[ანალიზი] გაკვეთილი ნომერი ორი და პირველი ნაბიჯები სკოტების მიწაზე

შოტლანდია-საქართველო 36:9 
შოტლანდია: (15-9) ქინგჰორნი (ჰარისი 27), სიმორი, თეილორი, ჯონსონი (პ.ჰორნ 65), გრემი, ჰეისთინგსი, პრაისი (ჯ.ჰორნი 52), (1-8) რიდი (დელი 55), თერნერი, ზ.ფეიგერსონი (ბერგენი 59), ქამინგსი, ჯ.გრეი (თულისი 41, სთიუართი 66), ვილსონი, რიჩი (ბრედბრი 46), თომსონი (ბერგენი 33-42)
6ლ: პრაისი, ქინგჰორნი, ჯონსონი, გრემი, ჯ.ჰორნი, პ.ჰორნი; 3გ: ჰეისთინგსი (2) ჯ.ჰორნი

სინბინი: ზ.ფეიგერსონი

საქართველო: (15-9) მათიაშვილი, ძნელაძე, კაჭარავა (კვესელაძე 53), მალაღურაძე (მჭედლიძე 66), მოდებაძე, აბჟანდაძე, ლობჟანიძე (აფრასიძე 61). (1-8) ნარიაშვილი (გოგიჩაშვილი 65), მამუკაშვილი (კარკაძე 73), გიგაშვილი (მელიქიძე 65-72), მიქაუტაძე (ლომიძე 73), ნემსაძე, სუთიაშვილი (გოგიჩაშვილი 33-42, საღინაძე 65), თხილაიშვილი, გორგაძე
3ს: აბჟანდაძე
სინბინი: ნარიაშვილი, ძნელაძე
მსაჯი: რომენ პუატი (საფრანგეთი) 

წარმოუდგენელია, მაგრამ „მარიფელდზე“, სადაც თამაში, ალბათ, ყველა ქართველი მორაგბის ოცნებაა და „ბორჯღალოსნებმა“ პირველად დადგეს ფეხი, შოტლანდიელებმა შეცდომა დაუშვეს.

მატჩის დაწყების წინ საქართველოს ჰიმნის ნაცვალად, ძველი, „დიდება“ ააჟღერეს. ასე, კურიოზულად აღინიშნა ჩვენი გუნდის სტუმრობა „სკოტური“ რაგბის მექაზე. 

მატჩის შემდეგ შოტლანდიის რაგბის კავშირმა ბოდიში მოიხადა აღნიშნულ ფაქტთან დაკავშირებით. პრესსამსახურის მიერ გავრცელებულ კომუნიკეში წერია:

„ეს ორი კავშირის ნამდვილად არასწორი კომუნიკაციის შედეგი იყო. ჩვენ დაუყოვნებლივ ბოდიში მოვუხადეთ უშუალოდ საქართველოს დელეგაციას. სტუმრების პატივსაცემად ჩვენ მათი ნამდვილი ჰიმნი დავუკარით, როდესაც გუნდს და საქართველოს რაგბის კავშირის პრეზიდენტს მატჩისშემდგომ ღონისძიებაზე შევხვდით. შესანიშნავი ურთიერთობა გვაქვს საქართველოს რაგბის კავშირთან და მადლიერებას გამოვხატავთ, რომ სტუმრები შეცდომას გაგებით მოეკიდნენ“. 

მატჩის წინ ჰიმნების შესრულება და სიმღერა ოფიციალური, თამაშის შემადგენელი ნაწილია და ამაზე ამდენი ყურადღებაც სწორედ ამიტომ გავამახვილეთ. თუმცა, ჩვენთვის პრობლემური ამ მატჩში მხოლოდ ეს არ ყოფილა. 

