეიკსი, აშშ)

თავდამსხმელები: გიორგი ქვილითაია (გენტი, ბელგია), ელგუჯა ლობჯანიძე (თარაზი, ყაზახეთი)

ყოველდღიური სპორტული გაზეთი "ლელო"
1176
მკითხველის კომენტარები / 0 /
მსგავსი ამბები
რუბრიკის სხვა სიახლეები
;