პირველ ტაიმში საქართველოს ნაკრები წინა მატჩისგან განსხვავებით უკეთ გამოიყურებოდა. გუნდი უფრო ყურადღებით ირჯებოდა. თუმცა, დაცვაში არსებულ პრობლემებს, რომელიც სწრაფად მოთამაშე შოტლანდიელები გვიქმნიდნენ, „ბორჯღალოსნები“ ვერაფრით გაუმკლავდნენ. 

პირველ ტაიმში, შეიძლება ითქვას, რომ შერკინებაში უპირატესობა გვქონდა, რასაც ვერაფრით ვიტყვით შესვენების შემდეგ განვითარებულ მოვლენებზე. გასკუთრებით კი, მას შემდეგ, რაც მოედანზე სათადარიგო მორკინალები გამოჩნდნენ. 

მატჩის პირველ ნახევარში შოტლანდიელებმა ორი გარდაუსახავი ლელო გაიტანეს, რაზეც ჩვენმა მგეზავმა თედო აბჟანდაძემ სამი საჯარიმო დარტყმით უპასუხა და ტაიმო მხოლოდ ერთი ქულის სხვაობით 9:10 დავთმეთ. შესვენების შემდეგ, მალევე ანგარიშში დაწინაურებაც შეგვეძლო, მაგრამ აბჟანდაძის დარტყმული საჯარიმო ოდნავ აცდა კარს. 

ამის შემდეგ, დაახლოებით 50-ე წუთიდან მოყოლებული ვითარება მოედანზე ნელ-ნელა იცვლებოდა. ჩვენმა გუნდმა წესის დარღვევებს უმატა. შოტლანდიელები კი, კარში ჯიუტად არ ურტყამდნენ და ბურთი აუტში გადაქონდათ, საიდანაც დერეფნის მოგების შემდეგ შეტევის განხორციელებას ცდილობდნენ. 

მასპინძლებმა მორიგი ლელო 51-ე წუთზე გაიტანეს და 17:9 დაწინაურდნენ. ეს ანგარიში 69-ე წუთამდე შენარჩუნდა. დასკვნით 11 წუთში „ბორჯღალოსნებმა“ დაცვაში ერთმანეთის მიყოლებით, თითქოს ბავშვური შეცდომები დაუშვეს და „სკოტებს“ სამი ლელოს გატანის საშუალება მისცეს. - 36:9. 

აღსანიშნავია, რომ მეორე ტაიმში საქართველოს ნაკრები ბურთის გაკონტროლებას ცდილობდა. თუმცა, მეტოქის ხაზის გაჭრას და შეტევის განვითარებას ვერაფრით ახერხებდა და მეტოქის ლელოსთან ახლოს ხიფათი არ შექგვიქმნია. 

მატჩის შემდეგ

მილტონ ჰეიგი, საქართველოს ნაკრების მთავარი მწვრთნელი: 

„პირველი დონის გუნდთან ზედიზედ ორი თამაში ჩვენი მორაგბეებისთვის ძალიან დიდი გამოცდილებაა. ჩვენ მეტი ასეთი თამაში გვჭირდება, რათა კიდევ უფრო განვვითარდეთ. თამაშის პირველ ნახევარში უკეთ ვითამაშეთ და ეს ანგარიშზეც აისახა. მიმაჩნია, რომ შოტლანდიამ ფიზიკურად ვერცერთ მატჩში ვერ გვაჯობა. უბრალოდ, ისინი გადაწყვეტილებებს ჩვენზე სწრაფად იღებდნენ და უკეთ ასრულებდნენ. მეორე ტაიმში მეტოქის შეტევა ბევრად უკეთესი იყო. ეს სწორედ ისაა, რაც მსოფლიო თასის წინ გასახურებელ მატჩებში გვჭირდებოდა. 

დიახ, გამოცდილების მისაღებად ეს თამაშები ძალიან კარგი იყო, მაგრამ განვითარებისთვის ჩვენ გვჭირდება ფრანჩაიზის შექმნა, რომელიც რეგულარულად ითამაშებს მაღალი დონის გუნდებთან. ნაკრების ის ბიჭები, რომლებიც საქართველოში თამაშობენ, უდიდეს გამოცდილებას შეიძენენ.

წარმოიდგინეთ რამდენად დიდი იქნება პროგრესი, თუ ისინი კვირიდან კვირამდე მაღალი დონის მატჩებს ჩაატარებენ. მაღალი დონის ტურნირებში მონაწილეობით, ყველა ვითარდება. მაგალითად, შოტლანდიელები, რომლებსაც უდიდესი გამოცდილება აქვთ. ჩვენ ვუტევდით, ფაზებს ვკინძავდით, ამ დროს პატარა შეცდომას ვუშვებდით და გონზე რომ მოვდიოდით, უკვე კარს უკან ვიდექით გარდასახვის მოლოდინში და იმაზე ვფიქრობდით, რატომ მოხდა ასე“.

გრეგორ თაუნსენდი, შოტლანდიის ნაკრების მთავარი მწვრთნელი: 

„პირველ ტაიმში მთლად კარგად ვერ გამოვიყუდებოდით. თუმცა, მეორეში მდგომარეობა გამოვასწორეთ. ბურთს უკეთ ვაკონტროლებდით. ფეხით ტაქტიკური დარტყმებიც უკეთ გამოგვივიდა და ამან შედეგი მოიტანა. ბოლო 15 წუთში ჩვენი გუნდი უფრო ენერგიულად გაისარჯა და რამაც, ფაქტობივად, გადაწყვიტა კიდეც მატჩის ბედი. 

საქართველოს ნაკრებს კარგი შანსი ჰქონდა ეჩვენებინა რა შეუძლია. დღეს უფრო მრავალფეროვნად თამაშობდნენ და ჩვენს დაცვას სერიოზულ პრობლემებს უქმნიდნენ. შერკინებაში რამდენჯერმე დაგვაჯარიმეს და ხაზიც ერთი-ორჯერ გაგვიჭრეს, სახიფათოდ შემოგვიტიეს. როცა ბურთი ქონდათ კარგად ირჯებოდნენ. თუმცა, ჩვენ თავს კარგად ვიცავდით, განსაკუთრებით კი, მეორე ტაიმში, რამაც რამდენიმე ლელოს გატანის საშუალება მოგვცა.“ 
საქართველოს ნაკრები გუშინ ლონდონიდან იაპონიაში გაემგზავრა, სადაც მსოფლიოს თასის გათამაშების დაწყებამდე მზადებას განაგრძობს. 

ბოლო რეპეტიციები გამართეს საქართველოს ნაკრების მეტოქეებმა მსოფლიოს თასის ჯგუფურ ეტაპზე. უელსის ეროვნული გუნდი სტუმრად, „ავივა სთედიუმზე“ ირლანდიას დაუპირისპირდა და 10:19 წააგო. შედეგად, „სამყურები“ თავის ისტორიაში პირველად ავიდნენ მსოფლიოს რეიტინგის პირველ საფეხურზე. 

ავსტრალიის ნაკრებმა კი, ჰემილთონში სამოას ეროვნულ გუნდს უმასპინძლა და 34:15 სძლია. მოულოდნელი შედეგით დასრულდა ახალი ზელანდიისა და ტონგას ნაკრებების დაპირისპირება. „ოლ ბლექსმა“ ტონგელებს 14 ლელო გაუტანა და 65-ე წუთისთვის 92:0 უგებდა. საბოლოოდ კი, მატჩი 92:7 მოიგო. 

ტესტები 

ახ.ზელანდია-ტონგა 92:7
ინგლისი-იტალია 37:0
იაპონია-სამ.აფრიკა 7:41
ავსტრალია-სამოა 34:15
ირლანდია-უელსი 19:10 
რუსეთი-ქონოთი 14:42
კანადა-აშშ 15:20 

ყოველდღიური სპორტული გაზეთი "ლელო"
652
მკითხველის კომენტარები / 0 /
მსგავსი ამბები
რუბრიკის სხვა სიახლეები
;